توتەنشە سەسسيادا 35 مەملەكەت قالىس قالسا, بەسەۋى قارسى داۋىس بەردى. ماسكەۋدىڭ باسقىنشىلىق ارەكەتىن ايىپتاعان قۇجاتقا بەلارۋس, سولتۇستىك كورەيا, ەريترەيا, سيريا جانە رەسەيدىڭ ءوزى قارسىلىق ءبىلدىردى. قالىس قالعاندار قاتارىندا كرەملدىڭ وداقتاستارى سانالاتىن كۋبا مەن نيكاراگۋا, سونداي-اق كورشىلەس قىتاي بار.
رەزوليۋتسيادا بۇۇ «رەسەي فەدەراتسياسىنىڭ ۋكرايناعا قارسى اگرەسسياسىنا قاتتى الاڭدايتىنى» ايتىلعان. «رەسەي فەدەراتسياسىنان ۋكرايناعا قارسى قارۋ قولدانۋدى دەرەۋ توقتاتۋدى, حالىقارالىق تۇرعىدا مويىندالعان شەكارالارىنان بۇكىل اسكەري كۇشتەرىن جەدەل, تولىعىمەن جانە ەشقانداي شارتسىز شىعارۋدى تالاپ ەتەدى», دەلىنگەن قاراردا.
قۇجاتتىڭ زاڭدى كۇشى جوق. دەگەنمەن بۇل ماسكەۋ مەن ونىڭ وداقتاسى بەلارۋسكە حالىقارالىق قوعامداستىقتىڭ كوزقاراسىن بىلدىرەدى. قاراردى ازىرلەۋگە 90-نان استام ەلدىڭ وكىلى اتسالىسقان. ونى قابىلداۋ ءۇشىن بۇۇ باس اسسامبلەياسىنىڭ ۇشتەن ەكىسى قولداۋى ءتيىس ەدى.
قارار قابىلدانعاننان كەيىن بۇۇ باس حاتشىسى انتونيۋ گۋتەرريش ءسوز سويلەپ, احۋالعا قاتىستى ءوز پىكىرىن ءبىلدىردى. ونىڭ ايتۋىنشا, باس اسسامبلەيا ۇستانىمىن كورسەتتى. ەندىگى جەردە بۇۇ باس حاتشىسى رەتىندە ونىڭ ورىندالۋىنا بارىن سالاتىنىن جەتكىزدى.
«باس اسسامبلەيانىڭ ايتارى انىق جانە ايقىن. ءدال قازىر ۋكرايناداعى قىرعىندى توقتاتۋ كەرەك. ءدال قازىر مىلتىقتىڭ دىبىسى ەستىلمەۋ ءتيىس. ءدال قازىر كەلىسسوزدەر مەن ديپلوماتياعا كەزەك بەرۋ قاجەت. ۋكراينانىڭ اۋماقتىق تۇتاستىعى مەن ەگەمەندىگى بۇۇ جارعىسىنا سايكەس ساقتالۋى كەرەك. ۋاقىت جوعالتۋعا بولمايدى. قاقتىعىستىڭ اۋىر زارداپتارى انىق كورىنەدى», دەدى ا.گۋتەرريش.
باس حاتشى ۋكرايناداعى احۋالدىڭ كۇردەلى بولىپ تۇرعانىن, جاعداي الداعى ۋاقىتتا ودان ءارى كۇردەلەنە ءتۇسۋى مۇمكىن ەكەنىن مالىمدەدى. ءار سەكۋند وتكەن سايىن جاعداي قيىنداپ بارادى.
«سوعىستىڭ ايماقتىق جانە جاھاندىق بەيبىتشىلىك پەن قاۋىپسىزدىككە, كوروناۆيرۋستان ەسىن ەندى جيناپ جاتقان الەمگە تيگىزەتىن سالدارلارىنا قاتتى الاڭدايمىن. بۇگىنگى قارار باستى شىندىقتى كورسەتەدى. الەم ۋكراينا حالقىنىڭ جاپا شەككەنىن قالامايدى», دەدى ول.
سونداي-اق ا.گۋتەرريش گۋمانيتارلىق كومەك قولىن سوزعان كورشىلەس ەلدەرگە العىس ايتتى. وسىنداي قارجىلاندىرۋدىڭ ارقاسىندا ماڭىزدى ءدارى-دارمەك پەن مەديتسينالىق قۇرالدار, ازىق-ت ۇلىك, تازا اۋىز سۋ جەتكىزۋگە مۇمكىندىك مولايتىنىن اتاپ ءوتتى.
«سوعىس قيمىلدارىن دەرەۋ توقتاتۋعا جانە بەيبىتشىلىك ءۇشىن شۇعىل كەلىسسوزدەر جۇرگىزۋگە ۇلەس قوسۋ ءۇشىن قولىمنان كەلگەننىڭ ءبارىن جاسايمىن. ۋكراينا حالقىنا بەيبىتشىلىك وتە قاجەت. ال دۇنيە جۇزىندەگى ادامدار سونى تالاپ ەتەدى», دەدى ا.گۋتەرريش.
ۋكراينانىڭ تۇراقتى وكىلى سەرگەي كيسليتس «بۇل مەنىڭ سوعىسىم ەمەس» دەگەن سىلتاۋمەن قالىس قالۋدى ءجون كورگەن ەلدەرگە ۇندەۋ تاستادى. «بۇل قاتە پىكىر. جاماندىق ەشقاشان توقتامايدى. جاۋلاپ العان سايىن ارانى اشىلا بەرەدى. بۇعان توزسەڭىزدەر, ول ودان ءارى ىلگەرىلەي بەرەدى. قارار جوباسى ونى ۋكراينادا توقتاتۋعا جانە ودان ءارى كەتپەۋىنە قاجەت قادام», دەدى س.كيسليتس.
ايتا كەتەرلىگى, باس اسسامبلەيانىڭ توتەنشە سەسسياسىندا سويلەگەن سپيكەرلەردىڭ ءبارى سوعىستى ايىپتادى. امەريكا قۇراما شتاتتارىنىڭ بۇۇ-داعى وكىلى ليندا توماس-گرينفيلد بىرىككەن ۇلتتار ۇيىمىنىڭ باستى ماقساتى سوعىستىڭ الدىن الۋ ەكەنىن جەتكىزدى. ونىڭ ايتۋىنشا, رەسەي سوعىستاعى قاتىگەزدىكتى ارتتىرۋعا دايىندالىپ جاتىر. وسى ورايدا, توماس-گرينفيلد كرەملدىڭ كاسسەتالىق وق-دارىلەر مەن ۆاكۋمدىق بومبالار, جاپپاي قىرىپ-جوياتىن قارۋ-جاراقتاردى ۋكرايناعا تاسىمالداپ جاتقانىنا توقتالدى.
ءوز كەزەگىندە رەسەيدىڭ بۇۇ-داعى تۇراقتى وكىلى ۆاسيلي نەبەنزيا ۋكرايناداعى احۋال سوعىس ەمەس, «اسكەري ءىس-قيمىل» دەگەن ءسوزىن تاعى ءبىر مارتە قايتالادى. الايدا بەيبىت تۇرعىنداردىڭ كۇن سايىن قالاي قىرىلىپ جاتقانىن كورگەن حالىقارالىق قوعامداستىق مۇنداي سىلتاۋعا قۇلاق اسقان جوق.
رەسەيدىڭ ۋكرايناعا باسىپ كىرۋىن ايىپتايتىن قۇجات بۇعان دەيىن بۇۇ قاۋىپسىزدىك كەڭەسىندە تالقىلانىپ, داۋىس بەرىلگەن ەدى. دەگەنمەن ول كەزدە رەسەي تاراپى قارارعا ۆەتو قويدى. سوندىقتان ول قابىلدانباي قالدى. ەستەرىڭىزگە سالا كەتسەك, بۇۇ قاۋىپسىزدىك كەڭەسىنىڭ بەس تۇراقتى مۇشەسىندە – اقش, رەسەي, ۇلىبريتانيا, قىتاي جانە فرانتسيادا ۆەتو قويۋ قۇقىعى بار. كەڭەسكە مۇشە 14 مەملەكەت قۇجاتتى قابىلداسا دا, اتى اتالعان مەملەكەتتەردىڭ بىرەۋى قارسى شىقسا, وندا قارار قابىلدانبايدى.
اقش-تىڭ بۇۇ-داعى ەلشىسى ليندا توماس-گرينفيلد بۇۇ قاۋىپسىزدىك كەڭەسى قارارى قابىلدانباعاننان كەيىن نارازىلىعىن جاسىرعان جوق. «رەسەي ءبىزدىڭ داۋىسىمىزعا ۆەتو قويا المايدى. رەسەي ۋكراينا حالقىنا ۆەتو قويا المايدى. رەسەي بۇۇ جارعىسىنا ۆەتو قويا المايدى. رەسەي جاۋاپكەرشىلىككە ۆەتو قويمايدى دا, قويا دا المايدى», دەدى ول.
ال بۇۇ باس اسسامبلەياسىندا ەشقانداي مەملەكەتكە مۇنداي باسىمدىق بەرىلمەگەن. ءاربىر ەلدىڭ ءبىر داۋىسى بار. ايتا كەتەرلىگى, بۇۇ باس اسسامبلەياسىنىڭ توتەنشە سەسسياسى 1950 جىلدان بەرى 11 مارتە عانا شاقىرىلعان. سوڭعى رەت 1982 جىلى وسىنداي جيىن وتكەن بولاتىن.
