داۋدىڭ باسى Damumed-تە مە, دارىگەرلەردە مە؟

زەرتتەۋدىڭ ناتيجەسى جاقسى ەمەس

سۇيەگىڭ سىرقىراپ سۇيرەتىلىپ جەتكەندە كىرىڭىز دەپ كەزەگىن بەرە قوياتىن كەڭ جۇرەكتىلەردى كەيدە شىراق ىزدەپ تاپ­پايسىڭ. باسقا امالىڭ بولماعاسىن باس­قالار سياقتى كەزەككە تۇرىپ, كۇ­تۋگە تۋرا كەلەدى. بىراق سوڭعى كەزدە ەلى­مىز­دەگى تسيفر­لاندىرۋ جۇمىستارىنىڭ ناتي­جەسىندە بىرقاتار مەكەمە وزدەرىنىڭ قىزمەتتەرىن اناعۇرلىم جەڭىلدەتىپ ءھام جەدەلدەتىپ اتقاراتىنداي كۇيگە جەتتى. ونىڭ ءبىر ۇشى دەنساۋلىق ساقتاۋ سالاسىنداعى قاعازباستىلىقتان ارىلۋعا الىپ كەلدى.

مەملەكەتتەگى مەديتسينالىق مەكەمەلەرگە ءتۇرلى قوسىمشا ورناتىلىپ, ەل يگىلىگىنە بەرىلگەندە قۋانعانىمىز بەلگىلى. سونىڭ ءبىرى – Damumed ەلەكتروندى مەديتسينالىق سەرۆيستەرىنىڭ ءموبيلدى قوسىمشاسى. قوسىمشانىڭ كومەگىمەن پايدالانۋشىلار قابىلداۋعا جازىلا الادى نەمەسە دارىگەردى ۇيگە شاقىرۋعا مۇمكىندىگى بار.

جازىلعان رەتسەپتىلەر مەن زەرتحا­نا­لىق زەرتتەۋلەردىڭ ناتيجەلەرىن كورۋگە, اۋرۋحانالىق پاراقتاردى كوشىرىپ الۋعا مۇمكىندىگى بار. «دابىل تۇيمەسى» فۋنكتسياسى 5 جاسقا دەيىنگى بالالاردىڭ اتا-انا­­لارىنا, جۇكتى ايەلدەرگە جانە ديس­پان­سەرلىك باقىلاۋدىڭ جەكەلەگەن توپ­­تارى بويىنشا پاتسيەنتتەرگە شۇ­عىل, ءبىر رەت باسۋ ارقىلى دارىگەردى ۇيگە شا­قى­رۋعا بولادى. قازىرگى ۋاقىتتا قو­سىمشا مەن­شىك نىسانىنا قاراماستان مەم­لەكەت­تىك تاپسىرىس شەڭبەرىندە حا­لىق­قا قىز­مەت كورسەتەتىن بارلىق مەدي­تسينالىق ۇيىمدا قولدانىسقا ەنگىزىلگەن.

زەرتتەۋدىڭ ناتيجەسى جاقسى ەمەس

Damumed Apple جانە Android وپە­راتسيالىق جۇيەلەرىن پايدالانۋشىلار ءۇشىن قولجەتىمدى. ءموبيلدى قوسىمشانى ەنگىزۋ مەديتسينالىق مەكەمەلەردەگى كە­زەكتى ايتارلىقتاي ازايتۋعا, بولا­شاقتا تۇپكىلىكتى جويۋعا مۇمكىندىك بە­رەدى. قازاقستاننىڭ تسيفرلاندىرۋ باع­دارلاماسى اياسىندا دەنساۋلىق ساقتاۋ سالاسى 2018 جىلدىڭ باسىنان باستاپ قاعازسىز مەديتسيناعا كوشۋ مىندەتىن العا قويعان. ءبىر سوزبەن ايتقاندا, Damumed – كەشەندى مەديتسينالىق اقپاراتتىق جۇيە­نىڭ رەسمي قوسىمشاسى.

بىلتىر ءال-فارابي اتىنداعى قا­زاق ۇلتتىق ۋنيۆەرسيتەتىنىڭ مەديتسينا جانە دەنساۋلىق ساقتاۋ فاكۋلتەتى مەن س.ج.اسفەندياروۆ اتىنداعى قازاق ۇلت­تىق مەديتسينالىق ۋنيۆەرسيتەتىنىڭ ۇستاز­دارى الماتى قالاسىنداعى «№3 قالا­لىق ەمحانا مكك» پاتسيەنتتەرىنىڭ Damumed مەديتسينالىق ءموبيلدى قوسىم­شاسىنا قاناعاتتانۋ دەڭگەيىن انىق­تاۋ ماسەلەسى بويىنشا پىكىرىن زەرتتەۋ ءۇشىن ساۋالداما ازىرلەپ, جۇرگىزگەن.

«بۇل زەرتتەۋدە پاتسيەنتتەردىڭ دارى­گەرگە حابارلاما جازۋ جانە قوسىمشادا دەنساۋلىعىنا قاتىستى دارىگەر جازبالارىن كورە الۋ مۇمكىندىگى انىقتالدى. پاتسيەنتتەردىڭ 100 %-ى دارىگەرگە قوسىم­شا ارقىلى حابارلاما جازا المايتىنىن كورسەتكەن. سەبەبى Damumed ءموبيلدى قوسىمشاسىندا دارىگەرگە حابارلاما جازۋ قىزمەتى جۇزەگە اسىرىلماعان. سو­نى­مەن قاتار 100 % رەسپوندەنتتەر دارى­گەر قابىلداۋىنىڭ مەديتسينالىق جازباسىن قوسىمشادا كورە المايدى. ياعني بۇل فۋنكتسيا دا Damumed ءموبيلدى قو­سىم­شاسىندا جۇزەگە اسىرىلماعان. دەمەك پاتسيەنتكە مەديتسينالىق جازبا قاجەت بولعان جاعدايدا ەمحاناعا قايتا جۇگىنۋ كەرەك بولادى. شجق «№3 قالالىق ەمحاناعا» كەلۋشىلەردىڭ 30,4%-ى عانا Damumed مەديتسينالىق ءموبيلدى قوسىمشاسىن قولدانادى. باسىم بولىگى, ياعني قالعان 69,6%-ى اتال­عان قوسىمشانى قولدانبايدى. بۇل كور­سەتكىش جوعارىدا كورسەتىلگەن رەس­پون­دەنت­تەردىڭ جاس قۇرامىنا بايلانىس­تى بولۋى مۇمكىن. ەمحانادا زەينەتكەر­لەر جەتەكشى ورىندى العاندىقتان ولار­عا Damumed ءموبيلدى قوسىمشاسىن قولدا­نۋ قيىنعا سوعۋى ىقتيمال نەمەسە قوسىم­شا كەرەك ەمەس. «№3 قالالىق ەمحانا» پاتسيەن­تتەرىنىڭ Damumed مە­دي­­تسينالىق ءموبيلدى قوسىمشاسىن قول­­دانۋدان باس تارتۋىنىڭ باستى سە­بەپ­­تەرى كورسەتىلگەن. جالپى الىنعان ما­لى­مەتتەر بويىن­شا, پاتسيەنتتەردىڭ 19,6%-ى قوسىمشانى وزى­نە قاجەت ەمەس دەپ سانايدى, 31,6%-ى­ قوسىمشا جايلى بىل­مەيدى, ال 10%-ى قىز­مەتتىڭ ساپاسىنا قاناعاتتانبايدى, باسىم بولىگىندە (38,8%-ى) قوسىمشانى پايدالانۋعا بايلانىستى كۇردەلىلىكتەر تۋىندايدى. دەرەكتەردى تالداي كەلە, قوسىمشا ار­قىلى مەديتسينالىق قىزمەت ءاردايىم ۋاق­تىلى جاسالمايدى دەپ ايتۋعا بولادى, ياعني 54,4% رەسپوندەنت قوسىمشا ارقىلى مەديتسينالىق قىزمەت ءاردايىم ۋاقتىلى جاسالمايدى دەپ كورسەتكەن. وسىلايشا, ەر ادامداردىڭ 24,4%-ى مەن ايەل ادامداردىڭ 30%-ى جاۋاپ بەر­دى, ال مۇنىمەن ەرلەردىڭ 14%-ى مەن ايەل­دەردىڭ 10,8%-ى كەلىستى. بۇل كورسەتكىش Damumed قوسىمشاسىندا تۋىندايتىن كەيبىر قاتەلىكتەرمەن جانە دارىگەرلەردە شۇعىل باسقا جۇمىستاردىڭ شىعىپ قالۋىمەن بايلانىستىرىلدى», دەيدى زەرتتەۋ جۇرگىزگەن ماماندار.

كورسەتىلگەن مەديتسينالىق قىزمەت تۇر­­لەرىنە سايكەس ەرلەردىڭ 24%-ى مەن ايەل­­دەردىڭ 15,2%-ى قاناعاتتان­دى­رىل­دى دەگەنمەن ەرلەردىڭ 14,8%-ى مەن ايەل­­دەردىڭ 26,8%-ى قاناعاتتانبايدى دەپ ايتۋ­عا بولادى. 41,6% ساۋالداماعا قاتى­سۋ­شىلاردىڭ قاناعاتتانباۋىنىڭ نە­گىزگى سەبەپتەرىنە – قىزمەت تۇرلەرىنىڭ از­دىعى مەن باسقا دا مەديتسينالىق قىز­مەت تۇر­لەرى ەنگىزىلمەگەنىمەن بايلانىس­تىردى.

سەرگەلدەڭگە سالاتىن قوسىمشا

حالىقتىڭ ۋاقىتىن ۇنەمدەپ, قول­ۇشىن بەرەدى دەگەن قوسىمشانىڭ وت­كەن جىلدان بەرى باسىنان داۋ ارىلماي تۇر­­عانىن الەۋمەتتىك جەلىلەردەگى ءار­تۇر­لى جازبالاردان, ءتىپتى قوسىمشانى جۇك­­­تەۋگە ارنالعان سەرۆيستىڭ بەتىندەگى پىكىر­­لەردەن اڭعارۋعا بولادى. كىنا كىمدە, كىنارات نەدە؟

ماسەلەن, الەۋمەتتىك جەلىدە دينا ەسىم­دى نۇر-سۇلتان قالاسىنىڭ تۇرعىنى قو­سىم­شاداعى ولقىلىقتاردىڭ كەسىرىنەن قان­شاما ۋاقىتىن جوعالتقانىن جازدى.

«تامىز ايىندا كورونوۆيرۋسپەن اۋىر­­عان بالانى مەديتسينالىق تەكسەرۋ­دەن وتكىزۋ كەرەك بولدى. ما­ماندارعا جا­­زىلۋ ءۇشىن (وفتالمولوگ, نەۆراپوتو­لوگ, ەندو­كرينولوگ, گينەكولوگ) الدى­مەن ۋچاس­­كەلىك دارىگەرگە جازىلاسىڭ. ءتار­تىبى سولاي. ەمحانانىڭ تەلەفونى ارقى­لى جازىلۋ مۇمكىن بولمادى, كو­تەر­مەيدى. ءبىر كۇنىم سوعان كەتتى. سو­دان سوڭ Damumed ارقىلى جازىلدىم. تۋرا 8 كۇننەن كەيىن بوس ورىن بار ەكەن. جازىلدىق. بەلگىلەنگەن ۋاقىت­قا دارى­گەر­دىڭ كابينەتىنە كەلدىك. وفتال­مولوگ +5 كۇن, ەندوكرينولوگكە جازىلۋ جابىق, ەندى كەلەسى ايعا جازىلۋ ءۇشىن تاعى 20 كۇننەن كەيىن قايتادان بىزگە جا­زىلىپ, سودان كەيىن جولداما الاسىز. نەۆروپاتولوگ بالالاردىكى جوق, وفتال­مولوگكە كەلگەندە ءبىر حابارى بولار, بالالار گينەكولوگى ەڭبەك دەمالىسىنا شى­عىپ كەتكەن دەيدى. سونشا ۋاقىت كۇتكىم كەلمەيدى دەپ ەدىم, وندا اقىلى بولىمگە جازىلىپ, سولاردان ەم الىڭىز دەيدى. ول جاقتىڭ اقشاسى دا از ەمەس», دەيدى د.تۇرارقىزى.

ءسوزىن جالعاستىرعان كەيىپكەرىمىز نە­گى­­زى قوسىمشانىڭ كومەگى كوپ ەكەنىن دە جا­­سىر­مادى.

«ۋچاس­كەلىك دارىگەرگە ەش كەدەرگىسىز جا­­زىلا بەرەتىنبىز. بىراق سوڭعى كەزدە ۋچاس­­كەنى اۆتوماتتى تۇردە اۋىستىرىپ جىبە­رەدى دە, باسقا دارىگەرگە جازادى. سو­سىن ەمحانادا كىمگە كىرەرىڭدى بىلمەي جۇرە­سىڭ. اتالعان قوسىمشادا بولەك ما­مان­دارعا جازىلۋ فۋنكتسياسى بار, بىراق ولارعا تەك ۋچاسكەلىك دارىگەر­دىڭ قاراۋىنان كەيىن جازىلۋعا بولادى. ارينە, ءمامس تالاپتارى سولاي شىعار. بىراق ءدال قازىر بولەك دارىگەرلەرگە جازىلۋ مۇمكىن بولماي تۇر. اناليزدەردى ىزدەپ شارشامايسىڭ, بارلىعى ءبىر جەردە, قاجەت بولسا جۇكتەپ الاسىڭ. سوسىن Damumed جەكە كومپانيانىڭ قولىندا, مەملەكەتتىڭ قاتىسى جوق دەگەن ايتىلىپ ءجۇر. سوندا ءبىزدىڭ مالىمەتتەرىمىز كىمنىڭ قولىندا؟ وسى ماسەلە دە الاڭداتادى», دەيدى ول.

ايگەرىم ەسىمدى الەۋمەتتىك جەلى قول­دانۋ­شىسى دا كەيبىر كەلىسپەۋشىلىكتەرىن ورتاعا سالدى.

«تەراپەۆت, ارناۋلى مامان دەگەندەرگە جازىلۋ ماسەلەسى شيكى. كوپتەگەن ادام ءدال كەزەككە جازىلعان كۇنى بارا الماي قالادى. ءسويتىپ, كەلەسى كەزەككە جازىلساڭ, تاعى دا 20-25 كۇن كۇتەسىڭ, ءدال سول كەزدە دارىگەرگە ۋاقىتىمەن كەلسەڭ كىردىڭ, كەلمەسەڭ تاعى قالدىڭ. ال اۋىرىپ جۇرگەن ادامدى كەزەككە جازدىرىپ, اپتالاپ كۇتتىرەتىندەرى مۇلدە كۇلكىلى. سوسىن ۋاقىتىندا كەلمەي قالعان ادامدار جازىلۋدىڭ كۇشىن جويمايدى. ەگەر كۇشىن جويىپ وتىرسا, باسقا كەزەك كۇتىپ وتىرعان ادامعا جاقسى بولار ەدى. كەيدە قوسىمشادا مۇلدە بارماعان دارىگەرگە باردىڭ دەپ تىزىمگە جازىپ قوياتىندارى دا بار. قولداۋ 24/7 قوسىمشاسى ارقىلى ەكى رەت ارىزداندىم. بىراق قانشاما ادام بار, Damumed قوسىمشاسىن پايدالانبايتىن. نەگىزى, قوسىمشانىڭ پايداسى كوپ, اسىرەسە وسىنداي الاياقتىق جاسايتىن ورتالىقتاردى ءبىلىپ وتىراسىڭ», دەيدى ول.

ال زايرا ەسىمدى ازاماتشا مۇلدە بار­­ماعان, قارالماعان دارىگەردە ونىڭ اتى-ءجونى تۇرعانىن كورگەن.

«Damumed-تە بىرنەشە رەت اناليز تاپسىرىپپىن, تەراپەۆت قابىلداپتى, بۇيرەگىم اۋىرىپتى, ورۆي دياگنوزىن دا بىرنەشە رەت قويىپتى. ەڭ قىزىعى, ەڭبەككە جارامسىزدىق پاراعىن الىپپىن. Damumed-تەن بارماعان ەمحانانىڭ جازبالارىن بىرنەشە اي «تاماشالاپ» ءجۇرمىن. بارىپ ۇرسىسۋعا جۇيكەمدى توز­دىرعىم كەلمەيدى», دەيدى ول.

جالعان دەرەكتى جازعان كىم؟

قوردالانعان قوعامدىق پىكىرلەردى سارالاي كەلە قوسىمشانى جاساۋشىلارعا حابارلاسىپ, پىكىرىن بىلدىك.

«Damumed – قازاقستاندىق جەكە IT-كومپانيا. بۇل مەملەكەتتىك ينۆەس­تي­تسيالاردىڭ قاتىسۋىنسىز ءوز قارا­جاتىنا قۇرىلعان. بۇگىندە Damumed – بۇل پا­تسيەنتتىڭ اينالاسىندا قۇرىلعان جانە مەدي­تسينالىق كومەك كورسەتۋ پروتسەسىنىڭ بارلىق قاتىسۋشىسىنا سەرۆيستەر ۇسى­ناتىن دەنساۋلىق ساقتاۋداعى تۇتاس ەكوجۇيە. كومپانيا ونىمدەرى – مەدي­تسينالىق اقپاراتتىق جۇيە جانە پاتسيەنتكە ارنالعان قوسىمشانى ءبىز ءوز بەتىمىزشە, ياعني كومپانيا قىزمەتكەرلەرى, وتاندىق IT-ماماندار كۇشىمەن تەك كومپانيا قارا­جاتى ەسەبىنەن ازىرلەدىك. ءموبيلدى قوسىمشا 2017 جىلى قۇرىلدى جانە پاتسيەنتتەرگە, سونداي-اق مەديتسينالىق ۇيىمدارعا تەگىن بەرىلەدى. ءبىزدىڭ ونىم­دەرمەن جۇمىس ىستەۋ كەزىندە ءبىز, اري­نە, بار­لىق زاماناۋي ترەندتەردى ەسكە­رەمىز, حالىق­ارالىق تاجىريبەنى زەرت­تەيمىز جانە جوبالاۋ مەن ازىرلەۋ كەزىن­دە بار­لىق ەڭ ءتيىمدى جانە قىزىقتى ادىس­تەمە­لەردى قول­دانۋعا تىرىسامىز», دەيدى كوم­پانيا وكىلدەرى.

سونىمەن قاتار ولار Damumed قو­سىم­­شاسىندا نەگىزگى اككاۋنتقا ءوز تۋىس­قان­دارىڭىزدى – قارت اتا-اناڭىزدى جانە 18 جاسقا دەيىنگى بالالاردى قوسۋ مۇم­­كىندىگى بارىن, ياعني نەگىزگى اككاۋنت يەسىنىڭ جەكە مەديتسينالىق دەرەكتەرى جانە ونىڭ بالالارى مەن اتا-اناسىنىڭ دەرەكتەرى كورسەتىلەتىنىن اتاپ ءوتتى.

«سوندىقتان بۇگىنگى تاڭدا Damu­med قوسىمشاسىنىڭ تسيفرلى مەديتسينا­لىق سەر­ۆيستەرىمەن ەلىمىزدىڭ 6,4 ملن-نان اسا ازاماتى قامتىلعان – 4 037 448 نە­گىزگى اككاۋنت, 2 045 601 بالانىڭ ءپرو­فيلى, 359 507 ولاردىڭ اتا-اناسىنىڭ ءپروفيلى. Damumed مەديتسينالىق اقپا­راتتىق جۇيەسىندە 1 700-دەن استام مە­دي­تسينالىق ۇيىم جۇمىس ىستەيدى, بۇل – ەلىمىزدىڭ بارلىق وڭىرىندەگى جەكە جانە مەملەكەتتىك كلينيكالار. مە­ديتسينا قىزمەتكەرلەرى اراسىنان 120 مىڭنان اسا دارىگەرلەر پايدالانادى», دەدى مەكەمە ماماندارى.

قوسىمشادا ادامدار بارماعان, قا­رال­­ماعان دارىگەرلەردىڭ اناليزدەرى جا­­زىل­عان جاعدايلار ورىن العان ەكەن. بۇ­عان نە دەيسىزدەر؟ بۇل كىمنىڭ قاتەلىگى دەگەن سۇراعىمىزدىڭ دا جاۋابىن الدىق.

«Damumed پلاتفورماسى, كەز كەلگەن سان­دىق قۇرال رەتىندە, دەنساۋلىق ساق­تاۋ­دىڭ اشىقتىعىن قامتاماسىز ەتۋگە باعىت­تالعان. اتالعان قوسىمشا ارقىلى پاتسيەنت دارىگەردىڭ قابىلداۋىنا جازىلۋدى نەمەسە دارىگەردى ۇيگە شاقىرۋ, زەرتحانالىق زەرتتەۋلەردىڭ ناتيجەلەرىن كورۋ, رەتسەپتىلەردى جانە تىركەلگەن ەمحا­نانىڭ مەديتسينا قىزمەتكەرلەرى ەنگىز­گەن باسقا دا اقپاراتتى كورەدى. دەمەك Damumed قوسىمشاسى پاتسيەنت پەن دارىگەر اراسىنداعى كوپىر دەۋگە بولادى. ەگەر پاتسيەنت قاتە اقپاراتتى تاپسا, ونىڭ قوسىمشادا كەرى بايلانىس جاساۋعا, ونىڭ ىشىندە مەديتسينالىق كو­مەك كورسەتۋ ساپاسى تۋرالى پىكىر قال­دىرۋعا مۇمكىندىگى بار. ەمحانا كەرى باي­لانىس جاساۋعا ءتيىس, ءبىزدىڭ ەكوجۇيە مۇنداي مۇمكىندىكتى دە قامتاماسىز ەتە­دى. ەگەر قانداي دا ءبىر قيىندىقتار نەمەسە سۇراقتار تۋىنداسا, ءار ادام ءبىزدىڭ قولداۋ قىزمەتىمىزگە حابارلاسا الادى, وندا ارنايى پاتسيەنتتەرگە قولداۋ كور­سەتۋ قىزمەتىن ۇيىمداستىرامىز. كون­تاكتىلەردى كومپانيانىڭ رەسمي پاراق­شالارىندا جانە پاتسيەنتتىڭ قوسىم­شا­سىندا تابۋعا بولادى», دەيدى كومپانيا وكىلدەرى.

ءيا, اتالعان مەكەمە ماماندارى ­Damu­­med قوسىمشاسى پاتسيەنت پەن دارى­گەر اراسىنداعى كوپىر ەكەنىن ايتادى. سون­دا ەل شۋلاپ جاتقان شيكىلىكتەر قاي­دان شىقتى؟ ادام بارماعان, قا­­رالماعان دارىگەرىنە باردى دەپ, ەم قا­­بىلدادى دەپ جالعان مالىمەت ەن­گىز­­گەن كىم­دەر؟ دەنساۋلىق ساقتاۋ مي­نيس­تر­لىگىنەن سۇرا­دىق. Damumed قو­سىم­­شاسى ارقى­لى مەديتسينالىق كومەك­كە قاتىستى مالى­مەتتى بۇرمالاعان ەمحانا­لار­دىڭ قاي وڭىر­لەردە تىركەلگەنىن دە بىلدىك.

«قوسىپ جازۋلاردى تىركەۋ مەديتسي­نالىق ۇيىمداردىڭ كەسىندىسىندە وتكىزى­لەدى. ەڭ كوپ تىركەلىمدەر سانى نۇر-سۇل­تان, شىمكەنت, الماتى قالالارىنىڭ جانە جامبىل وبلىسىنىڭ مەملەكەت­تىك مەديتسينالىق ۇيىمدارىندا تىركەل­گەن», دەدى اتالعان ۆەدومستۆو وكىلدەرى. سونىمەن قاتار ولار زاڭ بۇزۋشىلىققا جول بەرگەن ۇيىمدارعا قانداي شارا قولدانىلاتىنىن دا جەتكىزدى.

Damu­med دەرتكە دەمەۋ بولسا...

«تەگىن مەديتسينالىق كومەكتىڭ كە­پىل­دىك بەرىلگەن كولەمى شەڭبەرىندە جانە مىن­دەتتى الەۋمەتتىك مەديتسينالىق ساق­تان­دىرۋ جۇيەسىندە كورسەتىلەتىن قىز­مەتتەردى ساتىپ الۋعا قوسىلۋ شارتى­نىڭ 20-تارماعىنا سايكەس تاپسىرىس بەرۋشى بۇيرىعىمەن بەكىتىلگەن «تەگىن مەديتسينالىق كومەكتىڭ كەپىلدىك بەرىل­گەن كولەمى شەڭبەرىندە جانە (نەمەسە) مىن­دەتتى الەۋمەتتىك مەديتسينالىق ساق­تان­دىرۋ جۇيەسىندە دەنساۋلىق ساق­تاۋ سۋبەكتىلەرىنەن مەديتسينالىق كورسە­تىلەتىن قىزمەتتەردى ساتىپ الۋ شارتى تالاپتارىنىڭ ورىندالۋىنا مونيتورينگ جۇرگىزۋ قاعيدالارىنا» سايكەس ايىپپۇل سانكتسيالارىن قولدانادى. دەنساۋلىق ساقتاۋ ءمينيسترىنىڭ 2020 جىلعى 24 جەلتوقسانداعى № قر دسم-321/2020 جانە 2020 جىلعى 20 جەل­توقسانداعى № قر دسم-291/2020 بۇي­رىعىمەن بەكىتىلگەن «تەگىن مەدي­تسي­نا­لىق كومەكتىڭ كەپىلدىك بەرىلگەن كو­لەمى شەڭبەرىندە جانە (نەمەسە) مىن­­­دەتتى الەۋمەتتىك مەديتسينالىق ساق­­تان­­­دىرۋ جۇيەسىندە دەنساۋلىق ساق­­­تاۋ سۋ­بەكتىلەرىنىڭ قىزمەتتەرىنە اقى تو­لەۋ قاعي­دالارىمەن» – مەديتسينالىق قىز­­مەت­­تەردىڭ ساپاسى مەن كولەمى موني­تو­رين­گىنىڭ ناتيجەلەرى بويىنشا قىز­مەت­­تەردى ساتىپ الۋ شارتىنىڭ قول­دا­نىلۋ كەزەڭىندە ۇستالعان ايىپپۇل سانك­­تسيالارىنىڭ سومالارىن تاپسى­رىس بەرۋشى اعىمداعى قارجى جىلىن­دا قىزمەتتەردى مەديتسينالىق كومەك كور­سەتۋگە ورنالاستىرۋ ءۇشىن پايدالانۋعا ءتيىس. 2021 جىلدىڭ 12 ايىندا مەدي­تسي­نا­لىق كومەك كورسەتۋ ساپاسىن موني­تو­­رينگتەۋ ناتيجەلەرى بويىنشا مي­نيستر­­لىكتىڭ اقپاراتتىق جۇيەسىندە مە­­دي­­­تسينالىق قىزمەت كورسەتۋدىڭ 32 445 راس­­تالماعان جاعدايى انىقتالىپ, 228,7 ملن تەڭگە سوماسىنا ايىپپۇل سا­لىن­دى. بۇل رەتتە انىقتالعان «قوسىپ جا­زۋ» جاع­دايلارىنىڭ 99,8% نەمەسە 32 376 راس­تالماعان جاعدايلار 192,7 ملن تەڭ­گە سوماسىنا ايىپپۇل سالۋ تە­گىن مەدي­تسينا­لىق-سانيتارلىق العاش­قى كومەك جانە كونسۋلتاتيۆتىك-دياگ­نوس­تيكالىق قىزمەت كورسەتۋشىلەرگە تيە­سىلى», دەدى دەنساۋلىق ساقتاۋ مينيسترلىگى.

سونداي-اق الداعى ۋاقىتتا اتالعان جاعداي قايتالانباس ءۇشىن مينيسترلىك تاراپىنان قانداي باقىلاۋ بولاتىنىن دا سۇرادىق.

«قازاقستان رەسپۋبليكاسىنىڭ پا­تسيەنت­تەرىن – ازاماتتارىن اقپارات­تان­­دىرۋ ءۇشىن تسيفرلى تەحنولوگيالار ار­قىلى مىناداي قۇرالدار ىسكە اسىرىلدى. ولاردىڭ قاتارىندا «ستاتسيونار­لىق ناۋقاستاردىڭ ەلەكتروندى تىركە­لىمى» اقپاراتتىق جۇيەسىنەن ستاتسيوناردان شىعارۋ تۋرالى SMS-تاراتۋ (مە­دي­تسي­نالىق ۇيىمداردىڭ اتاۋلارى مەن مەكەنجايلارى, سونداي-اق ەمدەلگەن جاعدايدىڭ دياگنوزى جانە ەمدەۋ ناتيجەسى), ء«دارى-دارمەكپەن قامتاما­سىز ەتۋ» اقپاراتتىق جۇيەسىنەن جازىپ ­بە­رىلگەن رەتسەپتىنىڭ ءنومىرى تۋرالى SMS-تا­راتۋ, «ەمدەۋگە جاتقىزۋ بيۋروسى» اقپا­­­راتتىق جۇيەسىنەن جوسپارلى ەمدەۋگە جات­قىزۋ كۇنى تۋرالى SMS-حابارلاما, سۇراقتار تۋىنداعان جاعدايدا پاتسيەنت بىرىڭعاي بايلانىس ورتالىعىنا 1406 تەگىن ءنومىرى بويىنشا قوڭىراۋ شالا الادى, قور مەن مەديتسينالىق قىز­مەت­تەردى تۇتىنۋشىلار اراسىنداعى كەرى بايلانىس ءۇشىن قور Qoldau 24/7 ءمو­بيلدى قوسىمشاسىن ىسكە اسىردى, پاتسيەنت­تەردىڭ مەديتسينالىق كومەك كورسەتۋ سا­پاسى مەن قولجەتىمدىلىگىن باعالاۋعا ار­نالعان «دامۋ» اقپاراتتىق تەحنولوگيا­لار ورتا­لىعىنىڭ Damumed ءموبيلدى قوسىمشاسى بار», دەدى.

«Damumed – قازاقستاندىق جەكە IT-كوم­پانيا. ول جەردە قانشاما ادام­داردىڭ جەكە مالىمەتتەرى ساقتالعان. ازاماتتار تاراپىنان وسىعان الاڭداۋ­شىلىق ءبىلدىرىپ وتىرعان جاندار بارىن جوعارىدا ايتتىق. وسى بويىنشا دا مي­نيسترلىك وكىلدەرىنىڭ پىكىرىن بىلگەن ەدىك.

«دەرەكتەردى يەلەنۋگە قاتىستى, «حا­لىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستىڭ ەرەجەلەرىنە سايكەس, Damumed دەربەس مەديتسينالىق دەرەكتەردىڭ اگرەگاتورى رەتىندە ولاردىڭ يەلەرى بولىپ تابىلمايدى. Damumed دە­رەكتەردى جيناپ وڭدەيدى, سونداي-اق اتال­عان كودەكستىڭ تالاپتارىنا ساي­كەس مەديتسينالىق ۇيىمدار مەن دەنساۋ­لىق ساقتاۋ ورگاندارىنىڭ قىزمەت­كەر­لەرىنە ۇسىنادى. Damumed ماج-ءسى قازاقستان رەسپۋبليكاسىنىڭ زاڭناما تا­لاپتارىنا سايكەس اقپاراتتىق قاۋىپ­سىزدىك تەكسەرۋدەن ءوتتى», دەدى مينيسترلىك وكىلدەرى.

توقسان اۋىز ءسوزدىڭ توبىقتاي ءتۇيى­نىن ەل يگىلىگى ءۇشىن جاسالعان وسىنداي قوسىمشالار حالىقتىڭ ۋاقىتىن ۇنەم­دەۋگە, مەديتسينالىق مەكەمەلەردى قاعاز­باستىلىقتان ارىلتۋعا مۇمكىندىك تۋدىراتىنى انىق. بىراق ورىن الىپ جاتقان كەمشىلىكتەر باياندى باعدارلامالار­دىڭ تامىرىنا بالتا شابۋمەن بىردەي ەكەنى تۇسىنىكتى. قارقىندى دامىعان قازاق­ستاندى قالىپتاستىرۋ ءۇشىن ءار سالادا ولقىلىقتاردىڭ ورىن الماۋىنا زەر سالعان دۇرىس. كوپشىلىك كوكەيىندەگى وي وسى بولسا كەرەك.