پارلامەنت • 08 اقپان، 2022

سەرىكباي ترۇموۆ: وڭىرلەرگە بولىنگەن قاراجات ءتيىمدى جۇمسالۋى قاجەت

سەنات دەپۋتاتى سەرىكباي ترۇموۆ رەسپۋبليكالىق بيۋدجەتتەن بولىنەتىن ترانسفەرتتەردىڭ ءتيىمدى يگەرىلۋىن قامتاماسىز ەتۋ كەرەكتىگىن ايتتى، دەپ حابارلايدى Egemen.kz.

گاۋھار قاپاش

«مەملەكەت باسشىسىنىڭ ارنايى تاپسىرمالارىنىڭ ءبىرى - وڭىرلەرگە بولىنەتىن قاراجاتتىڭ ءتيىمدى جۇمسالۋى. وسىعان سايكەس ءبىزدىڭ كوميتەتتە ارنايى جۇمىس توبى قۇرىلدى، جەرگىلىكتى اتقارۋشى جانە ورتالىق مەملەكەتتىك ورگاندارمەن بىرلەسىپ جۇمىس جۇرگىزىپ، ساراپتاما جاسالىپ جاتىر

باستى ماقسات - ءاربىر وڭىردەگى نەگىزگى ءارى ەڭ وزەكتى دەگەن ماسەلەلەرگە قارجى جەتۋ كەرەك. سەنات قابىرعاسىنداعى دەپۋتاتتار دا وڭىردەن سايلانعان، ءاربىر ايماقتىڭ ءمان-جايىن، جاعدايىن، حالىقتىڭ تۇرمىس-تىرشىلىگىن جاقسى بىلەدى. سوندىقتان ءبىزدىڭ جۇمىس توبى وتە جوعارعى دەڭگەيدە قازىر قىزمەت ەتۋدە»، دەدى دەپۋتات.

سونداي-اق دەپۋتات رەسپۋبليكالىق بيۋدجەتتەن بولىنەتىن ترانسفەرتتەردىڭ ءتيىمدى يگەرىلۋىن قاداعالاۋ كەرەكتىگىن ايتتى.

«بۇل - نەگىزگى سيپاتتاعى ترانسفەرت، ودان كەيىن ماقساتتى ترانسفەرتتەردىڭ وڭىرلەرگە بولىنەتىن كولەمى دە اسا ماڭىزدى ماسەلە قاتارىندا.

مىسالى ءار ءوڭىردىڭ ءارتۇرلى ماسەلەلەرى بار. اتىراۋ وڭىرىندە اۋىز سۋ ، ەكولوگياعا جانە جولعا قاتىستى ماسەلەلەر بار. باتىس قازاقستان وبلىسىندا ەلەكتر ەنەرگياسىنا قاتىستى ماسەلەلەر بايقالادى. ءبىزدىڭ وڭتۇستىك وڭىرلەردە حالىق سانىنىڭ وسۋىنە بايلانىستى مەكتەپتەردىڭ قۇرىلىسىنا قاجەتتى قاراجات كەرەكتىگى بار. ءبىز وسى قارجىنىڭ ءتيىستى وڭىردەگى وزەكتى ماسەلەلەرگە جەتۋى ءۇشىن جەرگىلىكتى اتقارۋشى ورگاندارمەن، مينيسترلىكتەرمەن بىرلەسىپ جۇمىس توبى قۇرىلدى جانە ولارمەن جۇمىس جاساپ جاتىرمىز»، دەدى سەرىكباي ترۇموۆ.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز