«بيىلعى جىل ەلىمىز ءۇشىن كۇردەلى احۋالمەن باستالدى. بۇل وقيعا حالىققا دا, بيلىككە دە ۇلكەن ساباق بولدى. قيىن-قىستاۋ شاقتا جاعدايدى باقىلاۋدا ۇستاۋعا مىندەتتى مەملەكەتتىك ورگانداردىڭ قاۋقارسىزدىق تانىتقانىن كوردىك. مەملەكەتتىڭ تاۋەلسىزدىگى مەن بولاشاعىنا قاۋىپ تونگەن سونداي قىسىلتاياڭ كەزدە پرەزيدەنتىمىز قاسىم-جومارت كەمەل ۇلى توقاەۆ بارلىق جاۋاپكەرشىلىكتى ءوز موينىنا الىپ, ۋاقتىلى ءارى باتىل ستراتەگيالىق شەشىمدەر قابىلدادى. ەڭ باستىسى, پرەزيدەنتىمىزدىڭ باتىل شەشىمدەرىنىڭ ارقاسىندا مەملەكەتتىگىمىز بەن ەلىمىزدىڭ تۇتاستىعىن ساقتاپ قالدىق. مەملەكەت باسشىسى بارلىق جاعدايدى اشىپ ايتىپ, تەلەديدار ارقىلى حالىققا دەر كەزىندە بىرنەشە ۇندەۋ جاريالاپ, اشىق اقپاراتتىق ساياسات ۇستاندى», دەلىنگەن سەناتورلار جولداعان ساۋالدا.
قازىرگى ۋاقىتتا پرەزيدەنت ۇكىمەت الدىنا جاڭا قازاقستاندى قۇرۋعا باعىتتالعان ناقتى مىندەتتەر قويدى. سەناتور بۇل باعىتتا ۇلتتىق يدەولوگيانى قالىپتاستىرىپ, جاستارمەن جۇمىستى كۇشەيتۋ كەرەكتىگىن ايتتى. ونىڭ ايتۋىنشا, قاڭتاردىڭ قاسىرەتتى كۇندەرى الاڭعا شىققان جاستاردىڭ كوپشىلىگى دەسترۋكتيۆتى كۇشتەردىڭ ارانداتۋىنا بوي الدىردى.
ول, سونداي-اق جاستار ساياساتى زامان تالابىنان دا, جاستار تالابىنان دا قالىپ وتىرعانىن نازارعا سالدى. سەناتور جاستار ساياساتىن فورماليزمنەن ارىلتىپ, ولاردى تاربيەلەۋ ماسەلەسىمەن تىڭعىلىقتى اينالىسۋ, ەلىمىزدە رۇقسات ەتىلمەگەن دەسترۋكتيۆتى ءدىني اعىمدارمەن كۇرەسۋدىڭ ناقتى شارالارىن قولعا الۋ ماڭىزدى ەكەنىن جەتكىزدى.
جەدەل شەشۋدى تالاپ ەتەتىن ماسەلەلەردىڭ ءبىرى – وسكەلەڭ ۇرپاق اراسىنداعى جۇمىسسىزدىق. سەناتور ءوزىنىڭ دەپۋتاتتىق ساۋالىندا بۇل ماسەلەنى شەشۋ ءۇشىن دە پارمەندى شارالار قابىلداۋ قاجەتتىگىن تىلگە تيەك ەتتى.
«ۇكىمەتتىڭ جىل سايىنعى ەسەپتەرىنە قاراپ وتىرساق, ءار وڭىردە مىڭداعان جۇمىس ورىندارى اشىلىپ جاتادى. ءتۇرلى مەملەكەتتىك باعدارلامالاردىڭ ناتيجەسىندە كوپتەگەن كاسىپورىندار اشىلىپ, جۇزدەگەن ادام جۇمىسپەن قامتىلدى دەگەن جاڭالىقتاردى دا ەستيمىز. بىراق جاستار اراسىنداعى جۇمىسسىزدىق كوبەيمەسە, ازايماي وتىر. سوندىقتان ۇكىمەت جۇمىسسىزدىقتى جويۋ ىسىندە جالعان ەسەپكە جۇگىنبەي, ناقتى ىستەرگە كوشۋى قاجەت», دەپ قورىتىندىلادى ءالي بەكتاەۆ.
