جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ رەكتورلارى كەڭەسىنىڭ توراعاسى, «ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى» كەاق باسقارما توراعاسى – رەكتور ەرلان سىدىقوۆ «جاڭا قازاقستان» تۇجىرىمداماسى اياسىندا جوعارى ءبىلىم بەرۋدى جاڭعىرتۋدىڭ باسىم مىندەتتەرىنە نازار اۋداردى. اكادەميك ۋنيۆەرسيتەتتىك ءبىلىمدى قايتا قاراستىرىپ, ەل پرەزيدەنتىنىڭ جوعارى ءبىلىم بەرۋ سالاسىن دامىتۋ جونىندە بەرگەن ناقتى تاپسىرمالارىن ىسكە اسىرۋ بويىنشا شارالار كەشەنىن ۇسىندى. اتاپ ايتقاندا, اكادەميك جوعارى وقۋ ورىندارىنىڭ وندىرىسپەن ءوزارا ءىس-قيمىلىن كۇشەيتۋ, ءبىلىم بەرۋ باعدارلامالارىن جاقسارتۋ, جوعارى وقۋ ورىندارىن الەمدىك قاۋىمداستىق كوشباسشىلارىمەن ينتەگراتسيالاۋ بويىنشا باسىم شارالار قابىلداۋدىڭ ماڭىزىن اتاپ ءوتتى.
«ستۋدەنتتەردى وندىرىستىك تاجىريبەگە قابىلدايتىن ۇيىمداردىڭ, كاسىپورىنداردىڭ, مەكەمەلەردىڭ ۇلتتىق ءتىزىلىمىن قۇرۋدى ۇسىنامىن. بۇل رەتتە تاجىريبە زاماناۋي تەحنولوگيالىق جەلىلەرى مەن زاماناۋي تەحنولوگيالىق يننوۆاتسيالارى بار جەردە وتكىزىلۋى ءتيىس. وندىرىستىك تاجىريبەنىڭ ۋاقىتىن كەم دەگەندە ەكى ەسەگە ارتتىرىپ, وعان جوعارى وقۋ ورىندارىنىڭ جەتەكشى پەداگوگتەرى مەن عىلىمي قىزمەتكەرلەرىن عانا باسشى رەتىندە بەكىتۋ كەرەك», دەدى رەكتورلار كەڭەسىنىڭ توراعاسى.
وتىرىسقا قاتىسۋشىلار بەلسەندى قوعام قايراتكەرلەرىن تارتا وتىرىپ, ۋنيۆەرسيتەتتەردە قوعامدىق سەنىمنىڭ اكادەميالىق كەڭەستەرىن قۇرۋ ماسەلەسىن تالقىلادى.
ەۇۋ رەكتورى جوعارى وقۋ ورىندارىنىڭ عىلىمي-ساراپتامالىق الەۋەتىن پايدالانۋدىڭ ماڭىزدىلىعىن ايتا كەلىپ, قوعامدىق پىكىردى زەرتتەۋ ورتالىقتارىن اشۋدى ۇسىندى. رەبرەندينگ اياسىندا قازاقستان حالقى اسسامبلەياسى كافەدرالارىن وڭىرلىك جانە ەتنو-مادەني دامۋ پروبلەمالارىن زەرتتەيتىن عىلىمي-اناليتيكالىق ورتالىقتارعا وزگەرتۋ تۋرالى يدەيانى جاريا ەتتى.
سونداي-اق ول كەيبىر وڭىرلىك جوعارى وقۋ ورىندارىنا ۇلتتىق ۋنيۆەرسيتەت مارتەبەسىن بەرۋ ماسەلەسىنە دە توقتالدى. «بىزدە وسى مارتەبەگە لايىقتى ۋنيۆەرسيتەتتەر بارشىلىق. بۇل وڭىرلەردە جوعارى ءبىلىم بەرۋدىڭ جاڭا لوكوموتيۆتەرىن قالىپتاستىرۋعا ۇلكەن سەرپىن بەرەدى», دەدى رەكتورلار كەڭەسىنىڭ توراعاسى.
ەلىمىزدىڭ جوعارى وقۋ ورىندارىنداعى ستۋدەنتتىك ءومىردىڭ ءىس-شارالار كەشەنىن جاڭارتۋ, اتاپ ايتقاندا, ستۋدەنتتىك ءىس-شارالار كۇنتىزبەسىن كەڭەيتۋ ۇسىنىلدى. ماسەلەن, 5 قىركۇيەك – بەلگىلى عالىم, ساياساتكەر, اعارتۋشى احمەت بايتۇرسىنوۆتىڭ تۋعان كۇنىن «ستۋدەنت جاستار كۇنى» دەپ بەلگىلەۋ قاجەتتىگى ايتىلدى.
عالىمدار گۋمانيتارلىق جانە الەۋمەتتىك ماماندىقتار ءۇشىن عانا بولعان «رۋحاني جاڭعىرۋ» باعدارلاماسى بويىنشا «100 جاڭا وقۋلىق» جوباسىن تەحنيكالىق, جاراتىلىستانۋ عىلىمدارى جانە مەديتسينالىق ماماندىقتار بويىنشا جالعاستىرۋ ماسەلەسىن قوزعادى.
وتىرىس بارىسىندا بەلگىلى ماماندار, عالىمدار, سپورتشىلار مەن ونەر قايراتكەرلەرى ءۇشىن بىلىكتىلىك كۋرستارىن وتكىزۋ ءۇشىن «تالىمگەر» ۇلتتىق باعدارلاماسىن قالىپتاستىرۋ تۋرالى ۇسىنىس جاسالدى.
قازاقستاندىق ءبىلىم بەرۋدى جانە وتاندىق جوعارى وقۋ ورىندارىن دامىتۋعا قاتىستى م.قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ رەكتورى ەرلان شۋلانوۆ ايتتى. ونىڭ ايتۋىنشا, ءبىلىم بەرۋ سالاسىنا جاھاندانۋ جانە جەدەل تسيفرلاندىرۋ اسەر ەتەدى. سپيكەر قازاقستاندىق ءبىلىم بەرۋ نارىعىندا جاڭا شەتەلدىك ويىنشىلاردىڭ پايدا بولۋى ەلىمىزدىڭ جوعارى وقۋ ورىندارىن ترانسفورماتسيالاۋ تسيكلىن جانە جوعارى وقۋ ورىندارى اراسىنداعى باسەكەلەستىكتى جەدەلدەتەتىنىن اتاپ ءوتتى.
سافي وتەباەۆ اتىنداعى اتىراۋ مۇناي-گاز ۋنيۆەرسيتەتىنىڭ رەكتورى گۇلزادا شاكۋليكوۆا شەتەلدىك جوعارى وقۋ ورىندارىمەن ىنتىماقتاستىقتى دامىتۋدىڭ جانە ءبىلىم ترانسفەرتى ءۇشىن فيليالدار اشۋدىڭ ماڭىزدىلىعىنا توقتالدى.
رەكتورلار كەڭەسىنىڭ وتىرىسىندا ۇعا اكادەميگى, Satbayev University (ق.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى) بۇرىنعى رەكتورى, اتى اڭىزعا اينالعان «دوس-مۇقاسان» ءانسامبلىنىڭ نەگىزىن قالاۋشى, كورنەكتى عالىم دوسىم سۇلەەۆكە «قازاقستاننىڭ قۇرمەتتى رەكتورى» اتاعىن بەرۋ تۋرالى شەشىم ءبىراۋىزدان قابىلداندى.
سونداي-اق وتىرىس اياسىندا كورنەكتى تۇلعانىڭ ءومىرى تۋرالى «ونەگەلى ءومىر» سەرياسىنداعى فيلم مەن كىتاپتىڭ تۇساۋكەسەرى ءوتتى.
ءىس-شارا سوڭىندا ەۇۋ ستۋدەنتتەرىنە د.سۇلەەۆ, م.مولدابەكوۆ, ا.ەلىباەۆ جانە س.بايجانوۆ اتىنداعى اتاۋلى ستيپەنديالار تابىستالدى.
