ىلە بۇل جاريالانىمعا مەملەكەت باسشىسى قاسىم-جومارت توقاەۆ نازار اۋدارىپ, قىزىلوردا وبلىسىنىڭ اكىمىنە ءتيىستى تاپسىرما بەرگەننەن كەيىن سەكسەۋىلدىك اتا-انالاردى كوپتەن الاڭداتىپ كەلگەن كوكەيكەستى ماسەلە بىردەن وڭ شەشىمىن تاۋىپ, وبلىستىق بيۋدجەت قاراجات ەسەبىنەن اتالمىش كەنتتە 300 ورىندىق جاڭا مەكتەپ سالىندى.
ال وسى پروبلەمانى كەشىكتىرمەي شەشۋ قاجەتتىگى تۋرالى التىنشى شاقىرىلىمداعى پارلامەنت دەپۋتاتتارى ۇكىمەتكە, ءبىلىم جانە عىلىم مينيسترلىگى مەن قىزىلوردا وبلىسىنىڭ اكىمدىگىنە تالاي رەت دەپۋتاتتىق ساۋال جولداپ, حات جازعانىمەن, ولارعا ورتالىق جانە جەرگىلىكتى مەملەكەتتىك ورگانداردىڭ ءبىر-بىرىنە سىلتەگەن سىرعىتپا جاۋاپتارىن الىپ, جىگەرلەرى قۇم بولعان ەكەن. ەلىمىزدىڭ باس گازەتىنىڭ سىني جاريالانىمى پرەزيدەنتتىڭ كوزىنە تۇسپەسە, سەكسەۋىلدىكتەردىڭ جانايقايى وبلىستىق جانە ورتالىق مەملەكەتتىك ورگاندارداعى شەنەۋنىكتەردىڭ حالىق ۇنىنە ابدەن تاسكەرەڭ بولىپ قالعان قۇلاقتارىنا جەتۋى نەعايبىل ەدى.
وكىنىشكە قاراي, ولاردىڭ قۇلاقتارىنىڭ «مۇكىسى» مەملەكەت باسشىسى 2019 جىلعى 1 قىركۇيەكتە جاريالاعان «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» جولداۋىندا «حالىق ۇنىنە قۇلاق اساتىن مەملەكەت» تۇجىرىمداماسىن ۇسىنعاننان كەيىن دە اشىلىپ كەتە قويعانى شامالى سەكىلدى. بۇعان ءماجىلىس دەپۋتاتى مەيرامبەك تولەپبەرگەننىڭ بىلتىرعى 29 جەلتوقساندا ۆيتسە-پرەمەر ەرالى توعجانوۆقا جولداعان دەپۋتاتتىق ساۋالى ايعاق.
«2021 جىلعى 2 قاراشادا پارلامەنت ءماجىلىسىنىڭ دەپۋتاتتارى ءسىزدىڭ اتىڭىزعا دەپۋتاتتىق ساۋال جولداعان بولاتىنبىز. وندا جالپى ءبىلىم بەرەتىن قازاق مەكتەپتەرىنىڭ 4-سىنىپ وقۋشىلارىنا ارنالعان «رۋسسكي يازىك» وقۋلىعىندا جىبەرىلگەن قاتەلىكتەر جونىندە جازعانبىز. اتاپ وتسەك, 2019 جىلى «الماتىكىتاپ» باسپاسىنان 260 مىڭ تارالىممەن شىققان وقۋلىقتا مەملەكەتتىك رامىزدەر اۆتورلارىنىڭ اتى-جونىندە ورەسكەل قاتەلىكتەر ورىن العان. بىرىنشىدەن, مەملەكەتتىك تۋدىڭ اۆتورى ش.نيازبەكوۆتىڭ تەگى نيازباەۆ دەپ جازىلعان, كەيىنگى ەكى جىلدا قايتا باسىلعان 40 مىڭ تارالىمدا بۇل تۇزەتىلسە دە, مەملەكەتتىك گيمن اۆتورلارىنىڭ ءبىرى, اتاقتى كومپوزيتور ش. قالداياقوۆ مۇلدەم ەنبەي قالعان.
مىنە, وسى ماسەلەنى كوتەرىپ جازعان دەپۋتاتتىق ساۋالىمىزعا ءبىلىم جانە عىلىم ءبىرىنشى ۆيتسە-ءمينيسترى ش. كارينوۆادان كەلگەن جاۋاپ قاناعاتتانارلىقسىز دەپ ايتۋعا تۋرا كەلەدى. مينيسترلىكتىڭ جاڭارتىلعان ءبىلىم بەرۋ مازمۇنىن ەنگىزۋ باستالعانىن, ۇلگىلىك وقۋ جوسپارلارى مەن باعدارلامالارى بەكىتىلگەنى جانە تاعى باسقا ءىس-شارالاردىڭ قولعا الىنىپ جاتقانىن بايانداۋمەن شەكتەلگەن. ال دەپۋتاتتىق ساۋالعا نەگىز بولىپ وتىرعان ماسەلە – اتالمىش وقۋلىق, بۇگىنگى تاڭدا سول وقۋلىقتا كەتكەن قاتەلىكتەر قالاي تۇزەتىلىپ وتىرعانى تۋرالى ەشتەڭە ايتىلماعان. بۇل جونىندە ءبىر اۋىز ءسوز جوق», دەپتى ماجىلىسمەن. سەنات دەپۋتاتتارى دا وسى ماعىنالاس پىكىردە ەكەن. بۇعان سەناتور مۇرات باقتيار ۇلىنىڭ ۇكىمەتكە بيىلعى 27 قاڭتاردا جولداعان دەپۋتاتتىق ساۋالىندا: «ۇكىمەت باسشىسىنا, ۇكىمەت مۇشەلەرىنە سەناتورلار قوعامدا ءار ءتۇرلى سالاعا قاتىستى دەپۋتاتتىق ساۋالدار جولداپ جاتامىز. بىراق الاتىن جاۋاپتارىمىز ناقتى بولماي, ەكى ۇشتى بولىپ كەلەدى. سوندىقتان دا دەپۋتاتتىق ساۋالدارعا ءبىر جاپىراق قاعازبەن عانا جاۋاپ قايتارا سالۋعا ەندىگى ارادا جول بەرىلمەگەنى ابزال! ءار دەپۋتات ساۋالىنا زەردەلەپ بارىپ, جاۋاپ بەرۋ جولعا قويىلۋى كەرەك», دەگەنى دالەل.
دەمەك «ەگەر ۇكىمەت مۇشەلەرى دەپۋتاتتاردى تىڭداماسا, وندا كىمدى تىڭدايدى؟» دەگەن وي تۋىندايدى. جاڭا قازاقستاندى قۇرۋعا كىرىسكەن جاڭا ۇكىمەتىمىز ەڭ الدىمەن مەملەكەت باسشىسىنىڭ «حالىق ۇنىنە قۇلاق اساتىن مەملەكەت» تۇجىرىمداماسىن بۇلجىتپاي ىسكە اسىرعانى ءجون ەمەس پە؟ ال پارلامەنت دەپۋتاتتارىنىڭ ارتىندا سايلاۋشىلار ءھام حالىق تۇرعانى ءمالىم.
