«الدىمەن ەكونوميكا, سوسىن ساياسات» دەگەن قاعيدا قوعامدىق جۇيەنى دەموكراتيالاندىرۋعا الىپ كەلەدى, بۇل فاكتور ەل مەن جەردىڭ, مەملەكەتتىڭ بايلىعىن حالىققا قولجەتىمدى بولۋىنا جول اشادى دەپ ۇمىتتەندىك. بىراق ءۇمىت اقتالمادى: قوعام بايلار مەن كەدەيلەر دەپ اتالاتىن ەكى جىككە ءبولىندى. بۇل فاكتور الەۋمەتتىك ادىلەتسىزدىك پەن تەڭسىزدىكتى تۋدىرىپ قانا قويماي, ەكونوميكانىڭ تۇراقتى دامۋىن تەجەدى.
مەملەكەت باسشىسى جاڭا قازاقستاننىڭ قۇرىلىسىن ونىڭ ساياسي نەگىزىن قايتا قۇرۋدان باستاۋعا نيەتتەنىپ وتىر. بىرىنشىدەن, سۋپەرپرەزيدەنتتىك باسقارۋ تۇرىنەن كۇشتى پارلامەنتى بار پرەزيدەنتتىك رەسپۋبليكاعا ءوتىپ جاتقانىمىزدى اتاپ وتكەن ءجون. بۇل بيلىك ينستيتۋتى مەن ەلدىڭ تۇراقتى دامۋى اراسىنداعى وڭتايلى تەڭگەرىمدى قالىپتاستىرادى. مۇنداي ساياسي جۇيە قازاقستاندا جەكە باسىنا تابىنۋشىلىقا, فاۆوريتيزم مەن بيلىكتىڭ ءبىر قولعا شوعىرلانۋىنا جول بەرمەيدى دەپ ويلايمىن.
ەندى ءماجىلىس دەپۋتاتتارى جارتىلاي ماجوريتارلىق نەگىزدە سايلاۋشىلاردىڭ تىكەلەي داۋىس بەرۋى ارقىلى سايلاناتىن بولادى. پارتيالىق ءتىزىم بويىنشا دەپۋتاتتاردى ۇسىنۋعا كەلەتىن بولساق, بۇل جەردە دە پروگرەسسيۆتى دەموكراتيالىق وزگەرىستەرگە باسىمدىق بەرىلمەك. ناتيجەسىندە, ساياسي پارتيالاردى تىركەۋ ايتارلىقتاي جەڭىلدەتىلىپ, پارتيانىڭ سايلاۋداعى جەڭىسى تەك باسەكەمەن انىقتالادى.
مەملەكەت باسشىسىنىڭ پارتيادان شىعۋ تۋرالى شەشىمىن دۇرىس دەپ قابىلدادىم. ەندىگى جەردە بۇل فاكتور پارتيالىق جۇيەنى قالىپتاستىرۋدا اشىق باسەكەلەستىككە كەپىلدىك بەرەدى. اكىمدەر مەن ولاردىڭ ورىنباسارلارىنىڭ پارتيا فيليالدارىندا قىزمەت اتقارۋىنا تىيىم سالۋدى زاڭمەن بەكىتۋ ءپرينتسيپتى ماڭىزدى دەپ سانايمىن. سەنات جۇمىسىن ىشتەي بىلەتىن سەناتور رەتىندە مەن ءۇشىن مەملەكەت باسشىسىنىڭ قوس پالاتالى پارلامەنتتى نەلىكتەن قولداعانى تۇسىنىكتى.
سەبەبى پارلامەنتتىڭ جۇمىس ناتيجەسى دەپۋتاتتاردىڭ سانىندا ەمەس, ولاردىڭ جۇمىسىنىڭ ساپاسىمەن ولشەنەدى. اتقارۋشى بيلىك جۇمىسىنداعى باستى ماسەلە ەل بيۋدجەتىندەگى قاراجاتتىڭ جەتىسپەۋشىلىگىندە ەمەس, ونىڭ ءتيىمدى جۇمسالۋىمەن انىقتالادى. قاراپايىم تىلمەن ايتقاندا, ءاربىر دەپۋتات ۇكىمەت جۇمىسىنىڭ وسال تۇستارىن ايتىپ, ەكونوميكانى ءتيىمدى باسقارۋدى تالاپ ەتسە, ءومىرىمىز الدەقايدا جاقسارار ەدى.
مەنىڭ ويىمشا, پرەزيدەنت ءدال وسىنداي قوعامعا قاجەتتى ىقپالدى پارلامەنتتىڭ قالىپتاسۋىنا قاجەتتى ىرگەتاس جاساپ جاتىر. قاڭتار قاسىرەتى ساياسي تۇراقتىلىقتىڭ, مەملەكەتتىڭ بىرتۇتاستىلىعىنىڭ قادىرىن جاڭا سيپاتتا ۇقتىرىپ كەتتى. كورشى ەلدەردەگى ساياسي تۇراقسىزدىق, سانكتسيالار سوعىسى جەكەلەگەن ەلدەردە عانا ەمەس, جالپى جەر شارىنداعى ساياسي تۇراقتىلىققا قاتەر ءتوندىرىپ تۇر. بىزگە قازىر مەملەكەتتىلىگىمىزدىڭ بىرتۇتاستىعىن كوزىمىزدىڭ قاراشىعىنداي قورعايتىن ءسات كەلدى. سوندىقتان مەملەكەتىمىزدى, قورعانىس قابىلەتىمىزدى نىعايتۋىمىز ءۇشىن حالىق قولدايتىن مىقتى بيلىك كەرەك.
ءيا, بۇگىندە مەملەكەت باسشىسى ەلىمىزدىڭ ەكونوميكالىق-الەۋمەتتىك دامۋىنىڭ ناقتى باعدارلاماسىن ۇسىندى. بىراق ونى ازاماتتىق قوعامدى جاڭعىرتۋسىز تولىق جۇزەگە اسىرۋ مۇمكىن ەمەس. دامىعان ەلدەردىڭ ءاربىر ازاماتى دەموكراتيالىق دامۋ ينستيتۋتتارى ارقىلى مەملەكەتتىك باسقارۋعا اتسالىسادى. قازىر مەملەكەت باسشىسى قاسىم-جومارت توقاەۆ ءۇشىن حالىقتىڭ قولداۋى مەن سەنىمى ماڭىزدى ەكەنىن ديۆان باتىرلارى دەڭگەيىندە ەمەس, ساياسي بەلسەندىلىگىمىز ارقىلى قولداۋدىڭ كەزى كەلگەنىن ءاربىرىمىز ءتۇسىنۋىمىز كەرەك. حالىقتىڭ سەنىمى ەندى باستالعان وزگەرىستەردىڭ باياندى بولۋى ءۇشىن, ىشكى-سىرتقى كۇشتەردىڭ كەدەرگى بولماۋى ءۇشىن قاجەت ەكەنىن قاڭتار وقيعاسى كورسەتتى.
اقىلبەك كۇرىشباەۆ,
پارلامەنت سەناتىنىڭ دەپۋتاتى
