ءدال وسىنداي قيىن-قىستاۋدا ادام ءومىرىن قورعاپ قالعان ازاماتتاردىڭ ەرلىككە پارا-پار ءىس-قيمىلدارى جەرىنە جەتكىزىلە, جاس ۇرپاقتىڭ ساناسىنا سىڭىرىلە اشىلىپ ايتىلعانى دۇرىس. وزگەگە – ونەگە, كەيىنگىگە – جاقسى مىسال. تاياۋدا ششۋچينسك قالاسىنداعى جەكەمەنشىك ۇيلەردىڭ ءبىرىن ويلاماعان جەردەن قىزىل جالىن شارپىدى. ازىرگە ءتىلسىز جاۋدىڭ قالاي ورىن العانى بەلگىسىز. ماماندار انىقتاۋ ۇستىندە. وسى ارادا الدە ەلەكتر جەلىلەرىنىڭ توزىعى جەتكەندىكتەن بە, بالكىم ءۇي يەلەرىنىڭ بەيقامدىعىنان با, ءورتتىڭ ءجيى ورىن الاتىنىن ايتا كەتكەنىمىز ءلازىم. بەيقامدىق بەينەتكە باستايدى. دۇنيە-م ۇلىك ساداقا, شيەتتەي بالالار شىرىلداپ قۇربان بولىپ جاتسا, قاسىرەتى ەستەن كەتپەيدى عوي. بۇل جولى ورتكە ورانعان ءۇيدىڭ ىشىندە ەكى بالا بولعان. قىزىل جالىن شاعىن ءۇيدى بىردەن قۇشاعىنا الىپ, قويۋ ءتۇتىن كوز اشتىرماستاي قاۋلاعان ەكەن. اسكەري قىزمەتكەر رۋسلان انۋاربەكوۆ ءۇيدىڭ ورتەنىپ جاتقانىن بىردەن بايقاعان. جاقىن ماڭداعى تۋىستارىنىڭ ۇيىندە وتىرسا كەرەك. تەرەزەدەن كورشىسىنىڭ ءۇيى جانىپ جاتقانىن بايقاعان. جالما-جان كيىنىپ, وقيعا ورنىنا جۇگىرگەن. قىزىل جالىنعا ورانعان ءۇيدىڭ ەسىگىن ايقارا اشىپ, دىبىس قاتقانىمەن, ەشكىم جاۋاپ بەرمەپتى. قايتادان دالاعا شىققان. سول كەزدە بارىپ ءۇي ىشىنەن شىعىپ جاتقان ۇرەيگە تولى دىبىستى ەستىگەن. شوشىنعان, وكسىگەن بالا داۋسى. تۇلا بويى شىمىرلاپ كەتكەن. امان الىپ قالسا, جارادى دا.
بۇل كەزدە ءورت ابدەن كۇشىنە مىنگەن. جىلاننىڭ تىلىندەي سۋماڭداعان قىزىل جالىن بەت قاراتپايدى. ءۇيدىڭ توبەسى وپىرىلىپ ءتۇسۋى دە مۇمكىن, اس ۇيدە گاز باللونى بولسا شە؟! ادام ءدال وسىنداي شاقتا وزىنە تونەر قاۋىپ-قاتەردى تارازىعا سالىپ سالماقتاپ, وي ەلەگىنەن وتكىزىپ تە ۇلگەرمەيتىن بولار. رۋسلاننىڭ ايتۋىنا قاراعاندا, بار نيەتى, پەيىلى ەندى-ەندى ءورت قۇشاعىندا قالۋى ابدەن مۇمكىن بالالاردى قۇتقارۋ بولعان. سول سەبەپتى دە باسىن بايگەگە تىككەن.
– ەسىك ارقىلى كىرۋ مۇمكىن بولماعاندىقتان, كوپ ويلانباستان بىردەن تەرەزەنى سىندىردىم. ول دا وڭاي بولمادى, تەمىر تورمەن بەكىتىپ تاستاعان ەكەن. قولىمدا قۇرال دا جوق. ايتەۋىر, بويىما ءبىر تىلسىم كۇش قۇيىلىپ, قوپارىپ الدىم, – دەيدى ش.ءۋاليحانوۆ اتىنداعى اسكەري كوللەدجى وقۋ ورتالىعىنىڭ قىزمەتكەرى رۋسلان انۋاربەكوۆ, – الدىمەن دىبىس شىققان جەردى سيپالاپ قارمانىپ, قىز بالانى الىپ شىقتىم. بۇل كەزدە بولمە بۇرىشىن ساعالاپ قالعان ەكىنشى بالانى دا تاۋىپ الدىم.
قاۋىپ-قاتەر شىن ءتونىپ كەلگەندە ابدىراپ, ابىرجىماي, ناعىز ەرلەرگە ءتان ءىس-قيمىل جاساعان رۋسلان ءوزىنىڭ بۇل ارەكەتىن ەرلىك دەپ ەسەپتەمەيدى. ونىڭ ويىنشا, ءوز ەلىنىڭ پاتريوتى بولۋ, اسكەري بورىشىن وتەپ, ەلىنە قىزمەت ەتۋ – ءاربىر جاس قازاقستاندىقتىڭ مىندەتى. وسى جولعى وقيعا ءتارىزدى ادام ءومىرى قاۋىپتىڭ نىساناسىنا بايلانعان كەزدە قيمىل كورسەتۋ ەر ادامنىڭ پەشەنەسىنە جازىلعان پارىز ىسپەتتى.
– 2009 جىلدىڭ اقپان ايىنان باستاپ اسكەري قىزمەتتەمىن. وتباسىم, ەكى قىزىم بار. ەلگە قىزمەت ەتۋ وزىمە قاتتى ۇنايدى, – دەيدى ول.
ەلىمىزدە وزگەنىڭ ءومىرى ءۇشىن وتتان, سۋدان قورىقپاي, بورىشىن ادال اتقاراتىن وسىنداي ەرلەردىڭ بارىنا شۇكىرشىلىك. ال وزدەرىنىڭ ەرلىگىن جاي عانا پارىزعا بالاۋى ازاماتتىڭ بويىنداعى قاراپايىمدىلىقتى مەڭزەپ تۇرعان جوق پا؟! ورتاق شاڭىراقتىڭ ۋىق-كەرەگەسىن بەكىتەتىن دە وسىنداي ابزال ازاماتتار.
اقمولا وبلىسى,
بۋراباي اۋدانى
