كوللاجدى جاساعان قونىسباي شەجىمباي, «EQ»
زاڭ قاتايىپ, ماس كۇيىندە كولىك تىزگىندەگەندەردى جازالاۋ كۇشەيگەنىمەن, بۇل ورايداعى قاتەردىڭ ءالى دە سەيىلمەگەنىن اڭعارۋعا بولادى. ماسەلەن, ءۇش كۇننىڭ ىشىندە 26 جۇرگىزۋشىنىڭ ماس كۇيىندە كولىك جۇرگىزگەندىگى بەلگىلى بولىپ وتىر. بۇرىن جۇرگىزۋشى كۋالىگىنەن ايىرىلعان 10 ازامات جاسىرىنىپ كولىك جۇرگىزىپ كەلە جاتقان كەزىندە جول ساقشىلارىنىڭ قۇرىعىنا ىلىكتى.
– 264 ادام قاۋىپسىزدىك بەلبەۋىن تاقپاعانى ءۇشىن جاۋاپكەرشىلىككە تارتىلدى, – دەيدى وبلىستىق پوليتسيا دەپارتامەنتى جەرگىلىكتى پوليتسيا قىزمەتى باسقارماسى باستىعىنىڭ ورىنباسارى ەربولات قۇسايىنوۆ, – 122 ادام تەحنيكالىق باقىلاۋدان وتپەگەن كولىكتى پايدالانعان. جەدەل پروفيلاكتيكالىق شارانىڭ ماقساتى – اپاتتىڭ الدىن الۋ. ءبىزدىڭ تاراپىمىزدان وسىنداي جۇمىس جۇيەلى جۇرگىزىلگەنىمەن, جالپىعا ورتاق تارتىپكە مويىنسۇنبايتىندار جەتەرلىك. ماسەلەن, كولىك قۇرالدارىن ماس كۇيىندە جۇرگىزگەنى ءۇشىن جەتى جىلعا دەيىن جۇرگىزۋشى كۋالىگىنەن ايىرىلادى, سونىڭ وزىندە دە تىيىلماي وتىر.
كولىك جۇرگىزگەن كەزدە وزىڭنەن بۇرىن وزگەگە كەلتىرەر زالالدى دا ويلاۋ كەرەك. ادەتتە, جاۋاپتى ىسكە ءمان بەرمەي قارايتىنداردىڭ كەسىرىنەن بەيكۇنا ادامدار زارداپ شەگىپ جاتادى. كۇن سايىن ورىن الىپ جاتقان جول-كولىك وقيعالارىنىڭ, جانتۇرشىگەرلىك اپاتتاردىڭ ءبىر سەبەبى وسىندا. بالكىم, وزگە ادامنىڭ ومىرىنە قاۋىپ ءتوندىرىپ, ماس كۇيىندە كولىك جۇرگىزەتىندەرگە قولدانار شارانى ءالى دە قاتايتا ءتۇسۋ كەرەك شىعار.
اقمولا وبلىسى
