ينفوگرافيكانى جاساعان امانگەلدى قياس, «ەQ»
جۇزەگە اسىرىلعان جوبالاردىڭ باسىم بولىگى تاماق ونەركاسىبىنە تيەسىلى – 41 جوبا. قۇرىلىس يندۋسترياسىندا 26 جوبا قاتارعا قوسىلسا, ماشينا جاساۋ سالاسىندا 18 جوبا جۇزەگە اسىرىلعان. جوبالاردىڭ 16-سى مەتاللۋرگياعا, 10-ى حيميا ونەركاسىبىنە تيەسىلى. جەڭىل ونەركاسىپتە 8 جوبا ىسكە قوسىلسا, اعاش وڭدەۋ سالاسىندا 3 جوبا پايدالانۋعا بەرىلدى. سونداي-اق مۇناي وڭدەۋ سالاسىندا 3 جوبا, فارماتسەۆتيكادا 1 جوبا, ەنەرگەتيكادا 12 جوبا قاتارعا قوسىلدى. 6 جوبا وزگە سالالاردىڭ ۇلەسىندە.
جوبالاردىڭ باسىم بولىگى شىعىس قازاقستان, قاراعاندى, جامبىل وبلىستارىندا, سونداي-اق شىمكەنت, نۇر-سۇلتان جانە الماتى قالالارىندا ورنالاسقان.
ىسكە قوسىلعان جوبالاردىڭ ىشىندەگى ەڭ ءىرىسى – قاراعاندى وبلىسىنداعى «جايرەم كبك» اق بايىتۋ فابريكاسىنىڭ قۇرىلىسى جانە جۇمىس ىستەپ تۇرعان ءوندىرىستى جاڭعىرتۋ جوباسى. زاماناۋي پوليمەتالل بايىتۋ فابريكاسىنىڭ قۋاتتىلىعى جىلىنا 5 ملن تونناعا جۋىق كەندى وڭدەۋگە مۇمكىندىك بەرەدى. مۇندا زاماناۋي تەحنولوگيالار قولدانىلادى. بۇل دەگەنىمىز – جاڭا كارەر, تسيفرلاندىرۋدىڭ جوعارى دارەجەسى بار تولىق اۆتوماتتاندىرىلعان فابريكا جانە يننوۆاتسيالىق جابدىقتار. 400-گە جۋىق قوسىمشا جۇمىس ورنى اشىلدى. كەن بايىتۋ كومبيناتى قازاقستانداعى مىرىش جانە قورعاسىن كونتسەنتراتتارىنىڭ ەڭ ءىرى ءوندىرۋشىسى بولادى دەپ كۇتىلۋدە.
ءىرى جوبالاردىڭ قاتارىنا KAZ Minerals Aktogay جشس-ءنىڭ قولدانىستاعى ءسۋلفيدتى فابريكانى قايتالاۋ ارقىلى اقتوعاي كەن بايىتۋ كومبيناتىنىڭ قايتا وڭدەۋ قۋاتىن كەڭەيتۋ جوباسىن جاتقىزۋعا بولادى. بۇل جوبا 2017 جىلى KAZ Minerals كومپانيالار توبىنىڭ يندۋستريالدى-يننوۆاتسيالىق دامۋ مەملەكەتتىك باعدارلاماسىن جۇزەگە اسىرۋ اياسىندا باستالدى. كومبيناتتىڭ ەكىنشى كەزەگىن ىسكە قوسۋ كەن وڭدەۋدى جىلىنا 25 ملن توننادان 50 ملن تونناعا دەيىن ارتتىرۋعا مۇمكىندىك بەرەدى. 2022 جىلدان باستاپ كەن ورنىندا 190 مىڭ توننا مىس, ونىڭ ىشىندە 20 مىڭ توننا كاتودتى مىس وندىرىلەدى دەپ جوسپارلانۋدا. كاسىپورىندا الدىڭعى قاتارلى تەحنولوگيالار, اتاپ ايتساق, جاساندى ينتەللەكت نەگىزىندەگى باعدارلامالار بەلسەندى قولدانىلادى.
Qaz Carbon جشس-ءنىڭ قاراعاندى وبلىسىندا اگلومەراتسيالىق فابريكاسى بار سارىارقا فەرروقورىتپا زاۋىتىن سالۋ جوباسىن دا بولە-جارا اتاپ وتۋگە بولادى. كاسىپورىننىڭ ەرەكشەلىگى – مۇندا سۇرانىسقا يە ءونىمدى قىسقا مەرزىمدە شىعارۋعا بەيىمدەلگەن جابدىقتار بار. اۆتوماتتاندىرۋ, جاڭا تەحنولوگيالار ادام فاكتورىن بارىنشا ازايتۋعا مۇمكىندىك بەردى. بارلىق پەش ءوندىرىستى باسقارۋ ورتالىعىنان باسقارىلادى, وپەراتورلار بەينەكامەرالار ارقىلى تەحنولوگيالىق پروتسەستى باقىلايدى. مۇندا ءونىمنىڭ 8 ءتۇرى بار. ولار Nippon Steel, Marubeni Corporation, «ارسەلورميتتال» (ليۋكسەمبۋرگ) سياقتى شەتەلدىك الىپتاردىڭ سۇرانىسىنا يە. ەكسپورت گەوگرافياسى جاپونيا, رەسەي, ەۋروپا ەلدەرى مەن تمد-نى قامتيدى.
قاتارعا قوسىلعان قۋاتتى جوبانىڭ ءبىرى – «پەتروپاۆل ەلەكتر تەحنيكالىق زاۋىتى» جشس-ءنىڭ ترانسفورماتورلار ءوندىرىسى. زاۋىت 6, 10, 35 كۆ كەرنەۋ كلاسىنداعى تاراتۋ ترانسفورماتورلارى مەن جوعارى ۆولتتى ۇياشىقتار شىعارادى. زاۋىتتىڭ وندىرىستىك قۋاتى جىلىنا 13 مىڭ بىرلىك ءونىمدى قۇرايدى. شىعارىلاتىن ءونىمنىڭ 98 پايىزدان استامىن تمد ەلدەرىنە ەكسپورتتاۋ جوسپارلانۋدا.
ءىرى جوبانىڭ ءبىرى – QazTehna جشس-ءنىڭ ساران قالاسىنداعى Yutong جولاۋشىلار اۆتوبۋستارىن ءوندىرۋ جوباسى. كاسىپورىننىڭ جالپى وندىرىستىك قۋاتى Yutong برەندىنىڭ 1 200 بىرلىك جولاۋشىلار اۆتوبۋسى مەن ەلەكتر اۆتوبۋستارىن, سونداي-اق كارەرلىك, قۇرىلىس جانە جول تەحنيكاسىنىڭ 500 بىرلىگىن قۇرايدى. كومپانيا ساتىپ العان بارلىق جابدىقتار ستراتەگيالىق سەرىكتەس Zhengzhou Yutong Group Co., Ltd. كومپانياسىمەن ارنايى ازىرلەنگەن جانە جيناقتالعان. قولدانىلاتىن جابدىق جەتكىلىكتى يكەمدىلىككە يە جانە QazTehna قىزمەتكەرلەرىنە ءبىر بۇيىمدى دايىنداۋدان ەكىنشى بۇيىمعا جىلدام قايتا باپتاۋعا, سونداي-اق تاپسىرىس بەرۋشىگە از مولشەردە قاجەتتى بولشەكتەردىڭ كەڭ اسسورتيمەنتىن وندىرۋگە مۇمكىندىك بەرەدى. وندىرىلەتىن ءونىمنىڭ نەگىزگى تۇتىنۋشىلارى – قازاقستاننىڭ كولىكتىك, تاۋ-كەن ءوندىرۋشى جانە ونەركاسىپتىك كومپانيالارى. بولاشاقتا تاياۋ شەتەلدەردىڭ نارىعىنا شىعۋ قاراستىرىلۋدا.
سونداي-اق قىزىلوردا وبلىسىندا Orda Glass جشس تاباق شىنى وندىرەتىن زاۋىت تەحنيكالىق تۇرعىدان ىسكە قوسىلدى. قۋاتى جىلىنا 197 100 توننا تاباق شىنى ءوندىرۋ جانە وڭدەۋگە قاۋقارلى شىنى زاۋىتى قىزىلوردا قالاسىنىڭ يندۋستريالىق ايماعىندا ورنالاسقان. شىنى كۇندەلىكتى ءومىردىڭ كوپتەگەن سالاسىندا جوعارى سۇرانىسقا يە. وتاندىق شىنى تۇرعىن ءۇي جانە كوممەرتسيالىق جىلجىمايتىن م ۇلىك قۇرىلىسىندا, ماشينا جاساۋدا, جيھاز جانە ينتەرەر زاتتارىن وندىرۋدە قىزمەتتەر مەن تاۋارلاردىڭ وزىندىك قۇنىن ەداۋىر تومەندەتەدى.
