اۋىل سپورتزالى اتشاپتىرىم جەردەن كوزگە ىلىگەدى ەكەن. تۇرعىنداردىڭ ايتۋىنا قاراعاندا, ەڭسەلى عيماراتتىڭ ءىشى ءبىر بوساعان ەمەس. تاڭ سارىدەن جۇزدەن اسا ادام كەلىپ ارقيلى جاتتىعۋ وتكىزەدى. داتكە قۋاتى, كوڭىلىڭ قالاعان سپورتپەن اينالىسۋعا قاجەتتى قۇرال-جابدىقتاردىڭ ءبارى بار. فۋتبول, باسكەتبول جانە ۆولەيبول الاڭدارى مۇنتازداي تاپ-تازا, جاڭا زاماننىڭ تالابىنا ساي جاساقتالعان.
– سپورتزالدا ۇلتتىق سپورت تۇرلەرىمەن اينالىسۋعا بار مۇمكىندىك تۋدىرىلىپ وتىر, – دەيدى اۋىل وكرۋگىنىڭ جاستار ءىسى جونىندەگى مامانى يبراگيم ىباەۆ, – بالالارمەن ارنايى جاتتىقتىرۋشى جۇمىس ىستەيدى. جاستار اراسىندا ۇلتتىق سپورت تۇرلەرىن مەڭگەرۋگە دەگەن ىقىلاس تا زور. ۇزبەي دايىندالعاننان كەيىن اۋداندىق, وبلىستىق جارىستاردا جۇلدەسىز قالعان كەزىمىز جوق.
وسىدان ءۇش جىل بۇرىن شاعىن ورتالىق اشىلىپتى. ءبىر كەزدە قاراۋسىز قالعان عيمارات ەكەن. قازىر قۇرقىلتايدىڭ ۇياسىنداي جىپ-جىلى, باقىتتى بالالىق مەكەنى. وسى ءبىر مىسالدان-اق كەيبىر اۋىلداردا بوس تۇرعان عيماراتتاردى يگىلىككە اينالدىرۋعا بولاتىندىعىنا كوزىمىز جەتتى. تەك ەل قامىن جەگەن نيەت بولسىن دەڭىز. ايتپەسە, وڭىردەگى كەز كەلگەن ەلدى مەكەندە زامانىندا كلۋب ءۇيى, سپورتزالى بولعان عيماراتتاردىڭ قازىر ەشكىمگە كەرەك بولماي, بوسقا قاۋساپ جاتقاندىعىن كوز كورىپ ءجۇر. ال مۇنداعى بالالار ورتالىعىنداعى اتشاپتىرىم بولمەلەر, بالالاردىڭ ويىن جانە جاتىن ورىندارى تاپ-تۇيناقتاي. وزگە دە بارلىق جاعداي تۋعىزىلعان. ءتىپتى وبلىس ورتالىعىنداعى وسى تەكتەس مەكەمەلەردەن سىنىق سۇيەم كەمدىگى جوق.
– بالاباقشاعا 15 بالا كەلەدى. ءتالىم-تاربيە جۇمىستارى بارلىق تالاپقا ساي, بالالار ورتالىعىنىڭ تاربيەشىسى تايسا موداربيەۆا, ءبىر ايتا كەتەرلىگى, ۇلكەندەردەن كورگەن ونەگەسى بولار, كىشكەنتاي بالالار دا سپورت دەسە جانىپ تۇرادى.
وسىنداي ونەگەلى ءورىس قالىپتاسقان اۋىلدىڭ تىنىس-تىرشىلىگى كورگەن كوزدى قۋانتارلىق. جاقسى ىستەر جاراسىمدى قالىپپەن دامىپ جاتسا, تۇتاس ايماقتىڭ اجارى كىرىپ قالار ەدى-اۋ.
اقمولا وبلىسى,
ساندىقتاۋ اۋدانى
