سۋرەتتە: «سالاماتتى ۇرپاق» مەكتەپكە دەيىنگى تاربيە مەن ءبىلىم بەرۋگە ارنالعان دامىتۋشى ويىندار ءتاسىلى جوبا-سىنىڭ قۇرالدارى.
فورۋمدى اشىپ ءسوز العان حالىقارالىق «قازاق ءتىلى» قوعامىنىڭ پرەزيدەنتى, پارلامەنتى ءماجىلىسىنىڭ دەپۋتاتى بەرىك ابدىعالي ۇلى الداعى ۋاقىتتا مەملەكەتتىك ءتىلدىڭ حالىقارالىق قاتىناس سالاسىنداعى ورنى مەن ءرولى, ءتىل مادەنيەتىنىڭ قالىپتاسۋى, قازاق ءتىلىنىڭ عىلىم ءتىلى رەتىندە دامۋى, مەملەكەتتىك ءتىلدىڭ قولدانىس اياسىن كەڭەيتۋگە قاتىستى جوسپار-جوبالار جاسالىپ جاتقانىنا توقتالا كەلىپ: «بۇگىنگى باسقوسۋ بارىسىندا جاستار ۇسىنىپ وتىرعان بىرنەشە جوبانى تالقىلاماقپىز, ماقسات – اتالعان جوبالار ءتيىمدى بولسا, ونىڭ ىسكە اسۋىنا كومەكتەسۋ, مۇمكىندىك بولسا قارجىلاي قولداۋ كورسەتۋ» دەدى.
العاشقى بولىپ تانىستىرىلعان قازاق ءتىلىن ۇيرەنۋشىلەرگە ارنالعان «Sözwar» سويلەسۋ كلۋبى» جوباسى تۋرالى قوعامنىڭ ۆيتسە-پرەزيدەنتى ماكسيم روجين اڭگىمەلەدى. استانالىق فيليالدىڭ Körneki جوباسى ەلىمىزدەگى كورنەكى جازۋلاردىڭ مەملەكەتتىك تىلدە قاتەسىز جازىلۋىنا باعىتتالىپ وتىر ەكەن. ودان كەيىن QAZAQ GRAMMAR قازاق مەكتەبى جوباسى تۋرالى تەحنيكالىق عىلىمدار ماگيسترى, «بولاشاق» باعدارلاماسىنىڭ تۇلەگى, وڭتۇستىك كاليفورنيا ۋنيۆەرسيتەتى (اقش) تۇلەگى ايگۇل ساعىمباي ايتىپ بەردى. جوبانىڭ ەرەكشەلىگى – مەكتەپ قىزمەتىنەن تۇسكەن تابىستى مەملەكەتتىك ءتىلدى دامىتۋ شارالارىنا جۇمسايتىن تەتىك قاراستىرىلسا, اتالعان مەكتەپ ورتا ءبىلىم بەرۋ جۇيەسىندەگى بىرەگەي جاڭالىق بولماق, – دەيدى جوبا اۆتورى.
تاعى ءبىر جوبا «سويلە, ءتىلىم!» دەپ اتالىپتى. «بۇل جوبا ەلىمىزدىڭ وزگە ۇلت ازاماتتارىنىڭ مەملەكەتتىك ءتىلدى مەڭگەرۋىنە كومەكتەسەدى», دەيدى «التىن ۇرپاق/Golden Generation» قازاق جانە اعىلشىن تىلىندەگى حالىقارالىق توپتىق ءپان وليمپياداسى استانالىق گيمنازياسى ديرەكتورىنىڭ ورىنباسارى اجار قابدەنقىزى.
جيىندا سونىمەن قاتار, «سالاماتتى ۇرپاق» مەكتەپكە دەيىنگى تاربيە مەن ءبىلىم بەرۋگە ارنالعان دامىتۋشى ويىندار ءتاسىلى ەگجەي-تەگجەيلى تانىستىرىلدى. بۇل جوبانى كوپشىلىك تالقىسىنا ۇسىنعان نۇر-سۇلتان قالاسىنداعى №46 «سامال» ساناتوريالىق بالاباقشا مەڭگەرۋشىسى بالاۋسا قايىرعاليەۆانىڭ تانىستىرۋىنان تۇسىنگەنىمىز, جوبانىڭ نەگىزگى وزەگى – دامىتۋشى ويىندار مەكتەپكە دەيىنگى تاربيە مەن وقىتۋدىڭ ۇلگىلىك باعدارلاماسىندا قاراستىرىلعان «تانىم» ءبىلىم بەرۋ سالاسىنىڭ وقۋ قىزمەتى جانە «الەۋمەت» ءبىلىم بەرۋ سالانىڭ ەكولوگيالىق نەگىزدەرى بويىنشا جاسالىپتى. «بۇل جوبانىڭ مىندەتى: تابيعات قۇبىلىستارىن باقىلاۋ داعدىلارىن قالىپتاستىرۋ جانە تۋعان ولكەنىڭ وسىمدىكتەرى, جەمىستەرى, اعاشتارى, كوكونىس تۇرلەرى, ولاردى تانىپ-ءبىلۋ ۇعىمدارىن ءتۇسىندىرۋ», دەيدى بالاۋسا تولەۋعاليقىزى.
كەلەسى جوبانى تانىستىرعان – «بولاشاق» باعدارلاماسىنىڭ تۇلەگى, م.نارىكباەۆ اتىنداعى زاڭ اكادەمياسىنىڭ باسقارما توراعاسىنىڭ ورىنباسارى اينۇر باعداتقىزى ونلاين كىتاپ ساۋداسىنداعى قازاق تىلىندەگى تۋىندىلاردىڭ ازدىعىن ماسەلە ەتىپ كوتەرسە, ورتا ءبىلىم بەرۋ سالاسىنىڭ مامانى اياتجان احمەتجان قازاق ءتىلىن وقىتۋ تۇيتكىلدەرى تۋرالى ءسوز قوزعادى.
ودان كەيىن اقش-تىڭ سولتۇستىك يۋتا ۋنيۆەرسيتەتىنىڭ ماگيسترانتى ءنازيرا بايىربەك شەت مەملەكەتتە قازاق ءتىلى كۋرستارىن ۇيىمداستىرۋ توڭىرەگىندە وي ايتسا, قوعام بەلسەندىسى كاسىپكەر ماقسۇتبەك ايتماعامبەت قازاق ءتىلىنىڭ حالىقارالىق ارەناداعى مارتەبەسى جايىندا ءسوز ەتتى. ءوز كەزەگىندە, بەلگىلى پسيحولوگ ليمانا قويشيەۆا ءتىل مادەنيەتىنىڭ ۇرپاق تاربيەسىندەگى الاتىن ورنى تۋرالى ويىمەن ءبولىستى.
جيىندى قورىتىندىلاعان حالىقارالىق «قازاق ءتىلى» قوعامىنىڭ پرەزيدەنتى بەرىك ابدىعالي ۇلى قوعام ماقساتى – مەملەكەتتىك ءتىلدىڭ عىلىم, مادەنيەت, ەكونوميكا, حالىقارالىق قاتىناس ءتىلى رەتىندە قولدانىلۋىنا ىقپال ەتۋ ەكەنىن جەتكىزىپ, بۇگىنگى شارانى ۇيىمداستىرعان حالىقارالىق «قازاق ءتىلى» قوعامىنىڭ ەلورداداعى فيليالىن باسقارۋشى قوعام بەلسەندىسى, جۋرناليست-پەداگوگ قانات اۋەسبايدى كوپشىلىككە تانىستىردى.
