ايماقتار • 21 اقپان، 2022

قاڭتار وقيعاسى: الماتى اۋەجايىنا شابۋىل جاساعاندار ۇستالدى

4075 رەت كورسەتىلدى

ءىىم تەرگەۋ دەپارتامەنتىنىڭ باستىعى سانجار ءادىلوۆ الماتى اۋەجايىن باسىپ الۋعا قاتىسقانداردىڭ ۇستالعانىن حابارلادى، دەپ جازادى Egemen.kz.

«جەدەل ءىس-شارالار بارىسىندا الماتىنىڭ شاڭىراق-2 شاعىن اۋدانىندا ەكى ادام ۇستالدى، ولاردان تاپانشالار مەن اۆتوماتتارعا تيەسىلى 5 مىڭ پاترونى بار مىرىش جاشىكتەرى، قالقاندار مەن تىزە توسەگىشتەر تۇرىندەگى ارنايى قۇرالدار، ەكى تانككە قارسى جاۋىنگەرلىك سنارياد، تەگىس ۇڭعىلى مىلتىق، جەتى پنەۆماتيكالىق مىلتىق پەن تاپانشا الىندى»، دەپ ناقتىلادى سانجار ءادىلوۆ.

ءىىم تەرگەۋ دەپارتامەنتىنىڭ باستىعى جاپپاي تارتىپسىزدىك كەزىندە جەڭىل اۆتوكولىكتەگى كۇدىكتىلەر توبى «ورۋجەينيك» اڭشىلىق دۇكەنىن توناپ، 15 تەگىس ۇڭعىلى مىلتىق پەن 4 ويىق، ونىڭ ىشىندە وپتيكالىق كوزدەۋى بار كارابيندى ۇرلاپ كەتكەنىن ايتتى.

ۇرلانعان قارۋ ودان ءارى وتكىزۋ ماقساتىندا الماتى مەن الماتى وبلىسىندا ارنايى جابدىقتالعان سحرونداردا زاڭسىز ساقتالعان.

«تەرگەۋ بارىسىندا اتالعان ادامداردىڭ الماتى حالىقارالىق اۋەجايىن باسىپ الۋعا قاتىسقانى انىقتالدى»، دەدى سانجار ءادىلوۆ.

ەسكە سالا كەتسەك، قاڭتارداعى تارتىپسىزدىكتەردەن كەيىن اۋەجاي ءبىر اپتا بويى جۇمىس ىستەمەدى.

اۋەجاي قىزمەتكەرلەرىنىڭ ايتۋىنشا، كۇدىكتىلەر جالعا الۋشىلاردىڭ بۋتيكتەرىن قيراتىپ، اينەكتەر مەن بەينەكامەرالاردى سىندىردى.

19 قاڭتاردا اۋەجاي شتاتتىق رەجيمدە جۇمىس ىستەي باستادى. اۋەجايعا كەلتىرىلگەن زالال ءالى دە ەسەپتەلۋدە.

سوڭعى جاڭالىقتار

اينالما جولدىڭ ازابى

ايماقتار • كەشە

ۇقساس جاڭالىقتار