باتىس قازاقستان وبلىسى اۋماعىنا من-300 زىمىرانى قۇلادى

كەشە, 27 ناۋرىز كۇنى باتىس قازاقستان وبلىسىنىڭ بوكەيورداسى اۋدانىنداعى شوڭعاي ەلدى مەكەنىنىڭ وڭتۇستىك-شىعىس شەتىنەن ءبىر شاقىرىم قاشىقتىقتا مر-30 كەشەنىنىڭ من-300 مەتەورولوگيالىق زىمىرانى قۇلادى. وسى وقيعا ورىن العان جەردەن زىمىران قالدىقتارى تابىلعان. بۇل تۋرالى قورعانىس مينيسترلىگىنىڭ ءباسپاسوز قىزمەتى حابارلادى. 2013 جىلعى 28 قاراشادا قازاقستان مەن رەسەي فەدەراتسياسى قورعانىس مينيسترلىگى اراسىنداعى جوسپارىنا سايكەس سىناق جۇمىسىن جۇرگىزۋ جوسپارلانعان بولاتىن. ەندى رەسەي قورعانىس مينيسترىلىگىنىڭ مالىمەتىنە جۇگىنسەك, سىناق بارىسىندا قوزعالتقىش قوندىرعىسى ىستەن شىعىپ, زىمىران پوليگون اۋماعىنا جەتپەي قۇلاعان. زىمىران قالدىقتارىنان زارداپ شەككەندەر جوق. قازىرگى كەزدە قازاقستان قورعانىس مينيسترلىگى وقيعا سالدارى تۇپكىلىكتى انىقتالعانشا, رەسەيگە جالعا بەرىلگەن الاڭداردا سىناق جۇرگىزۋدى ۋاقىتشا توقتاتتى. ءامىرحان الماعانبەتوۆ. دەرەككوز: قورعانىس مينيسترلىگىنىڭ ءباسپاسوز قىزمەتى. فوتو: www. Inform.kz.