اڭگىمەلەسۋ بارىسىندا ولار ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق ىنتىماقتاستىقتى ودان ءارى نىعايتۋعا ءمان بەرە وتىرىپ, قازاق-تۇرىك ستراتەگيالىق سەرىكتەستىگىنىڭ دامۋ پەرسپەكتيۆالارىن تالقىلادى.
قازاقستان كوشباسشىسى تۇركيا پرەزيدەنتى رەجەپ تايپ ەردوعانعا جۇرەكجاردى سالەمىن جولداپ, ونى قازاقستانعا ساپارمەن وسى جىلى كەلۋگە شاقىرعانىن تاعى دا ناقتىلادى. ساپار مەرزىمى ديپلوماتيالىق كانالدار ارقىلى پىسىقتالادى.
مەملەكەت باسشىسى كەلەسى اپتادا نۇر-سۇلتاندا وتەتىن قازاقستان مەن تۇركيانىڭ ساۋدا-ەكونوميكالىق ىنتىماقتاستىق جونىندەگى مەملەكەتارالىق كوميسسياسىنىڭ XII وتىرىسى ءوزارا ءتيىمدى سەرىكتەستىكتى ودان ءارى دامىتۋعا ىقپال ەتەتىنىن ايتتى. قاسىم-جومارت توقاەۆ تۇرىك كومپانيالارى قاتىساتىن بىرلەسكەن جوبالارعا قازاقستان ۇكىمەتى تاراپىنان قولداۋ كورسەتىلەتىنىن راستادى.
مەۆليۋت چاۆۋشوعلۋ كەزدەسۋگە مۇمكىندىك بەرگەنى ءۇشىن قازاقستان پرەزيدەنتىنە العىس ايتتى. سونداي-اق مينيستر قاڭتار وقيعاسى كەزىندە بولعان قايعىلى جاعدايلارعا بايلانىستى كوڭىل ايتىپ, قاسىم-جومارت توقاەۆقا رەجەپ تايپ ەردوعاننىڭ سالەمىن جەتكىزدى.
تۇرىك ديپلوماتى قازاقستان پرەزيدەنتىنىڭ باسشىلىعىمەن جۇزەگە اسىرىلىپ جاتقان ساياسي جانە ەكونوميكالىق رەفورمالاردى تۇركيانىڭ تولىق قولدايتىنى جونىندە ايتتى.
