«بۇرقاسىن-2022» ءىس-شاراسىن ەلوردا اكىمدىگى ۇيىمداستىردى.
فەستيۆال بارىسىندا قاتىسۋشىلار 10 سپورت ءتۇرى بويىنشا سىنعا تۇسەدى: شاڭعى جارىسى, گىر كوتەرۋ, ارمرەستلينگ, بەلبەۋ كۇرەسى, ارقان تارتۋ, پيمالى حوككەي, قار اتۋ, اۆتوسپورت, موتوسپورت جانە قىسقى فۋتبول. ءداستۇرلى تۇردە شاڭعى جارىسىنان قاتىسۋشىلار سانى باسىم.
«بۇرقاسىن-2022» فەستيۆالى 22 مارتە وتكىزىلىپ وتىر. بيىل فەستيۆال باعدارلاماسىنا تاعى 2 سپورت ءتۇرى قوسىلدى: بەلبەۋ كۇرەسى جانە قول كۇرەسى. باعدارلاماعا ەنگىزىلگەن سپورت تۇرلەرى قالا تۇرعىندارىنىڭ ۇسىنىسى نەگىزىندە ىرىكتەلدى. ەكى مىڭنان استام قاتىسۋشى تىركەلگەن, ولاردىڭ ىشىندە اسكەري بولىمشەلەر دە بار. قاتىسۋشىلاردىڭ جاسى ءارتۇرلى. مىسالى, شاڭعى جارىسىنا 4 جاستاعى بالالار, گىر سپورتىنا 16-18 جاس ارالىعىنداعى بالالار قاتىسا الادى», دەدى ەلوردالىق سپورت باسقارماسى باسشىسىنىڭ م.ا. سامات جىلقىباەۆ.
«بالالاردىڭ وسى ءىس-شاراعا قاتىسىپ جاتقانى قاتتى قۋانتادى. سەبەبى بۇقارالىق سپورتتى دامىتۋ جانە سالاۋاتتى ءومىر سالتىنا باۋلۋ بالالىق شاقتان باستالادى. سول سياقتى اتا-انالاردىڭ دا بالالارىن سپورتقا باۋلىپ جاتقانى قۋانتادى. فەستيۆالدىڭ اشىلۋىمەن قۇتتىقتايمىن», دەپ اتاپ ءوتتى فەستيۆالدىڭ قۇرمەتتى قوناعى وليمپيادا چەمپيونى سەرىك ساپيەۆ.
ەستەرىڭىزگە سالا كەتەيىك, فەستيۆال نۇر-سۇلتان قالاسىنىڭ تۇرعىندارى مەن جاستارى اراسىندا بۇقارالىق سپورتتى دامىتۋ, سالاۋاتتى ءومىر سالتىن ناسيحاتتاۋ ماقساتىندا وتكىزىلەدى.
