ەدىل جاڭبىرشين 11 قاڭتاردا پرەزيدەنت پارلامەنت ءماجىلىسىنىڭ جانە كەشەگى ۇكىمەتتىڭ وتىرىسىندا ەلىمىزدە اتقارىلاتىن ءبىراز ماسەلەلەردى بەلگىلەپ, ناقتى مىندەتتەردى قويعانىن اتاپ ءوتتى.
«جالپى قوعام مەن مەملەكەت اراسىنداعى قارىم-قاتىناستا ترانسفورماتسيانىڭ قاجەتتىلىگى تۋىنداعانىن جانە «جاڭا قازاقستاندى» قۇرۋ تۋرالى قاسىم-جومارت كەمەل ۇلى قايتا-قايتا ايتىپ ءجۇر. مۇنداي كەشەندى ترانسفورماتسيا ەڭ الدىمەن, پارلامەنت قىزمەتىندە ورىن الىپ, ءماجىلىس قابىرعاسىنان باستالۋى شارت», دەدى ە.جاڭبىرشين ءماجىلىس وتىرىسىندا.
دەپۋتاتتىڭ ايتۋىنشا, «جاڭا قازاقستان» دەپۋتاتتىق توبى قوعامداعى ەڭ وزەكتى ماسەلەلەردى دەر كەزىندە پارلامەنت تورىندە كوتەرىپ, تۇرعىنداردىڭ مۇڭ-مۇقتاجدارىن ۋاقىتىندا شەشۋگە قىزمەت ەتەدى.
«ۇكىمەتپەن بىرلەسىپ حالىقتىڭ رۋحانياتىن كۇشەيتەتىن, ءال-اۋقاتىن جاقسارتاتىن زاڭ جوبالارىن دايىنداۋعا, سايلاۋشىلارىمىزبەن ودان ارى تىعىز قارىم-قاتىناستار ورناتۋعا مۇددەلى. «جاڭا قازاقستان» دەپۋتاتتىق توپتىڭ قوعامداعى بارلىق بەلسەندى ساياسي پارتيالارمەن, نارازى توپتارمەن, ۇكىمەتتىك ەمەس ۇيىمدارمەن جانە ساراپشىلارمەن قويان-قولتىق قىزمەت جاساۋعا ىنتالى جانە دايىن ەكەنىن ءمالىم ەتەمىز», دەدى جاڭبىرشين ءماجىلىس وتىرىسىندا.
