بارلىق تۋىنداعان ماسەلەلەردى جەدەل جانە ءىزىن سۋىتپاي شەشىپ وتىرۋى ءتيىس ورتالىقتىڭ جۇمىسىنا وبلىس اكىمىنىڭ ورىنباسارى ەرمەك الپىسوۆ جاۋاپ بەرەدى.
ءوڭىر باسشىسى جاڭا قۇرىلعان جەدەل شتابتىڭ الدىندا جۇمىس ورىندارىن ساقتاۋ, ازاماتتارىمىزدىڭ ءال-اۋقاتىن ارتتىرۋ سىندى اسا ماڭىزدى مىندەتتەر تۇرعانىن اتاپ ءوتتى.
– ءبىزدىڭ كوپتەگەن كاسىپورنىمىز سىرتقى نارىقپەن تىعىز بايلانىسقان. وڭىردە جەدەل شتاب قۇردىق, وتكەن اپتادان باستاپ ول جەدەل جۇمىس ىستەپ كەلەدى. ءبىز ءاربىر ەكسپورتتاۋشى كاسىپورىنمەن, بارلىق ءىرى جۇمىس بەرۋشىلەرمەن كۇندەلىكتى بايلانىستا بولامىز. جاعدايدى مونيتورينگىلەۋ, ەكسپورتتىق ءونىمدى جونەلتۋگە جانە ەڭبەك ۇجىمدارىنداعى جاعدايعا بايلانىستى بارلىق ماسەلەنى شەشۋىمىز قاجەت. بۇل – الەمدەگى قالىپتاسقان جاعدايعا بايلانىستى ماڭىزدى ماسەلە. ەڭ باستىسى – جۇمىس ورىندارىن ساقتاۋ, ازاماتتارىمىزدىڭ ءال-اۋقاتىن ارتتىرۋ, – دەپ مالىمدەدى جەڭىس قاسىمبەك.
سونىمەن بىرگە ءوڭىر باسشىسى قالالار مەن اۋدانداردىڭ اكىمدەرىنە بارلىق ونەركاسىپتىك كاسىپورىندارمەن تىعىز بايلانىستا جۇمىس ىستەۋدى سونداي-اق ىشكى جانە سىرتقى ساۋدا كولەمدەرىنە تۇراقتى مونيتورينگ جۇرگىزىپ وتىرۋ قاجەتتىگىن تاپسىردى.
بۇدان بولەك ول كومپانيالاردىڭ ينۆەستيتسيالىق بەلسەندىلىگىنە ەرەكشە نازار اۋدارىلاتىنىن تىلگە تيەك ەتتى.
– بيىل ينۆەستيتسيالار كولەمى 850 ملرد تەڭگە دەڭگەيىندە جوسپارلانىپ, 2021 جىلدىڭ ناتيجەسىنە قاراعاندا 40 ملرد تەڭگەگە وسەدى. بۇل مىندەتتى ءبىز ورىنداۋىمىز كەرەك, – دەپ اتاپ ءوتتى وبلىس اكىمى.
جيىندا وبلىستىق ەكونوميكا باسقارماسىنىڭ باسشىسى ازامات مۇقانوۆ ءوڭىردىڭ ەكى ايداعى الەۋمەتتىك-ەكونوميكالىق دامۋ كورسەتكىشتەرى تۋرالى باياندادى. ول كەلتىرگەن مالىمەتتەرگە ساي, ونەركاسىپ ءونىمى 6,5% وسىممەن 760,3 ملرد تەڭگەگە ءوندىرىلىپتى. وڭدەۋ ونەركاسىبىندە جالپاق بولات پروكاتىن ءوندىرۋ – 17,6%-عا, بولات ءوندىرۋ – 7,8%-عا, شويىن ءوندىرۋ – 4,6%-عا, كالتسي كاربيدىن ءوندىرۋ 2,9%-عا ۇلعايعان.
مۇنداي ءوسىم اۋىل شارۋاشىلىعى سالاسىندا دا بايقالعان. مىسالى, جالپى ءونىم كولەمى 27,1 ملرد تەڭگەنى قۇراپتى. وبلىستا ەت جانە ءسۇت ءوندىرىسى ارتىپتى.
قۇرىلىس سالاسىندا الدىڭعى جىلدارداعى وڭ قارقىن ساقتالعان ەكەن. ەكى ايدا 92,6 مىڭ شارشى مەتر تۇرعىن ءۇي پايدالانۋعا بەرىلگەن. مۇنىڭ ءوزى 2021 جىلدىڭ سايكەس كەزەڭىمەن سالىستىرعاندا 0,4%-عا ارتىق.
الداعى ۋاقىتقا دەپ مەجەلەنگەن جوسپار دا اۋقىمدى. مىسالى, 2022 جىلعا وبلىستا ەكونوميكانىڭ 3,4% ءوسۋىن قامتاماسىز ەتۋ مىندەتى تۇر. ونەركاسىپتە 4,3 ترلن تەڭگە كولەمىنە قول جەتكىزە وتىرىپ, ەكى پايىزدىق ءوسىم بەلگىلەنگەن.
ۋاقىت تالابىنا ساي قۇرىلعان جەدەل شتاب ەكسپورتتاۋشى كاسىپورىندارمەن تىعىز قارىم-قاتىناستى ساقتاي وتىرىپ, جۇمىس ورىندارىنىڭ جابىلماۋىنا, تۇرعىنداردىڭ تۇرمىس كۇيىنىڭ تومەندەمەۋىنە يگى ىقپالىن تيگىزسە, ونى جەمىسىن بەرگەن ءساتتى جوبانىڭ ءبىرى دەپ سەنىمدى تۇردە اتاۋعا بولار ەدى.
قاراعاندى وبلىسى
