«پروكۋراتۋرا ورگاندارى بۇرىن تاڭدالعان بۇلتارتپاۋ شارالارىن قايتا قاراۋ بويىنشا جۇمىس جۇرگىزۋدە. جەكە باسىن, دەنساۋلىق جاعدايىن جانە تەرگەۋگە كورسەتىلگەن كومەكتى ەسكەرە وتىرىپ, 199 كۇدىكتىگە «قاماۋدا ۇستاۋ» شاراسى «ەشقايدا كەتپەۋ تۋرالى» قولحاتقا, «كەپىلگە», «ۇيقاماققا الۋعا» جانە «جەكە كەپىلگەرلىككە» اۋىستىرىلدى. قاڭتار وقيعالارىنىڭ سەبەپتەرى مەن جاڭا ءمان-جايلارىنىڭ انىقتالۋىنا قاراي, ولار دا جۇرتشىلىققا جەتكىزىلەتىن بولادى. سونىمەن بىرگە, تەك رەسمي دەرەكتەرگە سەنۋگە جانە جالعان مالىمەتتەردى تاراتپاۋعا شاقىرامىز», دەدى باس پروكۋراتۋرا وكىلى ورتالىق كوممۋنيكاتسيالار قىزمەتىندە وتكەن بريفينگتە.
ايتا كەتەيىك, قازىر قاڭتار وقيعالارىنا قاتىستى سوتقا دەيىنگى 3 666 تەرگەپ-تەكسەرۋ ءىسى بار. 162 ايىپتالۋشىعا قاتىستى 101 قىلمىستىق ءىس سوتقا جولداندى جانە 62 ادام سوتتالدى.
