باعانىڭ ەڭ جوعارى جىلدىق ءوسىمى (اتىراۋ جانە ماڭعىستاۋ وبلىستارىن قوسپاعاندا) شىعىس قازاقستان (جىلىنا 22,2%-عا), جامبىل (14,9%-عا) جانە اقمولا وبلىستارىندا (14,5%-كە). ال وزگەلەرمەن سالىستىرعاندا باعا ەڭ از وسكەن ءوڭىر - سولتۇستىك قازاقستان وبلىسى (3,2%).
باتىس قازاقستان جانە قىزىلوردا وبلىستارىندا باعا وزگەرگەن جوق. كومىردىڭ تونناسى تارازدا 20,1 مىڭ تەڭگەگە ساتىلۋدا, سەمەيدە 11,4 مىڭ تەڭگە. بۇل ەڭ ارزان سانالادى.
بىلتىر كومىر باعاسى 5,2%-عا, ال 2020 جىلى — 3,3%-عا وسكەن بولاتىن.
«بيىل قاڭتاردا قازاقستاننىڭ كومىر ءوندىرۋشى كومپانيالارى 10,1 ميلليون توننا تاس كومىر, ليگنيت جانە كومىر كونتسەنتراتىن الدى. بۇل وتكەن جىلدىڭ قاڭتار ايىمەن سالىستىرعاندا 3,8%-عا از. ءوندىرۋ كولەمى بويىنشا ادەتتەگىدەي پاۆلودار وبلىسى الدا تۇر: 6,3 ميلليون توننا, جىلىنا مينۋس 3%. ەكىنشى جانە ءۇشىنشى ورىندا قاراعاندى (2,9 ميلليون توننا) جانە شىعىس قازاقستان وبلىسى (854,2 مىڭ توننا)», دەلىنگەن اقپاراتتا.
ءوندىرىستىڭ باسىم بولىگى, ياعني بارلىق كولەمنىڭ 89,8%-ى تاس كومىرگە تيەسىلى. بيىل قاڭتاردا 9,1 ميلليون توننا ءوندىرىلدى.
قازاقستان كومىرگە دەگەن ىشكى سۇرانىستى تولىقتاي قامتاماسىز ەتىپ وتىر. ەكسپورتقا دا ايتارلىقتاي كولەم كەتەدى. بىلتىر قازاقستاننان ەكسپورتقا 500,1 ميلليون دوللار سوماسىنا 29,2 ميلليون توننا كومىر جونەلتىلگەن.
قازاقستاندىق كومىر تمد ەلدەرىندە ۇلكەن سۇرانىسقا يە. ماسەلەن, وتكەن جىلى 392,6 ميلليون دوللارعا 23,2 ميليون توننا كومىر جونەلتىلدى. ەكسپورتتىڭ جالپى كولەمىنىڭ 65,1%-ى رەسەيگە جىبەرىلدى. ودان كەيىن تىزىمدە بەلارۋس جانە قىرعىزستان.
تمد-عا كىرمەيتىن ەلدەرگە قازاقستان 107,5 ميلليون اقش دوللارىنا التى ميلليون توننا كومىر ەكسپورتتادى. بۇل تىزىمدە شۆەيتساريا كوش باستاپ تۇر: 4,8 ميلليون توننا.
