قازىرگى تاڭدا قوردا 115 ميلليارد تەڭگەدەن استام قاراجات جيناقتالعان. شۇعىل ارەكەت ەتۋدى تالاپ ەتەتىن ماسەلەلەر بويىنشا ساراپتامالىق كوميتەتتەر جۇمىسقا كىرىسكەن.
قوردىڭ ءباسپاسوز قىزمەتى, سايت پەن الەۋمەتتىك جەلىدەگى مەسسەندجەرلەرگە ءۇي ساتىپ الۋ, نەسيە جانە باسقا دا قارجىلىق زايمدار بويىنشا مىندەتتەمەلەردى تولەۋ, وتباسىلىق ءىس-شارالار مەن مەرەكەلىك شارالاردىڭ قاراجاتىن وتەۋ مازمۇنىنداعى وتىنىشتەر دە ءتۇسىپ جاتقانىن جەتكىزدى.
ايتا كەتەيىك, قامقورشىلىق كەڭەس «قازاقستان حالقى» قورىنىڭ نەگىزگى مىندەتتەرىن ايقىندايتىن تۇجىرىمدامانى بەكىتتى.
وسىلايشا, قۇجاتقا سايكەس, قوردىڭ قىزمەتى بولاشاقتا اۋرۋلاردىڭ جانە مۇگەدەكتىكتىڭ ىقتيمال دامۋىن بولدىرماۋ ماقساتىندا سابيلەرگە مەديتسينالىق قىزمەت كورسەتۋدى دامىتۋعا جانە ونىڭ قولجەتىمدىلىگىن ارتتىرۋعا جاردەمدەسۋگە, سپورت جانە ءبىلىم بەرۋ ينفراقۇرىلىمى, سونداي-اق بالالارعا ارنالعان باسقا دا الەۋمەتتىك ماڭىزى بار قىزمەتتەردىڭ قولجەتىمدىلىگىن ارتتىرۋعا باعىتتالادى.
سونداي-اق قور مۇگەدەك, ناۋقاس نەمەسە الەۋمەتتىك بەيىمدەلۋ پروبلەمالارى بار بالانى اسىراپ العان, قامقورلىعىنا العان نەمەسە پاتروناتتىق تاربيەنى ۇيىمداستىرعان وتباسىلارعا كومەك كورسەتۋمەن جانە از قامتىلعان وتباسىنىڭ بالالارىنا كومەك كورسەتۋ ءۇشىن مەكتەپتەرمەن ءوزارا ءىس-قيمىل جاسايدى.
سونىمەن قاتار تىزىمگە قازاقستاننىڭ اۋماقتىق تۇتاستىعى مەن قاۋىپسىزدىگىن قورعاۋ نەمەسە ادامداردىڭ ءومىرىن ساقتاپ قالۋ جانە زارداپ شەككەن تۇرعىندارعا كومەك كورسەتۋ كەزىندە قايتىس بولعان نەمەسە اۋىر جاراقات العان قۇقىق قورعاۋ ورگاندارى, ارنايى ورگاندار, ۇقك قىزمەتكەرلەرىنىڭ وتباسىلارىنا, اسكەري قىزمەتشىلەرگە, توتەنشە جاعدايلار كەزىندە زارداپ شەككەن ادامدارعا قولداۋ كورسەتۋ قىزمەتى كىرەدى.
«اتالعان قىزمەت باعىتتارىن قامقورشىلىق كەڭەس بەكىتتى, ال باسقا سالالار قور قىزمەتىندەگى باسىم باعىتتارعا جاتپايدى. سونداي-اق ءبىز ازاماتتاردىڭ قارجىلىق پروبلەمالارى بارىن تۇسىنەمىز. الايدا بۇل ماسەلەلەردىڭ بارلىعىن قور شەشە المايدى. سوندىقتان قور تۇرعىنداردان تۇجىرىمدامادا كورسەتىلگەن قىزمەت باعىتتارىن مۇقيات وقىپ شىعۋدى سۇرايدى», دەدى «قازاقستان حالقىنا» قورىنىڭ رەسمي وكىلى الىبەك ءابدىلوۆ.
