اپپاراتتىق كەڭەستە ءوڭىر باسشىسى جەڭىس قاسىمبەك جاڭا ورىنباسارىن تانىستىردى. ەربول اليقۇلوۆ بۇل قىزمەتتە ابزال نۇكەنوۆتىڭ ورنىنا كەلدى, ول باسقا جۇمىسقا اۋىسۋىنا بايلانىستى قىزمەتىنەن بوساتىلعان.
«پرەزيدەنت اكىمشىلىگىنىڭ كەلىسىمى بويىنشا اليقۇلوۆ ەربول شىمكەنتباي ۇلى وبلىس اكىمىنىڭ ورىنباسارى بولىپ تاعايىندالدى. بۇل قىزمەتكە تاعايىندالعانعا دەيىن ول قر پرەزيدەنتى اكىمشىلىگىنىڭ مەملەكەتتىك ينسپەكتورى لاۋازىمىندا قاراعاندى وبلىسىن باسقاردى. ءوڭىردىڭ الەۋمەتتىك-ەكونوميكالىق دامۋ ماسەلەلەرىمەن جاقسى تانىس», دەدى وبلىس اكىمى.
ورىنباسار لاۋازىمىندا ەربول اليقۇلوۆ ءبىلىم بەرۋ, مادەنيەت, سپورت, جاستار ساياساتى, تىلدەردى دامىتۋ سالالارىنا جەتەكشىلىك ەتەتىن بولادى.
ەربول اليقۇلوۆ مەملەكەتتىك قىزمەتتە ءتۇرلى لاۋازىمدا قىزمەت اتقاردى. الماتىدا تۇركسىب جانە المالى اۋداندارى اكىمىنىڭ ورىنباسارى, جەتىسۋ اۋدانىنىڭ اكىمى بولعان. كەيىن الماتى قالاسى اكىمى اپپاراتىنىڭ باسشىسى, جۇمىسپەن قامتۋ جانە الەۋمەتتىك باعدارلامالار باسقارماسىن باسقاردى.
ەڭبەك جانە حالىقتى الەۋمەتتىك قورعاۋ مينيسترلىگىندە باسشىلىق قىزمەتتەردى اتقاردى. 2017 جىلعى ماۋسىمنان باستاپ قازىرگى ۋاقىتقا دەيىن قر پرەزيدەنتى اكىمشىلىگىنىڭ مەملەكەتتىك ينسپەكتورى بولىپ جۇمىس ىستەگەن.
