كىتاپتىڭ تارالىمى 12 مىڭ دانانى قۇرايدى. وقىرماندار شىعارمامەن ەلىمىزدىڭ وبلىستىق, قالالىق جانە اۋداندىق كىتاپحانالارىندا تانىسا الادى.
العاش رەت 2012 جىلى جارىق كورگەن رومان كەڭ اۋديتوريانىڭ قۇرمەتىنە يە بولىپ, جازۋشىلار قاۋىمداستىعىندا جوعارى باعالاندى. كىتاپتىڭ ەرەكشەلىگى - سيۋجەتتى باستى كەيىپكەردىڭ اتىنان ۇسىنۋ.
كىتاپ قر مادەنيەت جانە سپورت مينيسترلىگىنىڭ قولداۋىمەن شىعارىلعان.
«بۇل رومان العاش رەت 2012 جىلى جارىق كورىپ, وقىرماندار اراسىندا جوعارى باعالاندى. سول جىلى قازاقستان جازۋشىلار وداعى روماندى مەملەكەتتىك سىيلىققا ۇسىندى. بۇل كىتاپتىڭ ەكىنشى باسىلىمى قر پارلامەنتى ءبىر توپ دەپۋتاتتارىنىڭ باستاماسىمەن جارىق كوردى. مەن ولارعا بۇل ءۇشىن ريزامىن. مادەنيەت جانە سپورت مينيسترلىگىنە دە وسى باستامانى قولداعاندارى ءۇشىن العىسىمدى بىلدىرەمىن», دەدى ەركىنباي اكىمقۇلوۆتىڭ قىزى قۇرالاي اكىمقۇلوۆا.
ەركىنباي اكىمقۇلوۆ پەن ءشامشى قالداياقوۆتىڭ ستۋدەنتتىك جىلداردان باستالىپ, كومپوزيتور ءومىرىنىڭ سوڭىنا دەيىن جالعاسقان دوستىعى رومان اۆتورىنا باستى كەيىپكەردىڭ سان قىرلى تۇلعاسىن اشۋعا, ونىڭ ءومىرىن بارىنشا شىنايى كورسەتۋگە مۇمكىندىك بەرگەن.
كىتاپتا سول داۋىردەگى كوپتەگەن مەملەكەت جانە قوعام قايراتكەرلەرىنىڭ, ۇلى كومپوزيتور جۇمىس ىستەگەن, كەزدەسكەن جانە دوس بولعان ايگىلى اقىندار, جازۋشىلار, اكتەرلەر, انشىلەردىڭ بەينەلەرى دە بار.
«بالا كەزىمدە ءشامشى اعايدىڭ ءجيى قوناققا كەلگەنى, ءبىز ونى ءجاميلا اپاي دەپ اتاعانىمىز, ولاردىڭ اقىندار مەن ادەبيەتشىلەر اراسىنداعى سۇحباتتارى ەسىمدە. ءبىز ۇزاق جىلدار بويى كومپوزيتوردىڭ ۇلكەن ۇلى قاسىم قالداياقوۆپەن ارالاسىپ كەلەمىز. مەنىڭ اكەم بۇل كىتاپتى 2007 جىلى باستاپ, 2012 جىلى جارىققا شىعاردى. قالداياقوۆتىڭ شىعارماشىلىعى تۋرالى العاشقى ماقالاسى 1969 جىلى «لەنينشىل جاس» گازەتىنىڭ بەتىنە شىققان بولاتىن. بۇل كىتاپتا كومپوزيتوردىڭ ءومىرى تۋرالى كوپتەگەن قىزىقتى دەرەكتەر بار», دەدى قۇرالاي اكىمقۇلوۆا كومپوزيتور جايلى جىلى ەستەلىكتەرىمەن ءبولىسىپ.
ءىس-شارادا بەلگىلى مەملەكەت جانە قوعام قايراتكەرلەرى, سونداي-اق اۆتوردىڭ وتباسى مۇشەلەرى ءسوز سويلەدى.
«بۇل كىتاپتىڭ تاريحى ەرەكشە. جۇرتشىلىقتىڭ ءوتىنىشى بويىنشا ەكىنشى باسىلىم جاريالاندى. ءشامشى قالداياقوۆتى بىلمەيتىن قازاق جوق. ول كوپتەگەن تانىمال اندەردىڭ اۆتورى عانا ەمەس, سونىمەن قاتار مەملەكەتتىك ءانۇران اۆتورلارىنىڭ ءبىرى. ەركىنباي اكىمقۇلوۆ ءشامشى قالداياقوۆتىڭ زامانداسى بولعان جانە وعان دوس ءارى شىعارماشىل ادام رەتىندە جاقىن بولعان. بۇل كىتاپتا كومپوزيتوردىڭ ءوزى تۋىپ-وسكەن اۋىلداعى ومىرىنەن باستاپ مانسابىنىڭ شىڭىنا دەيىنگى ءومىر كەزەڭى سيپاتتالعان. ەركىنباي اكىمقۇلوۆ - ءوزىنىڭ جازۋ ءستيلى بار بىرەگەي جازۋشى. وكىنىشكە وراي, ول 2019 جىلى قايتىس بولدى. بۇگىن وسى كىتاپتىڭ تۇساۋكەسەرىن ونى ەسكە الۋ ءۇشىن ۇيىمداستىردىق. ونىڭ شىعارماسى ءوز وقىرماندارىن تابادى دەپ سەنەمىن», دەدى قر ءماجىلىس دەپۋتاتى دارحان مىڭباي.
كىتاپتىڭ العى ءسوزىن جازعان ساياسي قايراتكەر قۋانىش سۇلتانوۆ تا ءسوز سويلەپ, جىلى لەبىزىن ءبىلدىردى.
«ەركىنباي اكىمقۇلوۆ بىلىمقۇمار ادام بولاتىن. باسقا ەڭبەكتەرىن ايتپاعاندا, ونىڭ ەكى كىتابى جاقسى مىسال بولا الادى. بىرەۋى وزبەكالى جانىبەكوۆكە, ەكىنشىسى ءشامشى قالداياقوۆقا ارنالعان كىتاپتارى», دەدى قۋانىش سۇلتانوۆ.
