كوكتەم شىعا قار كوبەسى سوگىلىپ, مۇز بەتىندەگى قاۋىپ قايتا كۇشەيەدى. ادەتتەگىدەي تجد ماماندارى جۋىقتا ەسكەرتۋ جۇمىستارىن جۇرگىزدى. مۇز بەتىندەگى ەرەجە جازىلعان پاراقشانى تاراتىپ قانا قويعان جوق, بالىق بولىپ كيىنگەن ماماندار مۇز ويىپ, قارماق سالۋدىڭ ەرەجەلەرىن ەگجەي-تەگجەيلى قايتا ءبىر ءتۇسىندىردى. ەرەكشە كوستيۋمگە كوك مۇزدا شوقيىپ وتىرعان اۋەسقويلاردىڭ بارلىعى دەرلىك نازار اۋداردى. بالىق كەيپىندە جۇرۋلەرىنىڭ سەبەبى – ايتقان ەسكەرتۋلەرى بالىقشىلاردىڭ ەسىندە قالسىن دەگەندەرى.
– مۇز قالىڭدىعى 10 سانتيمەتردەن از بولسا, ادام ءۇشىن قاۋىپتى. تاۋلىكتىڭ قاراڭعى ۋاقىتىندا جانە بوران-شاشىندى, تۇماندى كۇندەرى مۇز بەتىنە شىعۋعا بولمايدى, – دەيدى بالىق بولىپ كيىنگەن قۇتقارۋشىلار.
ەرەجەگە سايكەس بالىقشىلار مۇز ايدىنىنا شىققاندا, قۇتقارۋ كەۋدەشەسىن كيىپ, ۇزىندىعى كەمىندە 12 مەتر ارقان الا شىعۋى كەرەك. مۇمكىندىگىنشە, سۋ وتكىزبەيتىن پاكەتكە سالىنعان ۇيالى تەلەفونى جانىندا بولعانى ابزال. ەگەر قاۋىپتى جاعدايعا تاپ بولسا, 112 نومىرىنە حابارلاسۋى كەرەك. الايدا جوعارىدا ايتىلعان قاراپايىم عانا ەرەجەلەر ەستەرىندە بولسا, قاۋىپتى جاعدايعا تاپ بولۋى ەكىتالاي.
شىعىس قازاقستان وبلىسى
