«قازىر جاپپاي تارتىپسىزدىك كەزىندە جاراقات العان ءبىر پوليتسەيدىڭ جاعدايى اۋىر. وعان كۇردەلى وتا قاجەت. ال وزگە قىزمەتكەرلەر اۋرۋحانادان شىقتى» دەيدى ابزال گيليم.
ونىڭ ايتۋىنشا, وبلىستىق اكىمدىكتىڭ عيماراتىنا شابۋىل كەزىندە پوليتسيا قىزمەتكەرلەرىنەن 9 اتىس قارۋى تارتىپ الىنعان. قازىر ونىڭ تورتەۋى كەرى قايتارىلعان.
«جاپپاي تارتىپسىزدىككە قاتىسۋشىلار 1 مىڭنان استام قالقان, كاسكا جانە باسقا دا ارنايى قۇرالداردى زاڭسىز يەمدەنگەن. تارتىپ الىنعان قۇرالداردىڭ 52-ءسى تابىلدى. ال قالعانىن ىزدەۋ جالعاسىپ جاتىر. سول سەبەپتەن, تۇرعىنداردان ۇرلانعان قارۋلار مەن ارنايى قۇرالداردى پوليتسياعا تاپسىرۋعا شاقىرامىن. قارۋدى ەرىكتى تۇردە تاپسىرعان ازاماتتار زاڭمەن قۋدالانبايدى» دەپ ءمالىم ەتتى ول.
ارنايى پروكۋرورلاردىڭ باسشىلىعىمەن ۆەدومستۆوارالىق جەدەل-تەرگەۋ توپتارى جاپپاي تارتىپسىزدىككە قاتىستى 28 قىلمىستىق ءىستى تەرگەپ جاتىر.
«ونىڭ ىشىندە تەرروريزم اكتىلەرىنە قاتىستى 2, جاپپاي تارتىپسىزدىكتەردى ۇيىمداستىرۋ جانە قاتىسۋعا بايلانىستى 10, بيلىكتى باسىپ الۋعا شاقىرۋ دەرەگىمەن 1 قىلمىستىق ءىس بار. سونداي-اق, پوليتسياعا قارسى كۇش قولدانۋ بويىنشا 2, قارۋدى ۇرلاۋعا قاتىستى 1 قىلمىستىق ءىس تەرگەلىپ جاتىر. جاپپاي تارتىپسىزدىككە قاتىسۋشىلاردىڭ ءىس-ارەكەتى جازىلعان بەينەجازبالاردىڭ بارلىعى زەردەلەندى. زارداپ شەككەندەر مەن كۋالاردان جاۋاپ الىندى. سوت سانكتسياسىمەن 25 ادامعا بۇلتارتپاۋ شاراسى رەتىندە قاماۋعا الۋ قولدانىلدى. ءبىر ادام ءۇي قاماقتا وتىر» دەيدى ابزال گيليم.
