قازاقستاندا 19 تولەم جۇيەسى تىركەلگەن. ونىڭ ىشىندە بانكارالىق اقشا اۋدارۋ جۇيەسى جۇيەلى تۇردە ماڭىزدى سانالادى, ونىڭ جۇمىسىن قۇب-تىڭ قازاقستاندىق بانكارالىق ەسەپ ايىرىسۋ ورتالىعى قامتاماسىز ەتەدى.
بانكارالىق اقشا اۋدارۋ جۇيەسى ارقىلى ۆاليۋتا نارىعىنا, باعالى قاعازدار نارىعىنا قاتىسۋشىلاردىڭ, بانك سەكتورىنىڭ جانە مەملەكەتتىك بيۋدجەت تولەمدەرىنىڭ 91%-دان استامى تولەنەدى. بانكارالىق كليرينگ جۇيەسى 2021 جىلدىڭ قورىتىندىسى بويىنشا قۇب رەەسترىندەگى ماڭىزدى تولەم جۇيەلەرىنە جاتقىزىلعان. بۇل جۇيە جۇيەلىك ماڭىزى بار تولەم جۇيەسى مەن تولەم كارتوچكالارىن قوسپاعاندا, بولشەك تولەمدەردىڭ 50%-دان استامىنا قىزمەت كورسەتەدى.
سونداي-اق ماڭىزدى تولەم جۇيەلەرىنە Visa مەن Mastercard حالىقارالىق تولەم جۇيەسى كىرەدى. بانكتىك شوت اشپاي جەكە تۇلعالاردىڭ اۋدارىمدارى جۇزەگە اسىرىلاتىن حالىقارالىق اقشا اۋدارىمدارى جۇيەلەرىنىڭ اراسىندا «زولوتايا كورونا» جۇيەسى ماڭىزدى تولەم جۇيەسىنە جاتادى.
2021 جىلى قازاقستاندا جۇمىس ىستەيتىن اقشا اۋدارىمدارى جۇيەلەرىنىڭ رەەسترىنە «Ria Money Transfer» تولەم جۇيەسى ەنگىزىلدى. قالعان 14 تولەم جۇيەسى وزگە تولەم جۇيەلەرىنە جاتقىزىلعان.
2021 جىلدىڭ قورىتىندىسى بويىنشا, ماڭىزدى تولەم قىزمەتتەرىن جەتكىزۋشىلەردىڭ رەەسترى دە جاڭارتىلدى. وزدەرىنىڭ ماڭىزدى تولەم قىزمەتتەرىن جەتكىزۋشىلەر مارتەبەسىن ەكى جەتكىزۋشى ساقتاپ قالدى: تولەم كارتوچكالارى نارىعىندا جانە كوررەسپوندەنتتىك شوتتار ارقىلى تولەمدەر مەن اۋدارىمدار نارىعىندا. ءبىر جەتكىزۋشى ەلەكتروندىق اقشا سەگمەنتىندە ماڭىزدى بولدى.
