ەرەسەكتەرمەن قاتار بالالاردىڭ دا ىندەت قارماعىنا ىلىگۋى جيىلەپ بارادى. قاشىقتان وقىتىلىپ, ساقتىق شارالارى مەيلىنشە ساقتالسا دا, دەرت دەندەۋى باسەڭسيتىن ەمەس. دەرەكتەرگە كوز سالاتۇعىن بولساق, جامان تۇماۋ باستالعالى وڭىردەگى مەكتەپ وقۋشىلارى اراسىندا ىندەت جۇقتىرۋدىڭ 6 066 جاعدايى تىركەلگەن. دەمەك, بۇل ورايدا ءالى دە جۇقپالى اۋرۋ جۇقتىرۋدىڭ قاۋپى مول.
كەيىنگى تاۋلىكتەردە ستاتسيوناردا ەمدەلىپ جاتقان سىرقاتتاردىڭ سانى 2,2 ەسەگە ازايدى. بۇل جاي ينفەكتسيالىق اۋرۋحانالارداعى توسەكتىك ورىن سانىن ەپتەپ قىسقارتۋعا مۇمكىندىك تۋعىزىپ وتىر. كۇردەلى كەزەڭدەگى مەديتسينالىق مەكەمەلەردىڭ جاعدايى تۋرالى ءسوز ساباقتاي كەتەلىك. بارلىق اۋرۋحانا وتتەگىمەن تىنىستاۋ اپپاراتتارىمەن قامتاماسىز ەتىلگەن. بۇل ورايدا ورتالىقتاندىرىلعان جۇيەنىڭ دە بار ەكەنىن, وعان قوسا 1 171 كونتسەتراتورلار الىنعانىن ايتا كەتكەن ءجون. قازىر 17 ينفەكتسيالىق ستاتسيونار جۇمىس ىستەپ تۇر. وكىنىشكە قاراي, وسى جىلدىڭ باسىنان بەرى داۋاسىز دەرت سالدارىنان 27 ادام ءولىمى تىركەلدى. ازىرگە مەديتسينا كادرلارىنا تاپشىلىق جوق. ەگەر ىندەت ۇدەپ كەتەتىن بولسا, 330 سالا قىزمەتكەرى بىلەك بىرىكتىرىپ جۇمىس ىستەۋگە دايىن تۇر.
دەنساۋلىق ساقتاۋ سالاسى نىساندارىنىڭ ماتەريالدىق-تەحنيكالىق بازاسىن نىعايتۋ ماقساتىندا رەسپۋبليكالىق جانە وبلىستىق بيۋدجەت ەسەبىنەن 1,5 ملرد تەڭگە قاراجات ءبولىنىپ, 221 بىرلىك مەديتسينالىق جابدىق ساتىلىپ الىندى. بۇگىنگى تاڭدا وڭىردە 447 وكپەنى وتتەگىمەن جەلدەتۋ اپپاراتۋرالارى بار. كومپيۋتەرلىك توموگرافتارمەن 9 مەديتسينالىق ۇيىم جابدىقتالعان.
ءبىر داتكە قۋاتى, ەمحانا دارىگەرلەرى قاشىقتان جۇمىس ىستەپ جانە ونلاين كونسۋلتاتسيالار جۇرگىزە الادى. وسىنىڭ ءوزى جەدەل جاردەم جۇكتەمەسىنىڭ 15 پايىزعا ازايۋىنا مۇمكىندىك تۋدىرىپ وتىر. راس, ەل شەتىنە ىندەت جەتكەندە جەدەل جاردەم شاقىرۋدىڭ ءوزى قيىنداپ كەتكەن. قازىر بۇل تاراپتاعى ارىز-شاعىم ازايدى. شۇعىل كومەك كورسەتۋ ءۇشىن 140-تان اسا ءموبيلدى بريگادا تۇراقتى جۇمىس ىستەۋدە. وعان قوسىمشا 41 اۆتوكولىك تارتىلىپ وتىر. وسى جىلدىڭ قاڭتار ايىندا ءموبيلدى بريگادالار سىرقاتتاردىڭ شاقىرۋى بويىنشا 7 مىڭ مارتە شىعىپ, كومەك كورسەتكەن. كەيىنگى اپتانىڭ وزىندە وڭىردە 5 794 شاقىرۋ تىركەلىپ وتىر. وسى ءبىر دەرەككە قاراپ-اق ەل ىشىندەگى دەرت دەڭگەيىن انىقتاۋعا بولادى. وبلىس ورتالىعىنىڭ وزىندە جاردەم سۇراپ شاقىراتىنداردىڭ سانى وتكەن اپتادا 5,6 پايىزعا كوبەيگەن.
وبلىستا سۇرانىسقا يە ءدارى-دارمەكتىڭ ەكى ايلىق قورى جاساقتالعان. ىندەت باستالعالى وڭىردە جۇقپالى اۋرۋلاردان ەمدەيتىن ستاتسيونارلار ءۇشىن 1,8 ملرد تەڭگەنىڭ ءدارى-دارمەگى ساتىلىپ الىنعان. وعان قوسا جەرگىلىكتى بيۋدجەت ەسەبىنەن «جامان تۇماۋدان» ەمدەۋگە ارنالعان ءدارى-دارمەكتىڭ جەكە قورى قۇرىلدى. ەمحانالار ارقىلى ءدارى-دارمەكپەن قامتاماسىز ەتۋ جۇيەلى جۇرگىزىلۋدە. قازىرگى ۋاقىتتا ەمحانالاردا ونىڭ مول قورى بار. 2020 جىلدان باستاپ وبلىستا تاپشىلىعى بايقالعان كەيبىر ءدارى-دارمەكتى ساتىپ الۋ ءۇشىن 500 ملن تەڭگە قارجى ءبولىنىپ, تۇراقتاندىرۋ قورى جاسالدى. ءدارىحانالاردا ۆيرۋستىق اۋرۋلاردى ەمدەيتىن قاجەتتى ءدارى-دارمەكتىڭ بارلىعى بار ءارى قولجەتىمدى. وڭىردە 352 ءدارىحانا تۇراقتى جۇمىس ىستەيدى. سۇرانىسقا يە دارىلەردى ۋاقتىلى ساتىپ الىپ جەتكىزۋ ءۇشىن كەلىسىمشارت جاسالعان. بولشەك ساۋدا جەلىسى مەن كوتەرمە ساۋدا قويمالارىنداعى ءدارى-دارمەككە تۇراقتى مونيتورينگ جۇرگىزىلىپ تۇرادى.
بۇگىنگى تاڭدا 8 زەرتحانا كوروناۆيرۋستىق زەرتتەۋلەردى قامتاماسىز ەتۋدە. مۇندا تاۋلىگىنە 3 مىڭعا جۋىق تەست جۇرگىزىلەدى. ءسوز اراسىندا وسى جىلدىڭ باسىنان بەرى 60 مىڭ تەست وتكىزىلگەنىن ايتا كەتەلىك. وسىنشاما حالىقتىڭ 28 پايىزى وڭ ناتيجە كورسەتكەن. ەگەر قاجەت بولاتىن بولسا, زەرتحانالاردىڭ رەزەرۆتىك قۋاتى تاۋلىگىنە 7 مىڭعا جۋىق تەست جۇرگىزۋگە جەتەدى.
اۋرۋدىڭ الدىن الۋ ەڭ الدىمەن ۆاكتسيناعا بايلانىستى ەكەنى تۋرالى سان مارتە ايتىلدى. دەنساۋلىق ساقتاۋ مينيسترلىگىنىڭ جوسپارىنا سايكەس, وبلىستا 479 160 ادام ۆاكتسينا الۋعا ءتيىستى بولسا, كۇنى بۇگىنگە دەيىن ءبىرىنشى كومپونەنتپەن 378 ادام ەگىلگەن. بۇل – جوسپاردىڭ 72 پايىزى. ەكىنشى كومپونەنتپەن 321 مىڭ ادام نەمەسە الدىن الا جوسپارلانعان كولەمنىڭ 67 پايىزى ەكپە قابىلداپ وتىر. دەمەك, بۇل ارادا ءالى دە ولقىلىق بار دەگەن ءسوز. كۇنى بۇگىنگە دەيىن 73 814 ادام قايتا ەكپە الدى. كورسەتكىش كوڭىل كونشىتپەيدى. بۇل – جوسپاردىڭ نەبارى 34,7 پايىزى عانا.
اقمولا وبلىسى
