تۇركى اكادەمياسىنىڭ جاڭا عيماراتىندا وتكەن تاعىلىمدى باسقوسۋعا حالىقارالىق تۇركى اكادەمياسىنىڭ پرەزيدەنتى دارحان قىدىرالى, قىرعىز رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى داستان ديۋشەكەەۆ, وزبەكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى سايديكرام نيازحودجاەۆ, تۇرىكمەنستاننىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى باتىر رەدجەپوۆ, ماجارستاننىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى وتتو يۆان رونا, موڭعوليانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى دورجين ءبايارحۇۇ, تاجىكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى حايرۋللو يبودزودا, تۇركيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ۋفۋك ەكيدجي, ازەربايجاننىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى اعالار اتاموعلانوۆ, قازاقستان پارلامەنتى ءماجىلىسىنىڭ دەپۋتاتتارى, بىرقاتار باق باسشىلارى, ۇلتتىق مادەني ورتالىق جەتەكشىلەرى, زيالى قاۋىم وكىلدەرى قاتىستى.
سالتاناتتى باسقوسۋعا جينالعاندار تۇركى مۋزەيىمەن تانىسىپ, تاجىكستاننىڭ قازاقستانداعى ەلشىلىگى ۇيىمداستىرعان كورمەنى تاماشالادى. كورمەگە تاجىك حالقىنىڭ ۇلتتىق قولونەر بۇيىمدارى مەن ناۋرىز مەيرامىندا ۇسىنىلاتىن اس مازىرلەرى قويىلعان.
باسقوسۋدى جۇرگىزىپ وتىرعان اكادەميا باسشىسى دارحان قىدىرالى جاڭارۋ مەن جاڭعىرۋ مەيرامىندا بارىس جىلىنا جاڭا قازاقستان رەتىندە نىق قادام باسقانىمىزدى اتاپ ءوتىپ, مەملەكەت باسشىسىنىڭ بيىلعى جولداۋى تاريحي وزگەرىستەرگە جول اشاتىن ماڭىزدى جاڭالىق بولعانىن ايتتى.
قۇتتىقتاۋ ءسوز العان مەملەكەت جانە قوعام قايراتكەرى ءادىل احمەتوۆ جينالعانداردى جىل باسى – ءاز ناۋرىز مەيرامىمەن قۇتتىقتادى.
وسىدان كەيىن مارتەبەلى مەيماندار ۇلت ۇستازى ا.بايتۇرسىن ۇلىنىڭ تۋعانىنا 150 جىل تولۋىنا وراي تۇركى اكادەمياسى ازىرلەپ شىعارعان «احمەت بايتۇرسىن ۇلى جانە الاش» كىتابىنىڭ قازاق-ورىس جانە اعىلشىن تىلىندەگى نۇسقالارىنىڭ تۇساۋكەسەر راسىمىنە كۋا بولدى. ايتا كەتۋ كەرەك, اتالعان جيناققا احاڭنىڭ 50 جاسقا تولعان مەرەيتويىندا جاسالعان تاريحي باياندامالار مەن زامانداستارىنىڭ, ءىزباسارلارى مەن بۇگىنگى بۋىن زەرتتەۋشىلەرىنىڭ مازمۇندى ماقالالارى توپتاستىرىلعان. كىتاپتىڭ اعىلشىن تىلىندەگى باسىلىمى قازاقستاننىڭ چەحياداعى ەلشىلىگىمەن بىرلەسىپ دايىندالعان.
جاڭا باسىلىمداردى تانىستىرعان حالىقارالىق تۇركى اكادەمياسىنىڭ باسشىسى دارحان قىدىرالى بيىلعى جىل تۇركى الەمى ءۇشىن رەسمي تۇردە «احمەت بايتۇرسىن ۇلى جىلى» دەپ جاريالاناتىنىن اتاپ ءوتتى.
ءوز كەزەگىندە قۇتتىقتاۋ ءسوز سويلەگەن توتەنشە جانە وكىلەتتى ەلشىلەر سالتاناتتى باسقوسۋدى ۇيىمداستىرۋشىلارعا ريزاشىلىقتارىن ءبىلدىرىپ, ناۋرىز مەيرامىنا وراي ىزگى تىلەكتەرىن جەتكىزدى.
بۇدان ءارى قاتىسۋشىلار تۇركى الەمىندە ەجەلدەن ناۋرىز مەيرامىن اتاپ ءوتۋ سالتىنا ساي توسكە بالعا سوعىپ, جىل باسىن قارسى الۋ ءراسىمىن جاسادى. تۇركى اكادەمياسى بۇل ىرىمدى جىل سايىن ورىنداپ, يگى داستۇرگە اينالدىرىپ كەلەدى.
مەرەكەلىك ءىس-شارا مەيماندارى تۇركى اكادەمياسى ارنايى جاساقتاعان كيىز ۇيگە كىرىپ, ۇلىستىڭ ۇلى كۇنىنە وراي دايىندالعان داستارقاننان ءدام تاتتى. اتاپ ءوتۋ كەرەك, تاعىلىمدى ءىس-شاراعا قاتىسىپ جاتقان ءاربىر ەلشىلىك داستارقانعا وزدەرىنىڭ ۇلتتىق تاعامدارىن اكەلگەن. اكادەميا باسشىسى مارتەبەلى مەيمانداردى كيىز ءۇيدىڭ قۇرامىمەن جانە اشەكەيلەرىمەن تانىستىردى.
قاتىسۋشىلارعا تۇركى اكادەمياسىنىڭ ارنايى سىيلىقتارى تارتۋ ەتىلدى.
