كەزدەسۋ بارىسىندا سەنات سپيكەرى قازاقستان پرەزيدەنتى قاسىم-جومارت توقاەۆ بەلگىلەپ بەرگەن تاۋەلسىزدىكتىڭ جاڭا كەزەڭىندەگى ەل دامۋىنىڭ نەگىزگى باسىمدىقتارىنا توقتالدى. ماۋلەن اشىمباەۆ پالاتانىڭ الداعى باستى مىندەتى مەملەكەت باسشىسىنىڭ ەلىمىزدى جاڭارتۋ باعدارىن ساپالى زاڭدارمەن قامتاماسىز ەتۋ بولىپ قالا بەرەتىنىن جەتكىزدى.
سەنات توراعاسى قازىرگى تاڭدا ەلىمىزدە شاعىن جانە ورتا بيزنەستى دامىتۋ ءۇشىن جاعداي جاساۋعا, مەملەكەتتىڭ ەكونوميكاعا قاتىسۋىن ازايتۋعا, الەۋمەتتىك تەڭسىزدىكتى تومەندەتۋگە جانە وڭىرلەردى دامىتۋداعى ديسپروپورتسيانى قىسقارتۋعا ارنالعان جۇيەلى شارالار ىسكە اسىرىلىپ جاتقانىن ايتتى. سونداي-اق ول بۇگىندە قازاقستاندا جۇرگىزىلىپ جاتقان مەملەكەتتىك باسقارۋ جۇيەسىن جاڭارتۋ مەريتوكراتيا, اشىقتىق جانە سىبايلاس جەمقورلىققا قارسى كۇرەس قاعيداتتارىن كۇشەيتۋدى قامتيتىنىن اتاپ ءوتتى.
سونىمەن قاتار سۇحباتتاسۋشىلار قازاقستان مەن جاپونيا اراسىنداعى پارلامەنتارالىق ىنتىماقتاستىقتى نىعايتۋ ماسەلەلەرىنە نازار اۋداردى.
«پارلامەنتارالىق قارىم-قاتىناس ءبىزدىڭ جۇمىسىمىزدىڭ ماڭىزدى باعىتى بولىپ سانالادى. وسى رەتتە ءبىز جاپون ارىپتەستەرىمىزبەن بايلانىسىمىزدى جانداندىرىپ, جاپونيا پارلامەنتىندەگى دوستىق ليگاسىمەن ءوزارا قاتىناسىمىزدى دامىتۋعا مۇددەلىمىز. بىرلەسىپ پىسىقتايتىن ماسەلەلەر از ەمەس. ولار ەكونوميكا, ساۋدا, ينۆەستيتسيالار, قازاقستانعا جاسىل تەحنولوگيالاردى تارتۋ سياقتى باعىتتاردى قامتيدى. ەكولوگيا, حالىقارالىق ماسەلەلەر, ونىڭ ىشىندە, اۋعانستانداعى احۋال بويىنشا ىنتىماقتاستىقتىڭ دا ماڭىزى زور. پارلامەنت دەپۋتاتتارىنا وسى تاقىرىپتاردىڭ ءبارىن تالقىلاپ, ەكى ەلدىڭ ۇكىمەتتەرىمەن بىرلەسىپ, قانداي دا ءبىر باستامالار مەن جوبالاردى ىسكە اسىرۋعا مول مۇمكىندىك بار», دەدى ماۋلەن اشىمباەۆ.
ءوز كەزەگىندە ەلشى جاپونيا پارلامەنتشىلەرى دە قازاقستاندىق ارىپتەستەرىمەن ىنتىماقتاستىقتى جانداندىرۋعا نيەتتى ەكەنىن ايتتى. سونداي-اق ديپلومات جاپون تاراپى قازاقستان پرەزيدەنتىنىڭ ەلدەگى ينۆەستيتسيالىق احۋالدى ساقتاۋ جانە ودان ءارى جاقسارتۋ جونىندەگى ۇستانىمىن جوعارى باعالايتىنىن تىلگە تيەك ەتتى. ول سوندىقتان جاپون ينۆەستورلارى قازاقستان ەكونوميكاسىنا ينۆەستيتسيا سالۋدى جالعاستىرۋعا ق ۇلىقتى ەكەنىن اتاپ ءوتتى.
ءىس-شارا سوڭىندا ماۋلەن اشىمباەۆ سەناتتىڭ زاڭ شىعارۋ قىزمەتىنە توقتالدى. ونىڭ ايتۋىنشا, بىلتىر سەناتورلار 104 زاڭ قابىلدادى. ولاردىڭ ءاربىر تورتىنشىسىنە پارلامەنت دەپۋتاتتارى باستاماشى بولدى. سەنات توراعاسى بۇل زاڭداردىڭ ءبارى ەلىمىزدىڭ ساياسي جانە الەۋمەتتىك-ەكونوميكالىق دامۋىن قامتاماسىز ەتۋگە ارنالعانىن ايتتى.
