عالىمجان ءپىرماتوۆ ءوز بايانداماسىندا ۇلتتىق بانك ەركىن وزگەرمەلى باعامدا ينفلياتسيالىق تارگەتتەۋ رەجيمىن ۇستانۋدى جالعاستىراتىنىن جەتكىزدى.
«ۇلتتىق بانكتىڭ بارلىق قاجەتتى قۇرالدارى بار جانە ولاردى اقىلعا قونىمدى تاسىلمەن پايدالانادى. ەلدىڭ جالپى حالىقارالىق رەزەرۆتەرى 25 اقپاندا 87,7 ملرد دوللاردى قۇرادى. اي باسىنان بەرى ءوسىم 346 ملن دوللار. ونىڭ ىشىندە ۇلتتىق قوردىڭ اكتيۆتەرى – 54,0 ملرد دوللار, التىن – ۆاليۋتا رەزەرۆتەرى – 33,7 ملرد دوللار. ءبىز قارجىلىق تۇراقتىلىق ءۇشىن تاۋەكەلدەر كۇشەيگەن جاعدايدا ۆاليۋتالىق ينتەرۆەنتسيالار جۇرگىزەمىز», دەدى عالىمجان ءپىرماتوۆ.
ۇلتتىق بانك باسشىسى شارالار كەشەنى تەڭگەلىك اكتيۆتەردىڭ تارتىمدىلىعىن ساقتاۋعا, دوللارمەن بايلانىستى تاۋەكەلدەر مەن ايىرباس باعامىنا قىسىمدى تومەندەتۋگە, سونداي-اق ينفلياتسيانىڭ ەلەۋلى ءوسۋ تاۋەكەلدەرىن جۇمسارتۋعا باعىتتالعانىن ايتتى. سونداي-اق ول رەسەيلىك بانكتەرمەن ترانسشەكارالىق وپەراتسيالاردىڭ جۇمىس جوسپارى دايىندالعانىن اتاپ ءوتتى.
«قازاقستاندىق بانكتەردىڭ كليەنتتىك جانە مەنشىكتى تولەمدەر مەن اقشا اۋدارىمدارىن ەل ىشىندە جۇرگىزۋ بويىنشا بارلىق وپەراتسيالارى شتاتتىق رەجيمدە جۇزەگە اسىرىلادى. SWIFT جۇيەسىنەن اجىراتىلعان رەسەيلىك بانكتەردىڭ كليەنتتەرىمەن ترانسشەكارالىق وپەراتسيالاردى قامتاماسىز ەتۋ ءۇشىن ءوزارا ەسەپ ايىرىسۋلاردى جۇرگىزۋدىڭ بالامالى تەتىكتەرى ازىرلەندى», دەدى عالىمجان ءپىرماتوۆ.
عالىمجان ءپىرماتوۆ قازاقستان ەۋرازيالىق ەكونوميكالىق وداقتىڭ مۇشەسى ەكەنىن, سول وداق اياسىندا بىزگە اكەلىنەتىن يمپورتتىڭ 42%-ى رەسەيگە تيەسىلى ەكەنىن ەسكە سالدى.
«وسىنىڭ ءبارىن ەسكەرسەك, رەسەيگە قارسى جاڭا سانكتسيالار ءبىزدىڭ ەلىمىزدىڭ ەكونوميكاسىنا اسەر ەتەدى. رەسەي ءرۋبلىنىڭ السىرەۋىنە بايلانىستى قازاقستاننىڭ قارجى نارىعىنا قىسىم وسۋدە», دەدى ۇلتتىق بانك باسشىسى.
