بەيرەسمي فورماتتاعى كەزدەسۋگە مۇرىندىق بولعان جازۋشىلار وداعىنىڭ شىعىس قازاقستان وبلىسى فيليالىنىڭ ديرەكتورى الىبەك قاڭتارباەۆ كاتونقاراعايدان باستالعان ءىس-شارا وزگە وڭىرلەردە دە جالعاسىن تاباتىنىن ايتتى.
– شىعارماشىلىق-اقپاراتتىق كەزدەسۋدى قايدان باستايمىز دەگەندە, بىردەن كاتونقاراعايدان باستاۋ كەرەك دەدىم. نەگە دەگەندە, رۋحانياتتىڭ ۇيىسقان ءبىر جەرى وسى – كاتونقاراعاي. وزدەرىڭىز ءبىلىپ وتىرسىزدار, قاڭتار وقيعاسى كۇللى قازاق حالقىنا وڭاي بولعان جوق. ونى جۋىپ-شايىپ, قايتا ايتاتىن ەمەس. بۇل وقيعادان كەيىن پرەزيدەنت ۇندەۋىن جولدادى. سونداعى ايتقانى, شىنايى «جاڭا قازاقستان» قۇرۋ. تىڭداساڭىزدار, مەملەكەت باسشىسى كوكەيىمىزدە جۇرگەن كوپتەگەن ماسەلەنى, جۇيەدەگى كەمشىلىكتەردى اشىپ ايتىپ بەردى. قازىر پرەزيدەنتتىڭ موينىندا وتە اۋىر مىندەت تۇر. ەلدىگىمىزدى ساقتاپ قالايىق دەسەك, مەملەكەتىمىزدىڭ الەۋمەتتىك-ەكونوميكالىق جاعدايىن نىعايتامىز دەسەك, ق.توقاەۆتى قولداۋىمىز كەرەك, – دەدى الىبەك قاڭتارباەۆ.
ءوز كەزەكتەرىندە ءسوز العان قاتىسۋشىلار دا پرەزيدەنتتىڭ جۇرگىزىپ وتىرعان ساياساتىنا قولداۋ بىلدىرەتىندەرىن جەتكىزدى. قولداپ قانا وتىرعان جوق, شىنايى جاڭا قازاقستاننان ءۇمىت كۇتىپ وتىر. شەكارا شەبىندەگى اۋداننان تابان اۋدارماي وتىرعان اقىن, جۋرناليست جانىبەك قىزىر مەملەكەت باسشىسىنىڭ جۇمىسىنا ريزاشىلىعىن بىلدىرە كەلە, تۇرعىنداردىڭ سانى ەكى-ءۇش ەسە ازايىپ كەتكەن اۋدانداردىڭ جاعدايىن ەرەكشە نازارعا السا ەكەن دەگەن تىلەگىن دە ايتىپ قالدى.
– پرەزيدەنت – رۋحانيات ۋىزىنا تويعان ادام. امبە, بەلگىلى جازۋشى كەمەل توقاەۆتىڭ ۇلى. وسى ۋاقىت ىشىندە حالىقتىڭ سەنىمىنەن شىقتى. ەندى قازاقستاندى جاڭارتادى, كەمشىن تۇستارىن تۇزەيدى دەپ سەنەمىز. جالپى, كاتونقاراعايلىقتار – جاقسىلىقتان ءۇمىت كۇتىپ كەلە جاتقان ەل, – دەدى اقىن جانىبەك قىزىر.
ءيا, شەكارا اۋداندارىنداعى ەلدىڭ تۇرمىسى, حالىق سانىنىڭ ازايۋى – بۇگىنگى كۇننىڭ وزەكتى ماسەلەسى. بۇل تاقىرىپ قوزعالا قالسا, شەكارادا جاتقان ءار اۋىلدىڭ ازاماتى پىكىر بىلدىرۋگە ءازىر. ايتا كەتسەك, پرەزيدەنت بۇل پروبلەمانى دا ءوز نازارىنا الىپ, ۇكىمەتكە تاپسىرما بەرگەن-تۇعىن. جۋرناليستەر تاراپىنان دا بىرنەشە رەت قوزعالعان.
– 1997 جىلى ءايتىپ-ءبۇيتىپ جاتقان كەزدە كاتونقاراعاي قۇرىققا ءىلىنىپ كەتتى. وزدەرىڭىز بىلەسىزدەر, سول 1997 جىلدان كەيىن حالىقتىڭ جاپپاي قالاعا اندىزداۋى باستالدى. وعان دەيىن حالىقتىڭ قوپارىلا كوشۋى بولعان جوق. بىراق سول كەزدەن بەرى ۇكىمەتكە دە, پرەزيدەنتكە دە جازىلىپ كەلەدى. بايقايمىن, سەڭ سوگىلە باستاعان سياقتى, – دەپ ءوز ويىن ايتقان الىبەك قاڭتارباەۆ اڭگىمە اۋانىن شىعارماشىلىققا بۇردى.
رۋحاني كەزدەسۋدە بەلگىلى اقىن سەرىك قۇسانباەۆ ءان سالىپ, اقىن ەرمەك دايىرباەۆ ولەڭ وقىدى. مىناۋ پاندەميانىڭ كەسىرىنەن ولەڭ-جىرعا سۋساپ قالعان حالىق اقىن-جازۋشىلارعا, جۋرناليستەرگە قۇرمەت-قوشەمەت كورسەتتى. ءىس-شاراعا كورەرمەن رەتىندە قاتىسقان كوكباستاۋ نەگىزگى ورتا مەكتەبىنىڭ قازاق ءتىلى مەن ادەبيەتى ءپانى مۇعالىمى مەدەت ءادىلحانوۆ وزىمەن بىرگە ەرتە كەلگەن اقىن شاكىرتىن تانىستىرىپ, ەل اعالارى الدىندا جاس اقىن جاۋقازىن جىرلارىن وقىدى, ۇلكەندەردىڭ اق باتاسىن الدى. كەزدەسۋ سوڭىندا اۋداندىق ءماسليحات حاتشىسى دۇيسەن برالينوۆ زيالى قاۋىم وكىلدەرىنىڭ اۋىل جۇرتشىلىعىمەن وتكىزگەن تاعلىمدى جۇزدەسۋلەرى ءۇشىن اۋدان جۇرتشىلىعى اتىنان العىسىن ءبىلدىردى.
شىعىس قازاقستان وبلىسى,
كاتونقاراعاي اۋدانى
