پوليتسەيلەر ءبىر اي بۇرىن جوعالعان بالالاردى تاپتى

الماتى وبلىسىنىڭ پوليتسەيلەرى بۇدان ءبىر اي بۇرىن جوعالدىعا سانالعان ەكى ءجاسوسپىرىمدى تاپتى. بۇل تۋرالى NewTimes.kz حابارلادى. «ۇستىمىزدەگى جىلعى 28 اقپان كۇنى ەڭبەكشىقازاق اۋدانى ەسىك قالاسىندا تۇراتىن كامەلەتكە تولماعان داۋلەت داۋكەن مەن تىنىشبەك ابباتوۆ الماتى قالاسىنا كەتكەن جەرىنەن ءىزىم-قايىم جوعالىپ كەتتى», - دەلىنگەن الماتى وبلىسى ىشكى ىستەر دەپارتامەنتىنىڭ ءباسپاسوز قىزمەتى. «بالالاردىڭ اتا-انالارى ەكى تاۋلىكتەن كەيىن ەڭبەكشىقازاق اۋداندىق ىشكى ىستەر بولىمىنە كومەك سۇراپ كەلەدى. رەسمي شاعىم جاسالعاننان كەيىن پوليتسەيلەر جوعالعان بالالاردى ىزدەۋگە ءوز كۇشتەرىن عانا ەمەس, سونىمەن بىرگە جەرگىلىكتى جالپى ءبىلىم بەرەتىن مەكتەپتەر مۇعالىمدەرىن تارتتى», - دەلىنگەن حابارلامادا. پوليتسەيلەر ايتقانداي, جوعالعان جاسوسپىرىمدەر وقتا-تەكتە ءوزىنىڭ دوستارى مەن تۋعان-تۋىستارىنا بايلانىسقا شىعىپ تۇرعان. بىراق تەلەفون ءنومىرىن ءجيى اۋىستىرىپ تۇرعاندىقتان, ولاردىڭ قايدا جۇرگەندەرىن تاپ باسىپ تابۋ قيىنعا تۇسكەن. پوليتسەيلەر ەكى رەت بالالار جالداپ تۇرعان پاتەرلەردى دە تاۋىپ بارعان. الايدا, سول كەزدە ولار بۇل جەرلەردەن كەتىپ قالعان بولدى. «ىزدەۋدە جۇرگەن بالالاردىڭ ايتۋلارىنشا, بۇل ۋاقىتتىڭ بارىندە ولار بىرەۋىنىڭ ۇيىنەن اتا-انانىڭ رۇقساتىنسىز الىپ كەتكەن اقشاعا (9 مىڭ دوللارعا جۋىق) ءومىر سۇرگەن. پوليتسەيلەر جەدەل جولمەن جاسوسپىرىمدەردىڭ تۇرعان جەرلەرىن تاۋىپ, ولاردى الماتىدان استاناعا كەتپەك بولىپ تۇرعان كەزدەرىندە قولعا ءتۇسىردى», - دەپ اتاپ كورسەتتى ءباسپاسوز قىزمەتى. ءمالىم بولعانداي, قازىر بالالار ۇيلەرىنە جەتكىزىلگەن. مۇرات ايتقوجا. دەرەككوز: NewTimes.kz. فوتو: www.idrive.kz.