سوڭعى تاۋلىكتە عانا 700-دەن استام ىندەت جۇقتىرعان. ونىڭ 536-ى ەرەسەك ادام بولسا, قالعاندارى – 14 جاسقا دەيىنگى بالالار. ىندەت اسىرەسە, كوكشەتاۋ, ستەپنوگورسك قالالارى مەن بۋراباي, ەرەيمەنتاۋ, اتباسار اۋداندارىندا جايىلىپ بارادى.
قاۋىپتى دەرتكە وقۋشىلار دا ءجيى ۇشىراۋدا. ماسەلەن, تورتكۇل دۇنيەنىڭ اپشىسىن قۋىرا جەتكەن كۆي دەرتى باستالعالى
5 742 وقۋشى ىندەتكە شالدىعىپتى. جاڭا وقۋ جىلىنان بەرى 3 مىڭنان استام وقۋشى اۋىرعان. جوعارى جانە ورتا وقۋ ورىندارىنىڭ ستۋدەنتتەرى دە ىندەت جۇقتىرۋشىلار قاتارىندا. ولاردىڭ سانى 300-دەن اسادى.
– قاۋىپتىڭ بەتىن قايتارۋ ءۇشىن ءاربىر تۇرعىننىڭ ەكپە قابىلداۋى قاجەت. ارينە, ەكپە قابىلداعاننان كەيىن دە دەرتكە ۇشىراعانداردىڭ بار ەكەنىن جاسىرۋعا بولماس, – دەيدى ءوڭىردىڭ باس سانيتارلىق دارىگەرى, – ءبىر جاقسىسى, ەكپە قابىلداعاننان كەيىن ىندەتتىڭ اسەرى جەڭىلدەۋ بولادى.
بۇگىندە وڭىردە 150-گە جۋىق ۆاكتسينا پۋنكتتەرى جۇمىس ىستەۋدە. ءسوز اراسىندا وسى ءبىر جاۋاپكەرشىلىگى مول ىستە قوسشى قالاسىنىڭ تۇرعىندارى كوش باستاپ تۇرعاندىعىن ايتا كەتسەك ارتىق بولماس. قالا تۇرعىندارى تۇگەل ۆاكتسينانىڭ ءبىرىنشى جانە ەكىنشى كومپونەنتىن الىپ ۇلگەرگەن. تيىمدىلىگى وسى جەردە كورىنىپ تۇر. ساراپتاپ قاراساڭىز, ىندەت قارقىنى بۇل قالادا وتە تومەن. دەمەك, ۆاكتسينا سالۋدىڭ تيىمدىلىگى كوزگە كورىنىپ تۇر.
– بۇگىنگە دەيىن رەۆاكتسينانى تۇرعىنداردىڭ 50 پايىزى عانا الدى. بۇل بارلىق كولەمنىڭ جارتىسى عانا. كوپشىلىگى – مەكتەپ مۇعالىمدەرى مەن مەديتسينا قىزمەتكەرلەرى, – دەيدى باس سانيتارلىق دارىگەر.
وڭىردە 207 مونيتورينگ توبى جۇمىس ىستەۋدە. جىل باسىنان بەرى ولار 200-دەن استام باقىلاۋ جۇمىستارىن جۇرگىزگەن. ناتيجەسىندە, كارانتين شارالارىن بۇزعان 4 نىسان انىقتالىپتى, 2 مىڭنان استام تۇرعىن وقشاۋلاۋ تالابىن بۇزعان, 522 وبلىس تۇرعىنىنا 27,6 ملن تەڭگە ايىپپۇل سالىنعان.
بۇگىنگى تاڭدا وبلىستاعى 17 ستاتسيوناردا
1 205 توسەكتىك ورنى بار. 700-دەن استام سىرقات ەم قابىلداۋدا. جان ساقتاۋ بولىمىندە 23 ناۋقاس جاتىر. ءدارى-دارمەكتىڭ ەكى ايلىق قورى قامتاماسىز ەتىلگەن.
قاۋىپتىڭ بەتىن قايتاراتىن جالعىز جول – ەكپە قابىلداۋ ەكەنىن ماماندار ايتىپ وتىر. دەمەك, جالپاق جۇرت جاناشىر سوزگە قۇلاق اسۋلارى قاجەت.
اقمولا وبلىسى
