«وتكەن جىلدىڭ قورىتىندىسى بويىنشا ەل ەكونوميكاسى 4 پايىزعا ءوستى. وڭدەۋ ونەركاسىبى 5,5%-عا, قۇرىلىس يندۋسترياسى 7,6%-عا ءوستى. قىزمەت كورسەتۋ سالاسىندا وڭ ديناميكا بايقالادى. ساۋدا 9,2%-عا, كولىك سالاسى 3,6%-عا ءوستى», دەدى قاسىم-جومارت توقاەۆ ۇكىمەتتىڭ كەڭەيتىلگەن وتىرىسىندا.
سونداي-اق, مەملەكەت باسشىسىنىڭ ايتۋىنشا, ينفلياتسيا دەڭگەيى ءوز كورسەتكىشىنەن اسىپ, 8,4%-عا جەتكەن.«وكىنىشكە وراي, قاڭتار وقيعاسى تۇراقتى ءومىردى قامتاماسىز ەتۋدى تۇبەگەيلى وزگەرتتى. زاڭسىز ارەكەتتەردىڭ سالدارىنان كوپتەگەن ازاماتتار زارداپ شەكتى. شاعىن جانە ورتا بيزنەس وكىلدەرى شىعىنعا ۇشىرادى. قازىرگى مالىمەتتەر بويىنشا بيزنەسكە 100 ميلليارد تەڭگەدەن استام شىعىن كەلتىرىلگەن», دەدى پرەزيدەنت.
ۇكىمەتتىڭ كەڭەيتىلگەن وتىرىسىندا پرەمەر-مينيستر ءاليحان سمايىلوۆ, ۇلتتىق بانك توراعاسى عالىمجان ءپىرماتوۆ, «سامۇرىق-قازىنا» ۇاق» اق باسقارما توراعاسى الماسادام ساتقاليەۆ, ماڭعىستاۋ, جامبىل, الماتى وبلىستارىنىڭ, سونداي-اق الماتى قالاسىنىڭ اكىمدەرى بايانداما جاسايدى.
