الماتىدا 1 ادامنىڭ ءولىپ, 5 ادامنىڭ جاراقات الۋىنا اپارىپ سوقتىرعان جول-كولىك وقيعاسىن جاساعان ماقسات ۇسەنوۆتىڭ ىسىنە باس پروكۋراتۋرانىڭ ارالاسا الماۋىنىڭ دالەلدى سەبەپتەرى بولدى. بۇل تۋرالى باس پروكۋروردىڭ ورىنباسارى نۇرماحانبەت يساەۆتىڭ سوزىنە سىلتەمە جاساعان Tengrinews.kz ءتىلشىسى حابارلادى.
«بىزگە: «پروكۋرور قايتا قاراپ وتىر؟ ول نەگە ءىستىڭ قىسقارۋىنا جول بەرگەن؟» دەگەن ساۋالدار قويىلىپ جاتادى. ال پروكۋرور زاڭعا (قىلمىستىق كودەكستىڭ 67-بابى) قارايدى. ول قانداي ءبىر پروكۋرور بولسا دا, ءوزىنىڭ قىزمەتتىك ۋاكىلدىگىن اسىرا پايدالانىپ, زارداپ شەگۋشىلەردىڭ ىمىراعا كەلۋلەرىمەن ءىستىڭ قىسقارىپ كەتۋىنە توقتاۋ سالا المايدى», - دەپ ءتۇسىندىردى ول جوعارىدا اتالعان جول-كولىك وقيعاسىنا بايلانىستى.
باس پروكۋروردىڭ ورىنباسارى كۇنى كەشە ەلباسى نۇرسۇلتان نازارباەۆتىڭ الماتى قالاسىنىڭ دامۋىنا ارنالعان كەڭەستە سويلەگەن سوزىندە بەلگىلى كىسىلەردىڭ جول-كولىك وقيعالارىن جاساعان بالالارىنىڭ قاتاڭ جازاعا تارتىلۋلارى كەرەك ەكەنىن ايتقانىن باياندادى. «مەملەكەت باسشىسىنىڭ تاپسىرماسىنا سايكەس, ءبىر كۇننىڭ ىشىندە 67-باپقا ەنگىزىلەتىن وزگەرىس دايىندالىپ قويىلدى. مەن جۋىق ارادا بۇل نورما قابىلدانادى دەپ ويلايمىن. سول كەزدە قىلمىستىق ىستەر بويىنشا جۇرتتىڭ ىمىراگەرشىلىككە بارۋلارىنا جول بەرىلمەيدى. مەن مۇنى ءادىل شەشىم دەپ ويلايمىن», - دەدى يساەۆ.
ەسكە سالا كەتەيىك, جوعارىدا اتى اتالعان ماقسات ۇسەنوۆ 2013 جىلعى 1 جەلتوقسان كۇنى تاڭ الدىندا الماتىداعى «تسەلينىي» كينوتەاترىنىڭ ماڭىندا ايالدامادا تۇرعان ەكى جىگىت پەن ءتورت قىزدى قاعىپ كەتەدى. وسى جول-كولىك وقيعاسى سالدارىنان ءبىر جىگىت قازا تاۋىپ, قالعان بەسەۋى ءارتۇرلى جاراقات الادى. ال وسىنداي قىلمىس جاساۋشى جۇرگىزۋشى وقيعا بولعان جەردەن قاشىپ كەتەدى. الايدا, كەيىن قاشقىن قولعا ءتۇستى.
بۇل وقيعا ارتىنشا جۇرتشىلىق اراسىندا ۇلكەن رەزونانس تۋعىزدى. وسىنىڭ سالدارىنان ماقساتتىڭ «استانا ەكسپو-2014» ۇلتتىق كومپانياسىندا باسشى قىزمەت اتقاراتىن اكەسى قاجىمۇرات ۇسەنوۆ قىزمەتىنەن كەتۋگە ءماجبۇر بولدى. بىراق جىگىتتىڭ ءوزى جازادان امان قالدى. بۇعان زارداپ شەككەندەر جاعىنىڭ كەشىرىم بەرگەنى سەبەپ بولعان سياقتى. سوندا دا بولسا, سوڭىنان قازا تاپقان 23 جاسار مۇرات قاراباليننىڭ اناسى ءوزىنىڭ مۇنداي ىمىراعا بارماعانىن تالاي ايتتى. الايدا, بۇل جانايقاي سوتتاردىڭ قۇلاعىنا بارماعان سياقتى. تاراپتار كەلىسىمگە كەلدى دەگەن تۇيىنمەن ءىس قىسقاردى. سوسىن پروكۋراتۋرانىڭ نارازىلىعى بويىنشا ۇسەنوۆ 48 كۇنگە تۇرمەگە قامالدى.
جاقىندا ماقسات تۇرمەدەن شىقتى. ونى تۋعان-تۋىستارى تۇرمەنىڭ الدىنان كۇتىپ الىپ, بىرنەشە كولىك بولىپ تىزىلگەن كورتەجبەن الىپ كەتتى.
قۇرىش نۇرىمبەت.
دەرككوز: tengrinews.kz.
فوتو: tengrinews.kz.
