باس پروكۋرور عيزات نۇرداۋلەتوۆ «قاسىرەتتى قاڭتار» وقيعاسىنا قاتىستى تەرگەۋ جۇمىستارىنىڭ بارىسى تۋرالى باياندادى. ول ءوز سوزىندە قازىرگى ۋاقىتتا 3024 قىلمىستىق ءىس بويىنشا تەرگەۋ امالدارى جۇرگىزىلىپ جاتقانىن تىلىنە تيەك ەتتى. ارناۋلى پروكۋرورلاردىڭ باسشىلىعىمەن ۆەدومستۆوارالىق تەرگەۋ توبى جاپپاي تارتىپسىزدىكتەر مەن تەررورلىق اكتىلەر بويىنشا 177 ءىستى قاراپ جاتقانىن دا ايتىپ ءوتتى.
ۇستالعانداردىڭ تۇلعالارى انىقتالعان سوڭ, سونداي-اق دەنساۋلىق جاعدايلارىنا بايلانىستى جانە باسقا دا ماتەريالدار بويىنشا 109 ازاماتتىڭ قاماۋعا الۋ جازاسى كەتىپ قالماۋ جونىندەگى قولحاتپەن جانە جەكە كەپىلدىك بەرۋمەن الماستىرىلعان. پروكۋرورلار ازاماتتاردىڭ تارتىپسىزدىككە قاتىسى بار ەكەنى دالەلدەنبەگەنىن نەگىزگە الا وتىرىپ, تاعى دا 103 ادامدى بوساتقان. ۇستالعانداردى ازاپتاۋ تۋرالى ءاربىر حابارلاما ءجىتى تەكسەرىلگەن. جالپى پروكۋراتۋراعا ۇستالعاندار تاراپىنان 305 شاعىم تۇسكەنى بەلگىلى بولدى. قۇقىق بۇزۋشىلىققا قاتىستى 62 شاعىم دايەكتىڭ جوقتىعىنا بايلانىستى راستالماعان. ازاپتاۋ جانە بيلىگىن اسىرا پايدالانۋ دەرەگى بويىنشا 170 قىلمىستىق ءىس قوزعالعان.
ء«اربىر ءىستى ەگجەي-تەگجەيلى تەكسەرەمىز جانە بۇلتارتپاس دالەلدەر بولعان جاعدايدا عانا كىنالىلەردى جاۋاپكەرشىلىككە تارتامىز», دەدى باس پروكۋرور شۇعىل كەڭەستە ءوز ويىن ءبىلدىرىپ.
