«مەملەكەت باسشىسى ۇكىمەتتىڭ سوڭعى كەڭەيتىلگەن وتىرىسىندا بىرقاتار ناقتى تاپسىرمالار بەرىپ, بولاشاقتا اتقارىلاتىن جۇمىستاردى بەلگىلەدى. الدا تۇرعان اۋقىمدى ىستەردىڭ باسىم كوپشىلىگى – حالىقتىڭ ءال-اۋقاتىن كوتەرۋ مەن ەلىمىزدىڭ ەكونوميكاسىن جاقسارتۋعا باعىتتالعان ناقتى قادامدار بولىپ وتىر. مەملەكەت باسشىسى قاڭتار ايىنداعى سوزىندە دە ەلىمىزدىڭ جاعدايىن جاقسارتۋ جونىندەگى جۇمىستىڭ جالعاساتىندىعىن ايتقان بولاتىن. ونى حالىق دۇرىس قابىلداپ, دۇرىس ءتۇسىنىپ وتىر.
ونىڭ ىشىندە نەگىزگى باسىمدىقتاردىڭ ءبىرى - كوپتەن بەرى شەشىلمەي جۇرگەن بيۋدجەتتىك قالىپتاستىرۋ, بيۋدجەتتىك ارا-قاتىناس ماسەلەسى. بىزدە ءبىراز قارجى كولەمدەرىن جەرگىلىكتى جەرگە قالدىرۋ ماسەلەسى ايتىلىپ كەلە جاتقانىنا كوپ بولدى. ياعني, جەرگىلىكتى جەردەگى حالىقتىڭ مۇڭ-مۇقتاجىن شەشۋگە, ينفوقۇرىلىم ماسەلەلەرى بار, جالپى الەۋمەتتىك جاعدايىن جاقسارتۋعا جۇمسالاتىن قارجىلاردى ورنىمەن پايدالانۋ كەرەك بولىپ وتىر», دەدى نۇرلان بەكنازاروۆ.
ول پرەزيدەنتتىڭ تابىس كوزى مەن ورتاشا ايلىق اراسىنداعى الشاقتىقتى ناقتى كوزبوياۋشىلىق دەگەنىن اتاپ ءوتتى. وسى ورايدا كوپتەگەن ازاماتتاردىڭ ومىردەگى تۇرمىس جاعدايى مەن قاعاز جۇزىندەگى ستاتيستيكا سايكەس كەلمەيتىنىن ايتتى.
«اۋىلدىق ەلدى مەكەندەرگە باسا نازار اۋدارىلىپ وتىر. ول ماسەلەلەر سەنات قابىرعاسىندا دا قارالىپ كەلەدى. پرەزيدەنتتىڭ وسى ماسەلەگە قاتىستى تولىق كولەمدە قارجىلاندىرۋ تۋرالى تاپسىرماسىنىڭ ماڭىزى زور.
بىزدە 2186-داي اۋىلدىق ەلدى مەكەن بار. 2021 جىلى پرەزيدەنتتىڭ تاپسىرماسىنا سايكەس سول ەلدى مەكەندەردىڭ, اۋىل مەن سەلو اكىمدەرىن حالىق ءوزى سايلاپ الدى. ياعني, حالىق سەنىم بىلدىرگەن اكىمدەردىڭ ارى قارايعى جۇمىسى كوپ جاعدايدا قارجىعا كەلىپ تىرەلەدى. ورتاشا ەسەپپەن الاتىن بولساق, قازىرگى ستاتيستيكا جالپى وزدەرىنىڭ سالىقتارى مەن جيناعان قاراجاتى 100 پايىز قاجەتتىلىكتىڭ 17 پايىزىن عانا جاۋىپ وتىر. سوندىقتان بۇل جەردە حالىقتىڭ مۇڭ-مۇقتاجىن شەشۋ ءۇشىن جەرگىلىكتى جەردە سايلانعان اكىممەن بىرلەسە وتىرىپ, اۋىلدىق ەلدى مەكەندەردىڭ قوسىمشا سالىق تۇرلەرىن وزدەرىنە قالدىرۋ ماسەلەسى قارالىپ وتىر. مەملەكەت باسشىسىنىڭ تاپسىرماسىنا سايكەس, قارجى جانە ەكونوميكا مينيسترىلىكتەرىنىڭ ماماندارى ماسەلەنى الدىن الا پىسىقتاپ, زەردەلەپ شىعۋ كەرەك. ويتكەنى اۋىلدىق ەلدى مەكەنگە قالدىرىلعان قارجى بارلىق ماسەلەنى شەشەدى», دەدى ول.
