قر ساۋدا جانە ينتەگراتسيا مينيسترلىگىندە مينيستر باقىت سۇلتانوۆتىڭ باسشىلىعىمەن اپپاراتتىق كەڭەس ءوتتى. كۇن تارتىبىندە تۇتىنۋشىلاردىڭ قۇقىقتارىن قورعاۋ جۇيەسىنىڭ تيىمدىلىگى قاراستىرىلدى, وسى ماسەلە بويىنشا تۇتىنۋشىلاردىڭ قۇقىقتارىن قورعاۋ كوميتەتىنىڭ توراعاسى اسقار تىنىسبەكوۆ بايانداما جاساپ, حالىقتىڭ ءومىر ءسۇرۋ ساپاسىن ارتتىرۋ تۇتىنۋشىلاردىڭ قۇقىقتارىن قورعاۋدىڭ ءتيىمدى جۇيەسىمەن تىعىز بايلانىستى ەكەنىن, ولاردان كەلىپ تۇسەتىن شاعىمدار سانى جىل سايىن ارتىپ كەلە جاتقانىن مالىمدەدى. كەلتىرىلگەن دەرەكتەر ستاتيستيكاعا نەگىزدەلگەن. ماسەلەن, 2020 جىلى شامامەن 21 مىڭ ادامنىڭ شاعىمى قارالدى. 2021 جىلى ولاردىڭ سانى 25,2 مىڭعا دەيىن ءوستى, ياعني ءوسىم 120,5%-دى قۇرادى.
«قابىلدانعان شارالاردىڭ ناتيجەسىندە تۇتىنۋشىلارعا 363 ملن تەڭگەدەن استام قاراجات قايتارىلدى. ەڭ كوپ شاعىم تۇسەتىن ەكونوميكانىڭ ەڭ پروبلەمالى سالالارى: بولشەك ساۋدا (55,3%), تۇرمىستىق قىزمەتتەر (15,2%), ەلەكتروندىق ساۋدا (5,3%), تكش(4,3%), اۆياتاسىمالدار (1,8%)», دەپ ءتۇسىندىردى اسقار تىنىسبەكوۆ.
تۇتىنۋشىلىق شاعىمداردىڭ ءوسۋ جاعدايى بيزنەستىڭ ءوز مىندەتتەرىن بۇزعانىن, ال تۇتىنۋشىلار قۇقىعىنىڭ قورعالۋى تومەن دەڭگەيدە ەكەنىن كورسەتەتدى.
مۇنىڭ ءبارىن 2021 جىلى جۇرگىزىلگەن سوتسيولوگيالىق ساۋالنامانىڭ ناتيجەلەرى دالەلدەيدى.
20 مىڭ رەسپوندەنتتىڭ 42%-ى «تۇتىنۋشىلاردىڭ قۇقىقتارىن قورعاۋ تۋرالى» زاڭ نورمالارىن قولدانبايدى دەپ جاۋاپ بەردى. 5%-ى مۇنداي زاڭنىڭ بار ەكەنىن بىلمەيدى. سۇرالعانداردىڭ 45%-ى مۇددەلەرى بۇزىلعان جاعدايدا مەملەكەتتىك ورگانداردان كومەك سۇراعان جوق. 14%-ى تۇتىنۋشىلىق قۇقىقتارعا سايكەس جاعداي تۋرالى سۇراققا جاۋاپ بەرۋگە قينالدى.
الەۋمەتتىك ساۋالنامانىڭ قورىتىندىلارى ەل تۇرعىندارىنىڭ مەديتسينا سالاسىندا قىزمەت كورسەتۋگە - 26,5%, ينتەرنەت-پروۆايدەرلەرگە - 26,4%, قالالىق قوعامدىق كولىككە - 21% قاناعاتتانبايتىندىعىن كورسەتتى.
