«سونىمەن قاتار كىتاپقا قاسىم-جومارت توقاەۆتىڭ 2021-2022 جىلدارداعى قازاقستان حالقىنا ارناعان جولداۋلارى ەندى. 2021 جىلى قازاقستان COVID-19 پاندەمياسىنىڭ سالدارىن جويۋعا, ەلىمىزدىڭ الەۋمەتتىك-ەكونوميكالىق ءوسىمىن قايتا قالپىنا كەلتىرۋگە باسا ءمان بەردى. بۇل پرەزيدەنتتىڭ جۇمىس كەستەسىنەن دە انىق كورىندى. جيناقتىڭ ءبىرىنشى تومىنا مەملەكەت باسشىسىنىڭ 2021 جىلعى ناۋرىز بەن جەلتوقسان ارالىعىندا ەلىمىزدىڭ جانە وڭىرلەردىڭ الەۋمەتتىك-ەكونوميكالىق دامۋ ماسەلەلەرىنە قاتىستى كەڭەستەردە, ۇكىمەتتىڭ, قازاقستان حالقى اسسامبلەياسىنىڭ, ۇلتتىق قوعامدىق سەنىم كەڭەسىنىڭ وتىرىستارىندا, «استانا» حالىقارالىق قارجى ورتالىعىن باسقارۋ جونىندەگى كەڭەستە جانە باسقا دا جيىنداردا سويلەگەن سوزدەرى توپتاستىرىلدى. بۇدان بولەك پرەزيدەنتتىڭ مەملەكەتتىك مەرەكەلەر مەن قوعامدىق ماڭىزى بار اتاۋلى كۇندەرگە بايلانىستى قۇتتىقتاۋلارى ەنگىزىلدى. اسىرەسە, قاسىم-جومارت توقاەۆتىڭ 2021 جىلعى قىركۇيەكتەگى «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىن ەرەكشە اتاپ وتكەن ءجون.ەكىنشى توم 2022 جىلدىڭ قاڭتارى مەن ناۋرىز ارالىعىن قامتيدى. اتالعان كەزەڭ ەلىمىزدەگى «قاسىرەتتى قاڭتار» وقيعاسىمەن ەرەكشەلەندى. مەملەكەت باسشىسىنىڭ ەرىك-جىگەرى مەن باتىلدىعىنىڭ, سونداي-اق بارشا وتانداسىمىزدىڭ بىرلىگى مەن ىنتىماعىنىڭ ارقاسىندا ەلىمىز وسى اۋىر سىناقتى ەڭسەرە ءبىلدى. بۇل جيناقتا قاسىم-جومارت توقاەۆتىڭ قاڭتار وقيعاسىنا قاتىستى حالىققا ارناعان مالىمدەمەلەرى مەن ۇندەۋلەرىنە, سونداي-اق «حابار» جانە «Qazaqstan» تەلەارنالارىنا بەرگەن سۇحباتىنا ايرىقشا نازار اۋدارۋعا بولادى. سونىمەن قاتار ەكىنشى تومعا مەملەكەت باسشىسىنىڭ «جاڭا قازاقستان: جاڭارۋ مەن جاڭعىرۋ جولى» اتتى ناۋرىز ايىنداعى جولداۋى ەندى. بۇل جولداۋدا كوتەرىلگەن نەگىزگى ماسەلە – اۋقىمدى رەفورمالار مەن جاڭا قازاقستاندى قۇرۋ», دەپ جازدى بەرىك ءۋالي.
سونىمەن قاتار ول الەمدە بولىپ جاتقان ساياسي جانە الەۋمەتتىك تەندەنتسيالار مەن وقيعالار قازاقستاننىڭ حالىقارالىق ارەناداعى قىزمەتىن جانداندىرا تۇسكەنىن ايتتى. سوندىقتان مەملەكەت باسشىسىنىڭ وتكەن جىلعى جۇمىس كەستەسى اۋقىمدى بولعان.
ء«ۇشىنشى جيناققا پرەزيدەنتتىڭ ءىرى فورۋمداردا, سونداي-اق جاقىن جانە الىس شەت ەلدەرگە جاساعان ساپارلارىندا سويلەگەن سوزدەرى ەندى. قاسىم-جومارت توقاەۆ وتكەن جىلى تاجىكستان, كورەيا رەسپۋبليكاسى, رەسەي فەدەراتسياسى, تۇرىكمەنستان, بەلگيا مەن شۆەيتسارياعا ساپارمەن باردى. بۇدان بولەك پرەزيدەنت تۇركىتىلدەس مەملەكەتتەر ىنتىماقتاستىعى كەڭەسىنىڭ VIII سامميتىنە قاتىسۋ ءۇشىن تۇركياعا باردى. مەملەكەت باسشىسىنىڭ بۇۇ باس اسسامبلەياسىنىڭ وتىرىستارىنداعى جانە وسى جاھاندىق ۇيىمنىڭ باسقا دا ءىس-شارالارىنداعى بەينەبايلانىس ارقىلى سويلەگەن سوزدەرى دە اتالعان جيناققا توپتاستىرىلدى. سونداي-اق بۇل تومعا قاسىم-جومارت توقاەۆتىڭ جىل سايىن وتەتىن حالىقارالىق ءىس-شارالاردا سويلەگەن سوزدەرى ەنگىزىلدى. اتاپ ايتقاندا, جوعارى ەۋرازيالىق ەكونوميكالىق كەڭەس, اشحاباد قالاسىندا وتكەن ورتالىق ازيا ەلدەرى باسشىلارىنىڭ كونسۋلتاتيۆتىك كەزدەسۋى, دۋشانبە قالاسىندا وتكەن ۇقشۇ مەن شىۇ وتىرىستارى.
بۇدان بولەك پرەزيدەنتتىڭ «Essentiel des Relations internationales» جۋرنالىنا جانە رەسەيلىك بەلگىلى جۋرناليست جانە تەلەجۇرگىزۋشى لەونيد ملەچينگە بەرگەن سۇحباتتارى, پرەزيدەنتتىڭ «The Parliament» جۋرنالىندا جاريالانعان «Partnership with the EU will anchor Kazakhstan’s future progress» ماقالاسى ەندى» دەپ جازدى مەملەكەت باسشىسىنىڭ ءباسپاسوز حاتشىسى.
قازاقستان رەسپۋبليكاسى پرەزيدەنتىنىڭ ءباسپاسوز قىزمەتى قاسىم-جومارت كەمەل ۇلىنىڭ ءبىر جىلعى قىزمەتىنىڭ قورىتىندىسى رەتىندە وسى جيناقتى وقىرماندارعا ۇسىنىپ وتىر. سونداي-اق جيناقتا مەملەكەت باسشىسىنىڭ قاتىسۋىمەن وتكەن ءىس-شارالاردا تۇسىرىلگەن سۋرەتتەر بەرىلگەن. كىتاپتا جاريالانعان ماتەريالدار قىزىعۋشىلىق تانىتقان زەرتتەۋشىلەر مەن مەملەكەتتىك ورگانداردىڭ قىزمەتكەرلەرى ءۇشىن قۇندى ءارى پايدالى قۇجات بولماق.
ەسكە سالساق, مەملەكەت باسشىسىنىڭ سويلەگەن سوزدەرى وسىمەن ءۇشىنشى جىل جيناق بولىپ شىعىپ وتىر.
