بەلگىلى كىسىلەردىڭ بالالارىنان جول اپاتى ءۇشىن قاتاڭ سۇرالادى

بەيسەنبى كۇنى وڭتۇستىك استانادا الماتى قالاسىنىڭ دامۋىنا بايلانىستى كەڭەس وتكىزگەن قازاقستان پرەزيدەنتى نۇرسۇلتان نازارباەۆ جول-كولىك وقيعالارىنىڭ كوبەيۋىنە الاڭداۋشىلىق بىلدىرە كەلىپ, جول-كولىك وقيعاسىن جاساعان تانىمال كىسىلەردىڭ بالالارىن زاڭعا ساي قاتاڭ جازالانۋلارى ءتيىس ەكەنىن ايتتى. بۇل تۋرالى اقوردانىڭ سايتى حابارلادى. «ەرەكشە اتاپ وتكىم كەلەدى – تانىمال ادامداردىڭ بالالارى مەن تۋىستارىنىڭ قاتىسۋىمەن بولاتىن جول-كولىك وقيعالارى از ەمەس. زاڭنىڭ الدىندا ءبارى تەڭ, سوندىقتان مۇنداي جاعدايلاردا بالالاردى دا, اتا-انالارىن دا مەيلىنشە قاتاڭ جازالاۋ قاجەت», – دەدى پرەزيدەنت. مەملەكەت باسشىسى قالاداعى كريمينوگەندى احۋالعا توقتالىپ, الماتىدا 53 مىڭ قىلمىس تىركەلگەنىن, ونىڭ 80 پايزىنىڭ اشىلعانىن, بىراق جاسوسپىرىمدەر اراسىندا قىلمىستىڭ ارتىپ وتىرعانىن ايتتى. سوعان بايلانىستى اكىمدىكتىڭ وتىنىشىمەن ىشكى ىستەر دەپارتامەنتىنىڭ شتاتى ايتارلىقتاي ۇلعايتىلدى, دەگەنمەن 500 ورىن ءالى بوس كۇيىندە. پرەزيدەنت الماتى تۇرعىندارى مەن قوناقتارىنىڭ قاۋىپسىزدىگىن قامتاماسىز ەتۋدى تاپسىردى. جيىن بارىسىندا قالانىڭ 2013 جىلعى الەۋمەتتىك-ەكونوميكالىق دامۋ قورىتىندىلارى مەن الداعى كەزەڭگە ارنالعان جوسپارلارى قارالدى. مەملەكەت باسشىسى نۇرسۇلتان نازارباەۆ مەگاپوليستى دامىتۋ ماسەلەلەرى ارقاشان مەملەكەتتىڭ نازارىندا بولاتىنىن ايتتى. جيىن سوڭىندا الماتى اكىمى مەملەكەت باسشىسىنىڭ قولداۋى ارقاسىندا قالا ەكونوميكا مەن الەۋمەتتىك سالانىڭ بارلىق سەكتورىندا دامۋ قارقىنىنا يە بولعانىن جانە وسى قارقىندى ساقتاۋ ءۇشىن كۇش سالىناتىنىن اتاپ ءوتتى. مۇرات ايتقوجا. دەرەككوز: اقوردانىڭ سايتى. فوتو: www.uralskweek.kz.