«قازىرگى تاڭدا ءۇش نەگىزگى جاس توبى 18-29 جاس, 30-44 جاس, 45-65 جاس بويىنشا ەرەسەك حالىقتى پروفيلاكتيكالىق تەكسەرۋ پاكەتتەرىن قالىپتاستىرۋ بويىنشا جۇمىس جۇرگىزىلۋدە», دەدى اجار عينيات.
سونداي-اق ول اۋىلدى ەلدى مەكەندەردەگى حالىقتىڭ دەنساۋلىعىن قاداعالاۋ شارالارىنا توقتالدى.
«بۇگىندە قالا مەن اۋىل تۇرعىندارى اراسىندا پروفيلاكتيكالىق تەكسەرۋلەردىڭ قول جەتىمدىلىگىندە ديسبالانس ورىن العانى بارشاعا ءمالىم. وسىعان بايلانىستى اعىمداعى جىلى اۋىل تۇرعىندارى ءۇشىن پروفيلاكتيكالىق تەكسەرۋ پاكەتتەرىن, ونىڭ ىشىندە ءبىرىنشى كەزەڭدە اۋىلدىق مەديتسينالىق پۋنكتتەر بازاسىندا ەنگىزۋ جوسپارلانۋدا», دەدى مينيستر.
ۆەدومستۆو باسشىسى بالالار اراسىنداعى اۋرۋلاردىڭ الدىن الۋعا باعىتتالعان جۇمىستار تۋرالى مالىمەت بەردى.
«مينيسترلىك بالالاردىڭ دەنساۋلىعىن قورعاۋ جونىندەگى ءىس-شارالاردى ىسكە اسىرۋ شەڭبەرىندە الدىن الۋعا ەرەكشە نازار اۋداراتىن بولادى. ويتكەنى ەرەسەك حالىقتىڭ دەنساۋلىعىنىڭ نەگىزدەرى مەن بولاشاق اۋرۋلارىنىڭ العىشارتتارى ءدال بالالىق شاقتا قالانادى. وسىعان بايلانىستى جۇرگىزىلىپ جاتقان زەرتتەۋلەردىڭ اعىمداعى كولەمىن ەسكەرە وتىرىپ, بالالاردى پروفيلاكتيكالىق تەكسەرۋ پاكەتتەرى كەڭەيتىلەتىن بولادى», دەپ حابارلادى دەنساۋلىق ساقتاۋ ءمينيسترى.
اتالعان پاكەتتەردى تۇپكىلىكتى قالىپتاستىرۋ ءۇشىن نورماتيۆتىك-قۇقىقتىق اكتىلەرگە وزگەرىستەر ەنگىزۋ جانە پروفيلاكتيكالىق تەكسەرۋلەردى قارجىلاندىرۋ بويىنشا ءتيىستى ەسەپتەر جۇرگىزىلىپ جاتقانى ايتىلدى.
«بۇدان باسقا, مەكتەپ مەديتسيناسىن جەتىلدىرۋ شەڭبەرىندە جاڭا ستاندارت ەنگىزىلەتىن بولادى. بۇل وقۋشىلاردى كاسىپتىك قاراۋ تاسىلدەرىن جۇيەلەۋگە جانە اسقازان-ىشەك جۇيەسى, تىرەك-قيمىل اپپاراتى, كورۋ قابىلەتىمەن بايلانىستى جانە ت. ب. اۋرۋلاردى ەرتە انىقتاۋدى كۇشەيتۋگە مۇمكىندىك بەرەدى»,دەدى اجار عينيات.
