22 جاستاعى جەرلەسىمىزدىڭ بيىل رەسەي بىرىنشىلىگىندە ونەر كورسەتەتىنى بۇعان دەيىن بەلگىلى بولعانىمەن, «زەنيت» وتانداسىمىزدى تەك كۇنى كەشە عانا جانكۇيەرلەرگە رەسمي تۇردە تانىستىردى. اقتاۋ فۋتبول مەكتەبىنىڭ تۇلەگى سانالاتىن نۇرالى ءالىپ 2015 جىلى «قايرات» اكادەمياسىنا قابىلدانىپ, 2018 جىلدان بەرى كلۋبتىڭ نەگىزگى قۇرامىندا ويناپ كەلدى.
وسى ۋاقىت ارالىعىندا ول «قايرات» جەيدەسىمەن 99 كەزدەسۋدە الاڭعا شىعىپ, 5 گول جانە 4 ناتيجەلى پاستى ءوز ەنشىسىنە جازدى. الماتىلىق كلۋبپەن بىرگە ول 2020 جىلى قازاقستان چەمپيوناتىندا توپ جارىپ, ەكى مارتە (2018, 2021) قازاقستان كۋبوگىن جەڭىپ الدى. سونداي-اق 2018 جانە 2019 جىلدارى ەل بىرىنشىلىگىنىڭ كۇمىس جۇلدەگەرى اتاندى. ال قازاقستان قۇراماسى ساپىندا 12 كەزدەسۋ وتكىزدى.
رەسەيلىك كوماندا وتانداسىمىزدى ساتىپ الۋ قۇقىعى بويىنشا ءبىر جىلعا جالعا الدى. ءالىپ «زەنيت» ساپىندا 28 نومىرمەن ونەر كورسەتەدى. ايتا كەتەيىك, قازاقستاندىق قورعاۋشى «زەنيتتىڭ» قىسقى ماۋسىمداعى ەكى بىردەي وقۋ-جاتتىعۋ جيىنىنا شاقىرتۋ الىپ, جولداستىق كەزدەسۋلەردە دانيالىق «ميتيۋللاند» جانە «بروندبيۋ» كلۋبتارىنىڭ قاقپاسىنا گول سوقتى.
