اسا قۇرمەتتى
قاسىم-جومارت كەمەل ۇلى!
كيەلى ۇلىتاۋ-جەزقازعان ايماعىنىڭ جۇرتى ورنى ايرىقشا قۋانىشقا كەنەلىپ وتىر. قالا-اۋدان مەكەمەلەرى مەن مادەني ورىندارىنا كوپشىلىك جينالىپ, ءسىزدىڭ جولداۋىڭىزدى تىڭدادى. كەشە عانا بۇلتسىز كۇنى كۇركىرەگەن كۇندەي بوپ, ەل ءىشىن دۇربەلەڭگە سالعان, بەيبىت شەرۋدى بەرەكە قاشىرعان قاندى وقيعاعا اينالدىرعان لاڭكەستەردىڭ قاستاندىعى مەن ونىڭ ساباقتارى جايلى ايتقان ويلارىڭىز ءبىزدى ەرەكشە تولعاندىردى. ءوزىڭىز ايتقانداي, سول كۇندەردە وتىز جىلدىق تاريحى بار تاۋەلسىزدىگىمىزدىڭ ورنىن سيپاپ قالارداي سىن ساعات تۋدى.
«قاسىرەتتى قاڭتار» اتانعان سول دۇربەلەڭدى باسۋدا ءسىز تاباندىلىق, قايسارلىق, شەشىمدى قيمىل تانىتتىڭىز. قانداي قيىندىق بولسا دا ءسىز ءوزىڭىزدى حالىقپەن بىرگە بولاتىن مەملەكەت باسشىسى رەتىندە كورسەتتىڭىز. وسى ادالدىعىڭىز بەن ار الدىنداعى ۇستانىمىڭىز ءۇشىن ءبىز ءسىزدى ەرەكشە قۇرمەتتەيمىز.
ەل مەن ەل تىزگىنىن ۇستاعان ءسىزدىڭ الدىڭىزدا كۇردەلى دە قيىن مىندەتتەر تۇرعانىن سەزەمىز. ول – الەم جۇرتىن الاڭعا سالىپ وتىرعان رەسەي-ۋكراينا شيەلەنىسى, جاھاندى جانالقىمنان العان ىندەت سالدارى, سانكتسيا زارداپتارى, ىشتەن شالۋدى كوكسەگەن دۇشپاندار ارەكەتى قابات كەلىپ تۇرعان مىنا كۇردەلى ۋاقىتتىڭ سىن-قاتەرىنەن قازاقستان مەملەكەتىن امان-ساۋ الىپ شىعۋ مىندەتى. ءبىز ءسىزدىڭ ومىرلىك تاجىريبەڭىز بەن بىلىمىڭىزگە, تاباندىلىعىڭىز بەن ۇلتقا دەگەن ادالدىعىڭىزعا بەك سەنەمىز. سونداي-اق بۇل تىعىرىقتان دا جول تاۋىپ ەلدى امان الىپ شىعۋعا كۇش-قۋاتىڭىزدىڭ جەتەتىنىنە زور سەنىممەن قارايمىز. جولداۋدا ايتقان ويلارىڭىز بەن ەل الەۋەتىن ارتتىرۋعا, ساياسي جاڭعىرۋعا قاتىستى بەرگەن تاپسىرمالارىڭىز – جۇرت اسىعا كۇتكەن شەشىمدەر.
قۇرمەتتى قاسىم-جومارت كەمەل ۇلى! ءسىز مەملەكەت باسشىسى رەتىندە ۇلىتاۋ-جەزقازعان جەرىنە ەكى مارتە جۇمىس ساپارىمەن كەلدىڭىز. سول ەكى ساپارىڭىز دا ۇلىتاۋ ايماعى جۇرتىنا سونى سەرپىلىس اكەلدى. « ۇلىتاۋ-2019» حالىقارالىق فورۋمى مەن «جوشى حان» تاريحي-مادەني كەشەنى – سونىڭ ناقتى دالەلى. ۇلىتاۋ جەرىندە وتكەن حالىقارالىق فورۋمدا ءسىز: « ۇلىتاۋ توپىراعى – الىپ تۇلعالاردىڭ رۋحى توعىسقان جەر», دەپ ۇلت ۇياسى اتانعان جەرگە, ونىڭ تاريحي ورنىنا زور باعا بەرگەن بولاتىنسىز. جولداۋىڭىزداعى « ۇلىتاۋ وبلىسى اشىلىپ, ونىڭ ورتالىعى جەزقازعان قالاسى بولادى» دەگەن ءسوزىڭىز ۇلىتاۋ توپىراعىندا توعىسقان الىپ تاريحي تۇلعالار رۋحىنا جاساعان پەرزەنتتىك, ازاماتتىق تاعزىمىڭىز بولدى.
شيرەك عاسىرعا جۋىق ۋاقىت ىشىندە ءوندىرىستى قالا جەزقازعاننىڭ دا, ۇلىتاۋ اۋدانىنىڭ دا ءوڭى كەتىپ, وزەگى تالا باستاپ ەدى. ەندى بۇل ايماق قايتا تۇلەۋ كەزەڭىن باستايدى. سارىارقانىڭ وسى پۇشپاعىن جايلاعان قالىڭ جۇرت, ءوندىرىس ەڭبەككەرلەرى, ارداگەرلەر مەن جاستار سىزگە وسى شەشىمىڭىز ءۇشىن شىن جۇرەكتەن راقمەتىن ايتىپ, العىسىن جەتكىزەدى.
ءسۇيىنشى حابار جەر ءجانناتى جەتىسۋ حالقىن دا, ۇلى اباي ەلىن دە, قاسيەتتى قاپشاعاي جۇرتىن دا, قايراتكەر اعا د.ا.قوناەۆ ەسىمىن قادىر تۇتقان ەلدى دە ەرەكشە قۋانتتى. ءبىز بۇل قۋانىشتى كۇندى جاڭا قازاقستاننىڭ جاقسى كۇندەرىنىڭ باستاۋى دەپ سانايمىز.
ەلدىڭ بۇگىنى مەن بولاشاعى ءۇشىن قام جاساعان ىسىڭىزگە ساتتىلىك تىلەيمىز.
ءبىز سىزبەن بىرگەمىز, جاڭا باستامالارىڭىزدىڭ بەل ورتاسىندا بولامىز.
زور العىسپەن,
«Kazakhmys Holding (كازاحمىس حولدينگ)» جشس ەڭبەككەرلەرى جانە ۇلىتاۋ-جەزقازعان ايماعىنىڭ جۇرتشىلىعى
(11 مىڭنان استام ادام قول قويعان)
