رەيتينگتىك جارىستا قازاقستاننىڭ تۋى استىندا 28 گرەك-ريم كۇرەسى شەبەرى ونەر كورسەتەدى. بوزكىلەمگە شىعاتىندار اراسىندا ايدوس سۇلتانعالي (60 كيلو), مەيىرجان شەرماحانبەت (67 كيلو) جانە دەمەۋ جادىراەۆ (77 كيلو) سىندى بالۋاندار بار. ولاردىڭ ۇشەۋى دە ءار جىلدارى دۇنيەجۇزىلىك دودالاردا جۇلدە العان. اتاپ ايتساق, دەمەۋ وسىدان بەس جىل بۇرىن فرانتسيانىڭ استاناسى – پاريجدە كۇمىسپەن كۇپتەلسە, ايدوس پەن مەيىرجان 2018 جىلى ماجارستاننىڭ باس شاھارى – بۋداپەشتتە قولاعا قول سوزدى. ازيا چەمپيوناتىندا اتوي سالعان سۇلتان اسەت ۇلى (67 كيلو), ماقسات ەرەجەپوۆ پەن تەمىرلان شادۋكاەۆ (77 كيلو), ازامات كۇستىباەۆ پەن نۇرسۇلتان تۇرسىنوۆ (87 كيلو) جانە ءالىمحان سىزدىقوۆقا دا (130 كيلو) ۇلكەن سەنىم ارتىلىپ وتىر. وسى ساقا سپورتشىلارىمىزدان بولەك, بۇل باسەكەدە ءبىر شوعىر دارىندى جاس تا بوزكىلەمگە شىعىپ, ءوز ونەرلەرىن ورتاعا سالادى.
