وكىنىشكە قاراي قازاقستاندىق شاڭعىشىلار سپرينت جارىسىندا ىرىكتەۋدەن وتە العان جوق. جارىستىڭ ەرەجەسىنە سايكەس, شيرەك فينالعا جولداما الۋ ءۇشىن سپورتشىلار العاشقى 30 شاڭعىشىنىڭ قاتارىنا ەنۋى كەرەك بولاتىن.
بىراق, قازاقستاندىقتار ساپىنان ەڭ جوعارى ناتيجەنى نادەجدا ستەپاشكينا تىركەدى. ول مارە سىزىعىن 51-ءشى بولىپ كەسىپ ءوتتى. ال وزگە شاڭعىشىلارىمىزدان انگەلينا شۋرىگا 60-ورىن, كسەنيا شالىگينا 67-ورىن, يرينا بىكوۆا 68-ورىنمەن ىرىكتەۋ سىنىن اياقتادى.
ەندى شامالى ۋاقىتتان كەيىن ەرلەر اراسىنداعى ىرىكتەۋ سىنى باستالادى.
وندا قازاقستاندىق ەۆگەني ۆەليچكو مەن ۆيتالي پۋحكالو ونەر كورسەتەدى.
ايتا كەتەيىك, بەيجىڭ قالاسىنداعى 2022 جىلعى قىسقى وليمپيادادا سپورتتىڭ جەتى تۇرىنەن 109 مەدال جيىنتىعى ساراپقا سالىنادى.
اق وليمپيادادا ەلىمىزدىڭ اتىنان 34 سپورتشى 85 جولداما بويىنشا ەل نامىسىن قورعاپ جاتىر.
