راس, ءسىز دە, مىنا ءبىز دە جوبا-جوسپاردىڭ باستاۋىن ءدال وسى دۇيسەنبىگە تىرەپ قويامىز. اپتانىڭ العاشقى كۇنى دەپ العا جەتەلەيتىن ايرىقشا ءبىر استار ىزدەسەك كەرەك. بۇل دا ءجون شىعار. الايدا ءدال وسى دۇيسەنبى تاپ-تاماشا جوسپاردىڭ تاس-تالقانىن شىعاراتىن كۇن سەكىلدى اسەر قالدىرادى كەيدە. ويتكەنى دۇيسەنبى دەگەنىڭ ەكى كۇندىك دەمالىستىڭ تۇيىندەلەر تۇسى ەمەس پە؟! ونىڭ كوبىمىز ءۇشىن اۋىر كۇن سانالاتىنى دا سوندىقتان.
ارينە, اپتانى جاقسى كوڭىل كۇيمەن باستاعان ءجون. بىراق ەكى كۇندىك ەركىن دەمالىس كوبىمىزدى جۇرىستەن جاڭىلدىرماي قويمايدى. سونىڭ سالدارى شىعار, دۇيسەنبى كۇنى ادامداردىڭ كوبى ساعات 11-گە دەيىن ك ۇلىمدەي المايدى ەكەن. ول ازداي قىزمەتكەرلەردىڭ ءبىرازى ءدال وسى كۇنى جۇمىسقا كەشىگىپ كەلەدى. ەندەشە ەرىك-جىگەرىمىزدى ەزىپ, ەڭسەمىزدى باسىپ تۇراتىن اپتانىڭ العاشقى كۇنىنە ەرتەڭىمىزدى بايلانىستىرۋدىڭ قاجەتى شامالى سەكىلدى. ايتپەسە, وزگەرىسكە باستار دۇيسەنبىسىن كۇتىپ بۇ دۇنيەمەن قوشتاسىپ كەتكەندەر قانشاما...
جازۋشى تولەن ابدىكتىڭ «قايىرسىز جۇما» دەگەن اڭگىمەسى ەسكە ءتۇسىپ وتىر. باس كەيىپكەر ابەن جۇمىس اپتاسىنىڭ سوڭعى كۇنى – جۇما كۇنى اياق استىنان قىزمەتىنەن الىناتىنى بار ەدى عوي. سويتسە, مۇنداي شەنەۋنىكتەردىڭ «شارۋاسىن ءبىتىرۋ» ءۇشىن بۇل كۇن ادەيى تاڭدالادى ەكەن. جوعارى جاقتا وتىرعاندار شىعارىلعان شەشىمنەن كەيىن ەشقايدا تەلەفون سوعىلماۋى ءۇشىن, سىرتتان وزدەرىنە دە تەلەفون سوقتىرماۋ ءۇشىن ادەيى وسىلاي ىستەيدى. بۇل بۇرىننان بار ءتاسىلدىڭ ءبىرى. جارىقتىق ابەن سونى كەش تۇسىنەدى.
ارينە, قازىرگى ۋاقىت باسقا, جاعداي بولەك. بىراق ستاتيستيكالىق دەرەكتەر دە دۇيسەنبىنىڭ كوپ ادام ءۇشىن قايىرلى بولا بەرمەيتىنىن كورسەتىپ وتىر. ماسەلەن, تىعىرىققا تىرەلىپ, تاعدىردان تۇڭىلگەن ادامداردىڭ دەنى دۇيسەنبى كۇنى جارىق دۇنيەنى تارك ەتەدى ەكەن. ينفاركتىڭ 20 پايىزى, ارقا جاراقاتىنىڭ 25 پايىزى ءدال وسى كۇنى تىركەلەدى. نەمىستەردىڭ زەرتتەۋىنە جۇگىنسەك, جۇرەك تالماسى دا كوپ جاعدايدا اپتانىڭ العاشقى كۇنىندە ورىن الادى ەكەن. ەۆرەيلەردىڭ دۇيسەنبى كۇنى توي جاسامايتىنى جانە بەلگىلى.
اق-قاراسى ارالاسىپ جاتاتىن ءومىر شىركىن ساتسىزدىكتەردىڭ ءبارىن دۇيسەنبىگە ءدوپ تۇسىرەدى ەكەن دەسەك تاعى قاتەلەسكەن بولامىز. ويتكەنى اپتانىڭ العاشقى كۇنى يسلام مەن يۋدايزمدە دۇعا جاساپ, اۋىز بەكىتۋ ءۇشىن قولايلى كۇن سانالادى. مۇسىلمان باۋىرلاردىڭ دۇيسەنبى كۇنى ءناپىل ورازا ۇستايتىنى ەسىڭىزدە بولار. ساياسي ومىردەگى جاھاندىق شەشىمدەردىڭ دە دۇيسەنبى كۇنى قابىلداناتىنىن ۇمىتپايىق. دۇيسەنبىنى شىنايى وزگەرىستەردىڭ باستاۋىنا اينالدىرىپ, جەتىستىكتىڭ جەلكەنىن كەرگەندەر دە ارامىزدا تولىپ ءجۇر.
ءار كۇن – اللانىڭ سىيى. وعان شاك كەلتىرەر ويىمىز جوق. ايتپاعىمىز, دۇيسەنبىنىڭ ءساتتى يا ءساتسىز كۇن ەكەنى ءبىزدىڭ سانامىزدا عانا قالىپتاسقان سەكىلدى. باسقاشا ايتساق, شەكتەۋدى قولدان جاساپ العاندايمىز.
دەگەنمەن اۋىر كۇننەن ارىلۋدىڭ ءبىر جولىن بىلەتىن سەكىلدىمىز. ول ءۇشىن اپتانىڭ العاشقى كۇنىن, ياعني دۇيسەنبىنى كۇنتىزبەدەن الىپ تاستاۋ كەرەك. ماسەلەن, 13 دەگەندە ەۋروپالىقتاردىڭ زارەسى ۇشادى. ال جاپونداردىڭ 4 دەگەندە دەنەسى تۇرشىگەدى. ولاردىڭ 4 سانىن قوعامدىق ومىردە قولدانبايتىنى دا سوندىقتان. ايتالىق, جاپونيادا ليفت نومىرلەرىنەن 4 تسيفرىن تاپپايسىز. تۇرعىن ۇيلەردە دە 4-ءشى ءنومىرلى پاتەر جوق. كوشەدەگى كولىكتەردىڭ نومىرىنەن دە بۇل سان بايقالمايدى. مىنە, وسىنداي ءادىس ارقىلى اپتانىڭ اۋىر كۇنىن – دۇيسەنبىنى ەلەۋسىز قالدىرۋعا بولاتىنداي. بالكىم, سوندا عانا جوسپارىمىز ءجۇز پايىز ورىندالىپ, جۇمىسقا دا جۇمىلا كىرىسەرمىز. سوندا وزگەلەر دە ومىرگە وزگەرىس اكەلەر دۇيسەنبىسىن كۇتىپ جۇرمەس ەدى.
«دۇيسەنبىدەن باستايمىننىڭ» ارعى جاعىندا موينى جار بەرمەس جالقاۋلىق جاتىر. ەندەشە ىزگى ءىس, ۇلى مۇرات ءۇشىن اپتانىڭ العاشقى كۇنىن كۇتۋدىڭ قاجەتى جوق. جاڭا ءومىر دۇيسەنبىدەن ەمەس, تاپ بۇگىن, وسى ساتتەن باستالادى.
ايتپاقشى, پسيحولوگيادا دۇيسەنبىگە ەرەكشە كوڭىل بولىنگەن. سالا ماماندارى جاڭا ءومىردى, جاڭا داعدىنى دۇيسەنبىدەن, كەلەسى ايدان, جاڭا جىلدان باستاۋ دۇرىس ەمەس دەپ سانايدى. ويتكەنى مۇنداي ماقسات-مىندەتتەردىڭ سوڭى كوپ جاعدايدا سۇيىلىپ كەتەدى. بۇل ءوزىمىزدى اقتاپ العانعا دا جاقسى. سەبەبى الدا تاعى ءبىر دۇيسەنبى كەلە جاتىر...
وقىپ وتىرعان وسى جازبانى دا دۇيسەنبىدەن باستاعىم كەلگەن...
