«بۇگىن, 01.03.2022 جىلى بۇلاندى اۋدانىنىڭ كۋپچانوۆكا اۋىلىندا 81 شارشى مەتر جەكە تۇرعىن ۇيدە ءورت ورىن الدى. ءورت ءسوندىرۋ بولىمشەسى كەلگەن ۋاقىتتا ءۇي تولىعىمەن وتقا ورانعان. وقيعا ورنىنان 1976 ج,1987 جىلعى ەكى ايەل مەن 1994 جىلعى ەر ادامنىڭ ءمايىتى تابىلدى», دەلىنگەن وبلىستىق تجد حابارلاماسىندا.
ءبىر ادام تەرەزەنى سىندىرىپ شىعىپ امان قالىپ, وقيعا ورنىنا ءورت سوندىرۋشىلەردى شاقىرعان.
«الدىن الا اقپارات بويىنشا, ءۇي يەسى – 1976 جىلى تۋعان ايەل وتباسىلىق مەرەكەدە, دوستارىنىڭ اراسىندا ۇلىنىڭ كامەلەتكە تولعانىن اتاپ وتپەك بولعان. وسىلايشا كەلگەن قوناقتار ءورت كەزىندە ءۇي يەسىمەن بىرگە قازا تاپقان. وقيعا تۋرالى كەشتەتىپ جەتكەن حابار ءورتتىڭ تەز تارالۋىنا اكەلدى, بىرنەشە مينۋت ىشىندە ءۇي تولىعىمەن وتقا وراندى», دەدى اقمولا وبلىسى تجد مەملەكەتتىك-ءورت باقىلاۋ باسقارماسىنىڭ باستىعى دۋمان دالەشوۆ.
ءورت 03:10-دا اۋىزدىقتالىپ, 04:55-تە جويىلدى. ماكينسك قالاسىنىڭ 8-ءموسب-نان ءورت شىققان جەرگە دەيىنگى قاشىقتىق – 25 شاقىرىم. ءورتتىڭ سەبەبى مەن قازا بولۋ جاعدايلارى انىقتالۋدا, سوت-مەديتسينالىق ساراپتاما تاعايىندالدى. وقيعا ورنىنا تجد 11 قىزمەتكەرى مەن 3 بىرلىك تەحنيكاسى شىقتى.
اقمولا وبلىسىنىڭ توتەنشە جاعدايلار دەپارتامەنتى وبلىس تۇرعىندارى مەن قوناقتارىنا ءورت قاۋىپسىزدىگى شارالارىن ساقتاۋ قاجەتتىگىن ەسكەرتەدى.
