«2019 جىلى پرەزيدەنت ءوز جولداۋىندا «جالپى ىشكى ءونىم مەن حالىق تابىسىنىڭ ارتۋىنا قاراماستان, قوعامدا م ۇلىكتىك جىكتەلۋ ۇدەرىسى ساقتالىپ وتىر. بۇل – الاڭداتارلىق فاكتور. سوندىقتان وعان ەرەكشە نازار اۋدارۋ كەرەك», دەگەن بولاتىن. وسىعان بايلانىستى حالىقارالىق تاجىريبەدە كوپتەگەن ەلدە بار, ءسان-سالتاناتقا ارنايى سالىق ەنگىزۋ وتە وزەكتى ماسەلە دەپ ەسەپتەيمىن», دەگەن ەدى دەپۋتات.
ونىڭ ايتۋىنشا, سالىق جىلجىمايتىن م ۇلىكتەن باستاپ ۇشاتىن ۇشاق, جۇزەتىن كەمەگە دە سالىنعانى ءجون. ىشىندە جۇيتكيتىن كولىكتەر دە بار. جاقىندا مۇنى قارجى مينيسترلىگى دە راستادى. مينيسترلىكتىڭ ءباسپاسوز قىزمەتىنىڭ حابارلاۋىنشا, سالىق Aston Martin, Bentley, Ferrari, Lamborghini جانە Maserati سەكىلدى ليۋكستىك ماركالاردىڭ قىمبات مودەلدەرىنە سالىنادى. ناقتىلاپ ايتقاندا, قۇنىنا بايلانىستى ولار ءۇشىن ترانسپورت سالىعىنا ارنايى جوعارى كوەففيتسيەنتتەر ەنگىزىلۋى مۇمكىن. ارينە, قىمبات سالىققا ۇرىناتىن ماركالار ءتىزىمى مۇنىمەن بىتپەيدى. بىراق تاعى قانداي اۆتوكولىكتەردىڭ كىرەتىنى دە بەلگىسىز. بەلگىلىسى, ءتىزىم ءسوزسىز تولىعادى.
ءسان-سالتانات سالىعى وزگە ەلدەردە بار ءۇردىس. ماسەلەن, رەسەي فەدەراتسياسى 2014 جىلدان بەرى قىمبات اۆتوكولىكتەرگە سالىق سالا باستادى. قىمبات ستاۆكالار قۇنى 3 ملن رۋبلدەن (17 ملن تەڭگە) جوعارى تۇراتىن بارلىق اۆتوكولىككە سالىنادى.
مەملەكەتتىك كىرىستەر كوميتەتى توراعاسىنىڭ ورىنباسارى قايرات مياتوۆ ءبىز ونسىز دا جالپىعا بىردەي دەكلاراتسيالاۋ باستاماسىن ەنگىزدىك, ازاماتتاردىڭ تابىسىن ءبىلىپ, بارلىق م ۇلىك پەن كىرىسكە سالىق سالامىز دەيدى.
«بۇل بىرەۋگە ءسان-سالتانات بولسا, بىرەۋگە اقىلعا قونىمدى كولەم. ونى وسىدان كەيىن تۇسىنەتىن بولامىز. دەكلاراتسيادا كورسەتىلمەيىنشە, ءساندى تاۋارلار ءتىزىمى جاسالعان جوق. بۇل ماسەلەگە م ۇلىك تۋرالى بارلىق اقپاراتتى الىپ, مۇقيات قاراۋىمىز كەرەك. جالپىعا بىردەي دەكلاراتسيالاۋدى 2025 جىلعا قاراي اياقتاۋ جوسپارلانىپ وتىر. سودان كەيىن سالىق بازاسىن تالداۋعا جانە سالىق سالۋ تاسىلدەرىنە كىرىسەمىز», دەيدى ول.
ۆەدومستۆو وكىلىنىڭ ساقتانا سويلەۋىن تۇسىنۋگە بولادى. تابىسى 100 مىڭ تەڭگەدەن ارەڭ اساتىن, سىقىرلاعان ەسكى كولىگى بار جانباعار ءۇشىن 6-7 ملن تەڭگەنىڭ تەمىر تۇلپارىن مىنگەن ازاماتتىڭ ءسان-سالتانات سالىعىن تولەۋى وتە-موتە زاڭدى. ال ول پاقىرىڭىز 6-7 ملن تەڭگەنىڭ كولىگىن نەسيەگە العان بولسا شە؟ وندا مىناۋ سالىعىڭىز ادىلەتسىز بوپ شىعا كەلمەي مە؟! قىسقاسى, بۇل ءالى دە جەتىلدىرە ءتۇسۋدى قاجەت ەتەتىن يدەيا. بىراق تۇبەگەيلى جانى جوق تا ەمەس. ءاسىلى, قاجەت زاڭ. قوعامدى جىككە ءبولۋ ءۇشىن ەمەس. ءبىر عانا كريتەري سالتانات قۇرسا دەيسىڭ: «تابىسىڭا قاراي تاپقانىڭمەن ءبولىس» دەگەن ۇستانىم ادال, ءادىل, لايىقتى ورىندالسا.
