قاسىم-جومارت توقاەۆ جەدەلحاتتا ءابدىجامىل نۇرپەيىسوۆتىڭ سۇراپىل سوعىستى باستان كەشكەنىن, ەلگە ورالعان سوڭ قازاق ادەبيەتىن وركەندەتۋگە سۇبەلى ۇلەس قوسقانىن اتاپ ءوتتى.
«ۇزاق جىلعى شىعارماشىلىق قىزمەتى جەمىستى بولدى. «قان مەن تەر» تريلوگياسى, «سوڭعى پارىز» ديلوگياسى سياقتى تۋىندىلارى سىنشىلار مەن وقىرماندار تاراپىنان جوعارى باعا الدى. زامان جۇگىن كوتەرگەن روماندارى الەمنىڭ كوپتەگەن تىلىنە اۋدارىلدى. ءابدىجامىل كارىم ۇلىنىڭ جاڭا بەلەستى باعىندىرعان قازاق ادەبيەتىن شەتەلگە تانىتۋعا سىڭىرگەن ەڭبەگى وراسان زور. ول ۇلت رۋحانياتىنىڭ كوشباسشىسى بولدى.
ءابدىجامىل نۇرپەيىسوۆ ادام جانىن تەرەڭ تۇسىنەتىن, ءتۇرلى تاعدىردىڭ بەينەسىن كوركەم سۋرەتتەي وتىرىپ وقىرمانعا جەتكىزگەن ويلى, كەڭ تىنىستى جازۋشى بولاتىن. ءومىر بويى قولىنان قالامى تۇسكەن جوق. قازاق ەلىنىڭ رۋحاني-مادەني سالاسىن دامىتۋ جولىندا ولشەۋسىز قىزمەت اتقاردى», دەلىنگەن جەدەلحاتتا.
مەملەكەت باسشىسى سونداي-اق جازۋشىنىڭ ۇلت كلاسسيكتەرىنىڭ جولىن لايىقتى جالعاستىرىپ, ءوزى دە قازاق ادەبيەتىنىڭ پاتريارحىنا اينالعانىن جازادى.
ء«ابدىجامىل نۇرپەيىسوۆتىڭ سوڭىندا ۇرپاققا ۇلگى, ۇلىسقا يگىلىك بولاتىن شىعارمالارى قالدى. ەلگە ەس, سىرتقا سەس بولعان جازۋشىنىڭ ەندى ەكىنشى ءومىرى باستالدى. ونەگەلى عۇمىر كەشىپ, سوڭىندا مول مۇرا قالدىرعان ءابدىجامىل كارىم ۇلىنىڭ جارقىن بەينەسى ۇمىتىلمايدى. حالقىمىز ەسىمىن ءاردايىم ارداق تۇتادى. مارقۇمنىڭ يمانى سالامات, جانى ءجانناتتا بولسىن», دەلىنگەن كوڭىل ايتۋ جەدەلحاتىندا.
قالامگەرمەن قوشتاسۋ راسىمىندە مادەنيەت جانە سپورت ءمينيسترى داۋرەن اباەۆ كوز الدىمىزدا قازاق ادەبيەتىنىڭ, ۇلت رۋحانياتىنىڭ تۇتاس ءداۋىرى كوشىپ بارا جاتقانىن ايتتى.
«جاس – قارتايماق, جوق – تۋماق, تۋعان – ولمەك» دەسەك تە, سانالى ادامعا بۇل قايعىنىڭ سالماعىن سارالاۋ وتە قيىن.
ءابدىجامىل نۇرپەيىسوۆ – ءتول ادەبيەتىمىز بەن مادەنيەتىمىزدى دامىتۋ ىسىنە ولشەۋسىز ۇلەس قوسقان تاۋ تۇلعا.
تالعامپاز وقىرماننىڭ جوعارى باعاسىنا يە بولىپ, كوزى تىرىسىندە كلاسسيككە اينالعان قالامگەر. تۋعان حالقىنىڭ ىستىق ىقىلاسىنا بولەنگەن ۇلتىمىزدىڭ ءبىرتۋار پەرزەنتى.
ەسىمى اڭىزعا اينالعان ابىز اقساقال ادالدىقتىڭ اق جولىنان تايعان ەمەس. ءاردايىم ەلدىكتىڭ ءسوزىن سويلەدى. جۇرتىنىڭ بۇگىنى مەن بولاشاعىنا الاڭداۋمەن ءوتتى», دەدى مينيستر.
سونداي-اق مەملەكەت جانە قوعام قايراتكەرى قىرىمبەك كوشەرباەۆ جازۋشىنىڭ تاعدىرى وڭاي بولماعانىن اتاپ ءوتتى.
«بۇعاناسى بەكىمەي جاتىپ قولىنا قارۋ ۇستاپ مايدانعا اتتاندى. قان قاساپتان امان كەلىپ, ءتول ادەبيەتىمىزدىڭ الىبىنا اينالدى. ابە 95 جاسقا تولعان كەزدە مەملەكەت باسشىسى قاسىم-جومارت توقاەۆ الماتىعا ارنايى كەلىپ, «ەندى عاسىرلىق مەرەيتويىڭىزدا كەزدەسەيىك» دەگەن تىلەكپەن بىرگە ەڭبەك ەرىنىڭ «التىن جۇلدىزىن» توسىنە تاعىپ ەدى. امال نە, اللانىڭ امىرىنە قارسى شىعۋ مۇمكىن ەمەس», دەدى ول.
قارالى جيىنعا وقىرماندار مەن زيالى قاۋىم وكىلدەرى, ۇكىمەت مۇشەلەرى قاتىستى.
ەسكە سالساق, جازۋشى 5 اقپاندا 98 جاسقا قاراعان شاعىندا ومىردەن وتكەن ەدى.
