تۇركيا رەسپۋبليكاسىنىڭ ۆيتسە-پرەزيدەنتى فۋات وكتاي تۇركىستان قالاسىنا جۇمىس ساپارىمەن كەلدى. دەلەگاتسيا ق. ا. ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ ۇجىمىمەن كەزدەسۋ وتكىزدى.
جيىنعا تۇركىستان وبلىسىنىڭ اكىمى ومىرزاق شوكەەۆ, ق.ا.ياساۋي اتىنداعى حقتۋ وكىلەتتى كەڭەسىنىڭ توراعاسى, پروفەسسور مۋحيتتين شيمشەك, ۋنيۆەرسيتەت رەكتورى جانار تەمىربەكوۆا جانە وقىتۋشى-پروفەسسور قۇرامى مەن ستۋدەنتتەر قاتىستى.
تۇركيا رەسپۋبليكاسىنىڭ ۆيتسە-پرەزيدەنتى فۋات وكتاي قازاقستان رەسپۋبليكاسىنا رەسمي ساپارى اياسىندا مەملەكەت باسشىسى قاسىم-جومارت توقاەۆ جانە پرەمەر-مينيستر ءاليحان سمايىلوۆپەن كەزدەسكەنىن باياندادى.
ەكىجاقتى كەزدەسۋلەردىڭ باۋىرلاس ەلدەردىڭ ىنتىماقتاستىعىن جاڭا دەڭگەيگە كوتەرەتىنىن اتاپ ءوتتى. ءال-فارابي, ءجۇسىپ بالاساعۇن, قوجا احمەت ياساۋي سىندى عۇلامالار مۇراسىنىڭ وزەكتىلىگىن تىلگە تيەك ەتىپ, اباي قۇنانباي ۇلىنىڭ عىلىمعا ۇندەگەن تۋىندىسىنان ءۇزىندى وقىدى. كونتسەرتتىك باعدارلامادان كەيىن فۋات وكتاي قوناق ۋنيۆەرسيتەت اۋماعىنىڭ ماكەتىمەن تانىسىپ, «توراعالار اللەياسىنا» اعاش وتىرعىزدى.
سونىمەن بىرگە تۇركىستان قالاسىنداعى بىرقاتار مادەنيەت جانە رۋحانيات نىساندارىن ارالاپ, تۇركىستانداعى وزگەرىستەردى جوعارى باعالادى. وقۋ ورنىنىڭ وكىلەتتى كەڭەس توراعاسى, پروفەسسور مۋحيتتين شيمشەك قادىرمەندى قوناقتى ۋنيۆەرسيتەت قابىرعاسىندا مەيمان ەتۋ – وقۋ ورنى ءۇشىن ۇلكەن مارتەبە ەكەندىگىن اتاپ ءوتتى.
وقۋ ورداسىندا جۇزەگە اسىپ جاتقان ىرگەلى جۇمىستاردى باياندادى. ۋنيۆەرسيتەت رەكتورى جانار تەمىربەكوۆا جانە رەكتور وكىلى جەنگيز تومار ءسوز سويلەپ, فۋات وكتايعا ءبىلىم مەن عىلىمنىڭ دامۋىنا قوسقان ۇلەسى ءۇشىن «قۇرمەتتى پروفەسسور» اكادەميالىق اتاعى بەرىلگەنىن اتاپ ءوتىپ, مانتياسىن كيگىزىپ, قۇجاتىن تابىستادى.
